ورالدا مەكتەپتەگى الىمجەتتىك وقيعاسى بويىنشا قىلمىستىق ءىس قوزعالدى
ورال. KAZINFORM — ورال قالاسىندا مەكتەپتەگى الىمجەتتىك وقيعاسى بويىنشا قىلمىستىق ءىس قوزعالدى.

ب ق و پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، ق ر ق ك 140-بابىنا (كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ) سايكەس سوتقا دەيىنگى تەرگەۋ امالدارى باستالدى.
تەرگەۋ امالدارىن شاعان پوليسيا ءبولىمى جۇرگىزۋدە.
اتالمىش باپ بويىنشا ايىپتى دەپ تانىلعان ادام بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءۇش جىلعا دەيىنگى مەرزىمگە ايىرا وتىرىپ نەمەسە ونسىز، 160 ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 160 ساعاتقا دەيىنگى مەرزىمگە قوعامدىق جۇمىستارعا تارتۋعا نە قىرىق تاۋلىككە دەيىنگى مەرزىمگە قاماققا الۋعا جازالانادى.
ەسكە سالا كەتەيىك، بۇدان بۇرىن ورال تۇرعىنى قىزىن سىنىپتاستارى ۇرىپ- سوققانى جونىندە شاعىم جاساعانىن جازعان بولاتىنبىز.
سونداي-اق وقۋ ورنىنداعى الىمجەتتىك وقيعاسى بويىنشا ورالدا مەكتەپ باسشىلىعى تارتىپتىك جاۋاپكەرشىلىككە تارتىلدى.
قىزدىڭ اناسى Instagram الەۋمەتتىك جەلىسىندە mamochki_uralska_vmeste پابليگىندە جازعاننان كەيىن بۇل ماسەلە قوعامدىق پىكىر تۋعىزىپ، ءتيىستى شارالار قابىلدانعان بولاتىن.