ورالدا پاتەر توناپ، 2 ميلليون تەڭگە شىعىن كەلتىرگەن قىلمىستىق توپ ۇستالدى
ورال. KAZINFORM - باتىس قازاقستان وبلىسىندا كريمينالدىق پوليسيا قىزمەتكەرلەرى جەكە ۇيلەردى تونادى دەگەن كۇدىكپەن قىلمىستىق توپتى ۇستادى.
ب ق و پوليسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، اتالعان توپ ورال قالاسى مەن بايتەرەك اۋدانىندا بىرنەشە ءىرى ۇرلىققا بارعان.
كۇدىكتىلەر ءۇش ۇيگە پلاستيكالىق تەرەزەنى يتەرىپ كىرىپ، التىن بۇيىمداردى (سىرعا، ساقينا، القالار جانە ت. ب.) جانە اقشالاي قاراجاتتى جىمقىرعان. ۇرلىقتىڭ كەشكى جانە تۇنگى ۋاقىتتا ءۇي يەلەرى بولماعان كەزدە جاسالعانى انىقتالدى.
- جەدەل ىزدەستىرۋ ءىس-شارالارى ناتيجەسىندە ب ق و پوليسيا دەپارتامەنتىنىڭ قىزمەتكەرلەرى وبلىستىڭ ءتورت تۇرعىنىن ۇستادى. ولاردىڭ ۇشەۋى بۇرىن بىرنەشە رەت ۇرلىق، توناۋ جانە الاياقتىق قىلمىستارىن جاساعانى ءۇشىن سوتتالعان. ۇرلانعان زاتتاردىڭ ءبىر بولىگى كۇدىكتىلەر وتكىزىپ جىبەرگەن ورىنداردان تاركىلەندى. قازىرگى ۋاقىتتا ءۇش ەپيزود بويىنشا الدىن الا تەرگەۋ باستالدى. قولعا تۇسكەندەر ۋاقىتشا ۇستاۋ يزولياتورىنا قاماۋعا الىندى. جالپى شىعىن سوماسى 2 ميلليون تەڭگەدەن اسادى. كۇدىكتىلەردىڭ باسقا دا وسىنداي قىلمىستارعا قاتىستىلىعى تەكسەرىلۋدە، - دەپ حابارلادى ۆەدومستۆودان.
