ورالدا ەۆاكۋاتسيالىق پۋنكتتە تۇرىپ جاتقان كەلىنشەك ءتورتىنشى بالانىڭ اناسى اتاندى
ورال. KAZINFORM - ورال قالاسىندا ەۆاكۋاتسيالىق پۋنكتتە تۇرىپ جاتقان راۋشان تابىنوۆا ءتورتىنشى بالانىڭ اناسى اتاندى. ءوزىنىڭ ايتۋىنشا، زايىبى ايدوس جۇماعاليەۆ ەكەۋى 2019 -جىلى مامىر ايىندا 1-ساياجاي قوعامداستىعى اۋماعىنان جازعى ءۇي ساتىپ العان.
سودان كەيىن اتالمىش ءۇيدى قىستا تۇرۋعا بولاتىنداي ەتىپ قايتا جوندەگەن. بيىل ساياجايلارعا سۋ باسۋ قاۋپى تونگەننەن كەيىن ەۆاكۋاتسيالانىپ، وتباسىمەن م. وتەمىسوۆ اتىنداعى باتىس قازاقستان ۋنيۆەرسيتەتىنىڭ جاتاقحاناسىنا ورنالاسقان.
«سوندا بالالارىمىزبەن بىرگە تۇردىق. وندا دا مەديتسينا قىزمەتكەرلەرى، ەۆاكۋاتسيالىق پۋنكت ماماندارى جاقسى كومەك كورسەتتى. كەشە قالالىق كوپبەيىندى اۋرۋحانادا امان-ەسەن جەڭىلدەنىپ، ءتورتىنشى پەرزەنتىمدى باۋىرىما باسىپ وتىرعان جايىم بار. ەۆاكۋاتسيالىق ورتالىققا تۇسكەننەن بەرى وزىمە تىكەلەي حابارلاسىپ، ءوز جاردەمىن بەرىپ جاتقان «AMANAT» پارتياسىنىڭ مۇشەسى، قالالىق ءماسليحاتتىڭ دەپۋتاتى ازامات بيسەنوۆكە دە مىڭ العىس. ازامات اۋرۋحانادان شىققاننان كەيىن تۇرۋ ءۇشىن ەكى ايعا جايلى پاتەر جالداپ بەرىپ جاتىر. كىشكەنتايىم ەكەۋمىزدىڭ جاعدايىمىز جاقسى. بۇيىرسا، بۇگىن سول پاتەرگە بارامىز»، - دەيدى راۋشان.
ونىڭ سوزىنە قاراعاندا، كىشكەنتاي حانشايىمدارىنىڭ ەسىمىن نازىم دەپ قويعان. وتاعاسى ايدوستىڭ تۇراقتى جۇمىس ورنى جوق، تاس قالاۋشى. راۋشاننىڭ ءوزى د. نۇرپەيىسوۆا اتىنداعى مۋزىكا مەكتەبىندە كىشى قىزمەتكەر بولىپ جۇمىس ىستەگەن. ۇلكەن قىزدارى شىرىن ورالداعى № 19-مەكتەپتە 8-سىنىپتا، ۇلدارى نۇردوس № 22-مەكتەپتە 6-سىنىپتا وقيدى، نازىمنىڭ اپاسى ىڭكار «بالاۋسا» بالاباقشاسىندا تاربيەلەنەدى.
«№19-مەكتەپ جاقىن. ال № 22-مەكتەپتىڭ ارنايى اۆتوبۋسى وقۋشىلاردى وسى جەردەن الىپ كەتەدى. وسىنداي قيىن جاعداي تۋىنداعان كەزدە قولۇشىن سوزىپ جاتقان ازاماتتاردىڭ بارىنە شىن جۇرەكتەن العىسىمدى ايتامىن. جاساعان جاقسىلىقتارى مىڭ ەسە بولىپ قايتسىن. ەلىمىزدە تەك تىنىشتىق پەن بەرەكە بولسىن دەپ تىلەيمىز»، دەدى ر. تابىنوۆا.
م. وتەمىسوۆ اتىنداعى باتىس قازاقستان ۋنيۆەرسيتەتىنىڭ باسپا ءسوز حاتشىسى ءمولدىر سادىرعاليەۆا ەۆاكۋاتسيالىق پۋنكتتە 300 ادام تۇرىپ جاتقاندىعىن جەتكىزدى.
«ەۆاكۋاتسيالىق پۋنكتتە كوپبالالى وتباسىلار، مۇگەدەكتىگى بار ادامدار دا ورنالاسقان. ولاردىڭ بارىنە بارىنشا جاعداي جاسالىپ جاتىر»، - دەدى م. سادىرعاليەۆا.
ەسكە سالا كەتەيىك، بۇدان بۇرىن ب ق و دارىگەرلەرى استاناعا بارۋى ءتيىس جۇكتى كەلىنشەكتى بوساندىرىپ العانىن جازعان بولاتىنبىز.
اۆتور
عايساعالي سەيتاق
