ورالدا ارنايى جاساق ساربازدارى 27 جاستاعى قىزدى ۇستادى
استانا. قازاقپارات – ورال قالاسىندا سينتەتيكالىق ەسىرتكى تاراتتى دەگەن كۇدىكپەن 27 جاستاعى ايەل ۇستالدى. ونى قولعا ءتۇسىرۋ وپەراتسياسىنا پوليتسيانىڭ ارنايى بولىمشەسىنىڭ قىزمەتكەرلەرى قاتىسقان، دەپ حابارلايدى Polisia.kz.
باتىس قازاقستان وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ارنايى جاساقپەن بىرلەسىپ، ورال تۇرعىنىن ۇستاعان.
جەكە ءتىنتۋ كەزىندە ودان iPhone 15 Pro Max تەلەفونى تاركىلەنگەن. ايەلدىڭ سومكەسىنەن ىشىندە سارى ءتۇستى ۇنتاق ءتارىزدى زات بار 25 زيپ-پاكەت تابىلعان. سونىمەن قاتار شالبارىنىڭ قالتاسىنان تاعى ەكى تۇيىنشەك شىققان. ولاردىڭ ءارقايسىسىندا بەس پاكەتتەن بولعان.
پوليتسيا قىزمەتكەرلەرى قالا كوشەلەرىندەگى ەسىرتكى جاسىرىلعان بولۋى مۇمكىن ورىنداردى تەكسەرۋ بارىسىندا قوسىمشا تۇيىنشەكتەردى انىقتاعان. ال كۇدىكتىنىڭ جالدامالى پاتەرىن ءتىنتۋ كەزىندە ۇنتاق ءتارىزدى زات سالىنعان پلاستيك ىدىس، بەس ەلەكتروندى تارازى، زيپ-پاكەتتەر، رەسپيراتور، رەزەڭكە قولعاپ، كەڭسە پىشاعى مەن وقشاۋلاعىش تاسپا تاركىلەنگەن.
ساراپتاما قورىتىندىسى بويىنشا، الىنعان زاتتىڭ سينتەتيكالىق α-PVP ەسىرتكىسى ەكەنى انىقتالعان. جالپى سالماعى 442 گرام بولعان. بۇل مىڭنان استام ءبىر رەتتىك دوزاعا تەڭ.
تەرگەۋ بارىسىندا كۇدىكتىنىڭ 2026-جىلدىڭ ساۋىرىنەن بەرى ەسىرتكىنى ساقتاپ، تاراتۋ ءۇشىن ولشەپ، ءبولىپ دايىنداۋمەن اينالىسقانى انىقتالعان. ول ەسىرتكى ساتۋشىلار اراسىندا «سكلادمەن» دەپ اتالاتىن قىزمەتتى اتقارعان.
قىلمىستىق ءىس ماتەريالدارى سوتقا جولدانعان.
