ورال قالاسىندا ەر ادام تاسقىن سۋمەن اعىپ كەتە جازدادى
ورال. KAZINFORM - ورال قالاسىندا ەر ادام تاسقىن سۋمەن اعىپ كەتە جازدادى. ب ق و پوليتسيا دەپارتامەنتىنىڭ قىزمەتكەرى، پوليتسيا كىشى سەرجانتى ءامىرجان بىرلەسوۆتىڭ ءمالىم ەتكەنىندەي، وقيعا 21-ءساۋىر كۇنى شامامەن ساعات 12.30-دا جايىق وزەنى جايىلمالارىندا ورنالاسقان 1، 2، 3-ساياجاي اۋماعىندا بولعان.
«جاساندى بوگەتتى تاسقىن سۋ بۇزىپ وتكەننەن كەيىن ءبىر ەر ادامنىڭ اعىپ بارا جاتقانىن بايقادىم. ۇلتتىق ۇلان، ەرىكتىلەر، ت ج قىزمەتكەرلەرى جانە سول ماڭدا بولعان ازاماتتار ماعان كومەكتەستى. ءسويتىپ ەر ادامدى قۇتقارىپ قالدىق» دەدى ءا. بىرلەسوۆ.
ب ق و پوليتسيا دەپارتامەنتىنىڭ باستىعى ارمان ورازاليەۆتىڭ ناقتىلاۋىنشا، الەۋمەتتىك جەلىلەر مەن ءتۇرلى مەسسەندجەرلەردە سۋ باسقان اۋماقتان ءبىر ادامنىڭ قۇتقارىلعانى تۋرالى بەينەجازبا تارادى.
ونىڭ سوزىنە قاراعاندا، بەينەجازبا اۆتورى ۇكىمەتتەن ەشقانداي كومەك جوق ەكەنىن ايتىپ قالدى. بۇل شىندىققا جاناسپايدى.
ويتكەنى سۋعا كەتە جازداعان تۇرعىندى امان الىپ قالعان ازامات - پوليتسيا كىشى سەرجانتى ءامىرجان بىرلەسوۆ.
وعان ۇلتتىق ۇلان جاۋىنگەرلەرى، ەرىكتىلەر جانە ت ج دەپارتامەنتىنىڭ قىزمەتكەرلەرى كومەككە كەلدى.
«قۇرمەتتى تۇرعىندار! ق ر اكىمشىلىك قۇقىق بۇزۋ تۋرالى كودەكسىنىڭ 667-بابىنا سايكەس قۇقىق قورعاۋ ورگانى نەمەسە ارناۋلى مەملەكەتتىك ورگان قىزمەتكەرىنىڭ زاڭدى وكىمىنە نەمەسە تالابىنا باعىنباۋ زاڭعا قايشى ەكەنىن ەستەرىڭىزگە سالامىز. مۇنداي قۇقىقبۇزۋشىلىق جاساعان ادامعا وتىز ايلىق ەسەپتىك كورسەتكىش مولشەرىندە ايىپپۇل سالىنادى نەمەسە ون بەس تاۋلىككە دەيىنگى مەرزىمگە اكىمشىلىك قاماققا الىنادى. تاسقىن قاۋپى تونگەن كۇننەن باستاپ كۇنى بۇگىنگە دەيىن پوليتسيا، قۇقىق قورعاۋ قىزمەتكەرلەرى، اسكەريلەر، ۇلتتىق ۇلان ساربازدارى جانە توتەنشەلىكتەر سۋ باسۋ قاۋپى بار ايماقتارداعى ازاماتتارعا بىرنەشە رەت ەسكەرتۋ جاسادى، سۋعا كەتە جازداعان ادامعا دا ەسكەرتىلگەن بولاتىن. ءوزىڭىزدىڭ جانە تۋىستارىڭىزدىڭ ءومىرىن قاتەرگە تىكپەڭىز» دەدى ا. ورازاليەۆ.
ەسكە سالا كەتەيىك، بۇدان بۇرىن ورال قالاسىندا جايىقتاعى سۋ دەڭگەيى قاۋىپتى شەكتەن اسىپ كەتكەنىن جازعان بولاتىنبىز.
ورال قالاسى توڭىرەگىندە ساياجايلار سۋعا كەتىپ جاتىر.
ورال قالاسىندا سۋ باسقان ساياجايلاردان 4 ادام قۇتقارىلدى.
