ورال قالاسى اكىمىنە قاتاڭ سوگىس جاريالاندى
ورال. KAZINFORM - باتىس قازاقستان وبلىسىنىڭ اكىمى ناريمان تورەعاەۆ تاسقىن سۋدىڭ الدىن الۋ بويىنشا وبلىستىق جەدەل شتابتىڭ وتىرىسىن وتكىزدى.
وتىرىس بارىسىندا وبلىسقا قاراستى قالالار مەن اۋدان اكىمدەرى سۋ تاسقىنىنىڭ الدىن الۋعا باعىتتالعان جۇمىستارى تۋرالى باياندادى. شتاب وتىرىسىندا وبلىس اكىمى ورال قالاسىنىڭ اكىمى ميرجان ساتقانوۆقا قاتاڭ سوگىس جاريالادى.
«سۋ تاسقىنىنا دايىن بولماعانسىڭدار. قالا اكىمدىگى عيماراتىنىڭ ءوزى سۋعا كەتكەن. بۇنىڭ ءبارى جاۋاپكەرشىلىكتىڭ جوقتىعىن بىلدىرەدى. كەشە جانە بۇگىن قالانى ارالاپ ءجۇرمىن، كەيبىر شاعىن اۋدانداردا مەن كەلگەندە عانا جۇمىس باستالىپ جاتتى. ورال قالاسى اكىمىنە قاتاڭ سوگىس جاريالايمىن. سونداي-اق ءبىرقاتار الەۋمەتتىك نىساندارعا سۋ كىرگەن. قالا مەن اۋداندار كۇشەيتىلگەن رەجيمدە جۇمىس ىستەۋلەرى كەرەك. جاعدايدى 24 ساعات بويى باقىلاۋدا ۇستاڭدار»، - دەدى وبلىس اكىمى.
ەسكە سالا كەتەيىك، بۇدان بۇرىن باتىس قازاقستاندا 500 دەن استام ءۇي مەن 15 كاسىپورىن گازسىز قالعانىن جازعان بولاتىنبىز. سونداي-اق ورال قالاسىندا بىرنەشە نىسان مەن 5 كوپ قاباتتى ءۇيدىڭ جەرتولەسىنە سۋ كىردى.
