مودەرنا ازىرلەگەن ۆاكسينا كەيبىر قاتەرلى ىسىكتەردى ەمدەۋ ءتاسىلىن وزگەرتۋى مۇمكىن

كلينيكالىق سىناق ناتيجەلەرى جاريالانعاننان كەيىن كومپانيا اكسيالارى 160 پايىزعا دەيىن قىمباتتاپ، نارىقتىق كاپيتاليزاتسياسى شامامەن $40 ميللياردقا ءوستى، دەپ حابارلايدى Reuters.

كلينيكالىق سىناقتىڭ سوڭعى كەزەڭىندەگى وڭ ناتيجەلەر COVID-19 پاندەمياسىنان كەيىن ونىمدەر قاتارىن كەڭەيتۋگە ۇمتىلىپ وتىرعان Moderna ءۇشىن ماڭىزدى جەتىستىك بولدى.

كومپانيانىڭ بيزنەسىنىڭ قارقىندى وسۋىنە بۇعان دەيىن كوروناۆيرۋسقا قارسى مرنق- ۆاكسيناسى ايتارلىقتاي ىقپال ەتكەن ەدى.

جەكەلەندىرىلگەن ۆاكسينا ءار پاتسيەنتكە جەكە ازىرلەنەدى.

ول يممۋندىق جۇيەگە ىسىك جاسۋشالارىنداعى وزىنە ءتان مۋتاتسيالاردى تانىپ، ولاردى جويۋعا مۇمكىندىك بەرەدى.

زەرتتەۋ بارىسىندا ۆاكسينا Merck كومپانياسىنىڭ Keytruda پرەپاراتىمەن بىرگە قولدانىلدى.

مەلانومانى حيرۋرگيالىق جولمەن الىپ تاستاعان، ءبىراق اۋرۋدىڭ قايتا پايدا بولۋ قاۋپى جوعارى پاتسيەنتتەردە ۆاكسينانى Keytruda-مەن بىرىكتىرىپ قولدانۋ تەك Keytruda پرەپاراتىمەن ەمدەۋگە قاراعاندا جاقسى ناتيجە كورسەتكەن.

زەرتتەۋ ناتيجەلەرى بۇل تەحنولوگيانى قاتەرلى ىسىكتىڭ باسقا تۇرلەرىنە قارسى پرەپاراتتار ازىرلەۋگە جول اشۋى مۇمكىن ەكەنىن كورسەتتى.

Moderna ،Merck جانە باسقا دا كومپانيالار بۇل ءتاسىلدى وكپە، ءسۇت بەزى جانە ۇيقى بەزى ىسىكتەرىن ەمدەۋدە زەرتتەپ جاتىر.

بۇعان دەيىن قازاقستاندا وكپە قاتەرلى ىسىگىن انىقتاۋعا ارنالعان جاڭا سكرينينگ ىسكە قوسىلاتىنى حابارلانعان بولاتىن.