وقۋشىنىڭ ونەرتابىسى

مەكتەپتە ءجۇرىپ-اق عىلىممەن اينالىسۋعا دەن قويعان جاس ورەندەردىڭ تالابىنا سۇيسىنە قارايسىڭ. اقتوبە قالاسىنداعى نازاربايەۆ زياتكەرلىك مەكتەبىنىڭ وقۋشىسى داير سىرلىبايەۆ - IT سالاسىندا ايتارلىقتاي جەتىستىككە جەتكەن العىر ورەن.

جاس تالاپ جاقىندا عانا پەرنەتاقتانى كوزبەن باسقارۋعا بولاتىن جاڭاشىل جۇيە ويلاپ تاپتى. اتالعان تەحنولوگيا كوزدىڭ قوزعالىسىن باقىلاپ، ارنايى كامەرا مەن جاساندى ينتەللەكت الگوريتمدەرىن قولدانادى. ياعني قاجەتتى ءارىپتى تاڭداۋ ءۇشىن پايدالانۋشى تەك كوزىن پەرنەتاقتانىڭ بەلگىلەنگەن ايماعىنا باعىتتاپ، كىرپىك قاعۋى جەتكىلىكتى. بۇل - اسىرەسە قولىنان ايىرىلعان نەمەسە ماتوريكاسى دامىماعان جاندارعا تاپتىرماس كومەك.

«مەن بۇل جوبانى جاساقتاعاندا، الدىمەن قوعامعا پايداسى تيەتىن قاراپايىم ءارى ءتيىمدى شەشىم ىزدەدىم. كوزبەن باسقارۋ جۇيەسى ارقىلى ادامدار ەشقانداي فيزيكالىق قوزعالىسسىز كومپيۋتەرمەن ەركىن جۇمىس ىستەي الادى. ءدال وسى تەحنولوگيا تەك ەلىمىزدە عانا ەمەس، بۇكىل الەمدە ەرەكشە سۇرانىسقا يە بولادى دەپ ويلايمىن. ويتكەنى ونىڭ كومەگىمەن ميلليونداعان ادامنىڭ ءومىرى جەڭىلدەيدى. الداعى ۋاقىتتا جوبانى دامىتىپ، ءتۇرلى ستارتاپ بايقاۋلارعا قاتىسۋدى جوسپارلاپ وتىرمىز. ماقساتىم - ەل عىلىمىنىڭ دامۋىنا ءوز ۇلەسىمدى قوسۋ. IT سالاسىنا قىزىعۋشىلىعىم مەنى ۇنەمى دامۋعا ۇمتىلدىرادى، جاڭا تەحنولوگيالاردىڭ سوڭعى جاڭالىقتارىن قالت جىبەرمەي قاداعالاپ وتىرامىن. ۇستازدارىمنىڭ باعىت- باعدارى، اتا-انامنىڭ قولداۋى ارمانىما جەتۋىمە قاناتتاندىرادى»، دەيدى داير.

ايتا كەتەيىك، تالابىمەن تانىلعان كەيىپكەرىمىزدىڭ بۇل ونەرتابىسى الماتىدا وتكەن بايقاۋدان ۇزدىك شىققان. داير بۇعان دەيىن كوز جانارىنان ايرىلعان جاندارعا ارناپ اقىلدى تاياق پەن برايل الىپبيىنە نەگىزدەلگەن پەرنەتاقتانى دا ويلاپ تاپقان ەدى. بۇل قۇرىلعىلاردى مۇمكىندىگى شەكتەۋلى جانداردىڭ وزدەرى سىناقتان وتكىزىپ، وتە قاجەت دۇنيە ەكەنىن ايتقان.