وقۋشىنى جەزوكشەلىككە ماجبۇرلەۋ: جەڭگەتايلىق دەرەگى بويىنشا تاعى ءبىر سوت ۇكىمى شىقتى

قىزىلوردا. KAZINFORM - قىزىلوردا قالاسىنىڭ № 2 سوتىندا كامەلەتكە تولماعاندى جەزوكشەلىكپەن اينالىسۋعا تارتۋمەن ۇشتاسقان جەڭگەتايلىق فاكتىسى بويىنشا تاعى ءبىر قىلمىستىق ءىس قارالدى.

بۇل قىلمىستىق ءىس جابىق سوت وتىرىسىندا قارالدى. سوتتالۋشى ا. كامەلەتكە تولماعاندى بىرنەشە رەت جەزوكشەلىكپەن اينالىسۋعا ماجبۇرلەۋ ارقىلى جەڭگەتايلىق فاكتىسى بويىنشا قىلمىستىق ىسكە تارتىلعان.

سوتتا ول جابىرلەنۋشىنىنىڭ كامەلەت جاسىنا تولماعانىن بىلە تۇرا، پايداكۇنەمدىك ماقساتتى كوزدەپ، ونى بىرنەشە رەت جەزوكشەلىكپەن اينالىسۋعا تارتقانى انىقتالدى. ونىڭ كىناسى وقيعا ورنىن قاراپ- تەكسەرۋ، بەتتەستىرۋ جۇرگىزۋ حاتتامالارىمەن، جابىرلەنۋشىنىڭ جاۋاپتارىمەن دالەلدەندى. پروكۋرور سوتتالۋشىنى كىنالى دەپ تانىپ، ق ر قىلمىستىق كودەكسى 55-بابىنىڭ 2-بولىگىن قولدانا وتىرىپ، 4 جىل مەرزىمگە باس بوستاندىعىنان ايىرۋدى، 5 ميلليون تەڭگە مورالدىق زيان ءوندىرۋ جونىندە تالاپ قويۋدى ءىشىنارا قاناعاتتاندىرۋدى سۇرادى. جابىرلەنۋشى جانە ونىڭ وكىلدەرى سوتتالۋشىنى كىنالى دەپ تانىپ، ونىڭ كامەلەتكە تولماعان بالاسىنىڭ بولۋىنا بايلانىستى باس بوستاندىعىنان ايىرۋ جازاسىنىڭ تومەنگى مولشەرىن تاعايىنداۋدى سۇرادى.
قورعاۋشى سوتتالۋشىنى ق ر قىلمىستىق كودەكسىنىڭ 309-بابى 2-بولىگى 2)، 3) - تارماقتارى بويىنشا قىلمىس قۇرامىنىڭ بولماۋىنا وراي اقتاۋ جونىندە پىكىرىن ءبىلدىردى.

كودەكستىڭ اتالعان بابىنىڭ سانكسياسى 3 جىلدان 7 جىلعا دەيىن باس بوستاندىعىنان ايىرۋ جازاسىن كوزدەيدى. كودەكستىڭ 53-بابىنا سايكەس، ءىس بويىنشا جازانى جەڭىلدەتەتىن ءمان-جايلار رەتىندە بۇرىن سوتتالماعاندىعى جانە جاس بالاسىنىڭ بولۋى تانىلادى. اۋىرلاتاتىن ءمان- جايلار ايىپتاۋ اكىسىندە كورسەتىلمەگەن. ق ر قىلمىستىق كودەكسىنىڭ 55-بابىنىڭ 2-بولىگىنىڭ 2) تارماعىنا ساي، جازانى جەڭىلدەتەتىن ءمان- جايلار بولعان جانە اۋىرلاتاتىن ءمان- جايلار بولماعان كەزدە، جازا مەرزىمى ق ك- ءتىڭ ءتيىستى بابىندا كوزدەلگەن ەڭ جوعارى مەرزىمنىڭ 2/3-نەن اسىرۋعا بولمايدى دەلىنگەن. سوت ۇكىمىمەن سوتتالۋشى ق ر قىلمىستىق كودەكسىنىڭ 309-بابى 2-بولىگىنىڭ 2)، 3) - تارماقتارى بويىنشا كىنالى دەپ تانىلدى. وعان 4  جىل مەرزىمگە باس بوستاندىعىنان ايىرۋ جازاسى تاعايىندالدى. مورالدىق زياندى ءوندىرۋ تۋرالى تالاپ قويۋ ءىشىنارا قاناعاتتاندىرىلدى.

ەسكە سالا كەتەيىك، قىزىلوردادا سىنىپتاسىن جەزوكشەلىكپەن اينالىسۋعا ماجبۇرلەگەن وقۋشىلار كۇدىككە ىلىنگەنىن جازعان بولاتىنبىز.

ارتىنشا قىزىلوردادا كەلەڭسىزدىككە جول بەرگەندەر قىزمەتىنەن كەتتى.

كەيىن ق ر ءى ءى م جابىرلەنۋشى تۇراتىن اۋماقتى تاۋلىك بويى كۇزەتتى.

عاني بەيسەمبايەۆ وقۋشىنى جەزوكشەلىككە ماجبۇرلەۋ داۋىنا قاتىستى پىكىر ءبىلدىردى.

تەرگەۋ ءجۇرىپ جاتقاندا قىزىلوردادا وقۋشىنى جەزوكشەلىككە ماجبۇرلەگەن 8 كۇدىكتى قامالدى.

كەيىنىرەك وقۋشىنى جەزوكشەلىككە ماجبۇرلەۋگە قاتىستى 13 ادام انىقتالدى.