وقۋشىلارعا «ءبىرتۇتاس تاربيە» باعدارلاماسى نە ءۇشىن كەرەك
استانا. KAZINFORM - ەلىمىزدە «ءبىرتۇتاس تاربيە» باعدارلاماسى بىلتىردان بەرى مەكتەپ باعدارلاماسىنا ەنگىزىلگەن. باعدارلامانىڭ ماقساتى جايلى وقۋ-اعارتۋ ءمينيسترى عاني بەيسەمبايەۆ ايتىپ بەردى.
«جاستاردى رۋحاني- ادامگەرشىلىككە تاربيەلەۋ مەملەكەت پەن جالپى قوعامدى دامىتۋدىڭ باسىم باعىتى. بىلتىردان باستاپ بارلىق ءبىلىم بەرۋ ۇيىمدارىندا ء«بىرتۇتاس تاربيە» باعدارلاماسى ەنگىزىلە باستاعانى بەلگىلى. بيىل ناۋرىزدا وتكەن ۇلتتىق قۇرىلتايدا مەملەكەت باسشىسى بەلگىلەپ بەرگەن مىندەتتەرگە سايكەس اتالعان باعدارلاما جاڭارتىلدى»، - دەدى عاني بەيسەمبايەۆ ۇكىمەت وتىرىسىندا.
ءمينيستردىڭ مالىمدەۋىنشە، جاڭارتىلعان باعدارلاما «ادىلەتتى قازاقستان - جاۋاپتى ازامات - پروگرەسسيۆتى ۇلت» ترياداسى شەڭبەرىندە ادامگەرشىلىگى جوعارى، ادال جانە تابىستى تۇلعانى تاربيەلەۋگە باعىتتالعان.
«جاڭارتىلعان باعدارلاما شەڭبەرىندە وڭ قۇندىلىقتار مەن ساپالى قۇزىرەتتەردى قالىپتاستىرۋعا باعىتتالعان ءبىلىم بەرۋ جانە تاربيە جوبالارىن، الەۋمەتتىك پراكتيكالاردى ىسكە اسىرۋ جۇمىستارى جالعاسادى»، - دەيدى ۆەدومستۆو باسشىسى.
ەسكە سالا كەتەيىك، 2022 -جىلى قازاقستاندا ءبىلىم بەرۋ ۇيىمدارىنداعى ءبىرتۇتاس تاربيە بەرۋ تۇجىرىمداماسى ازىرلەنەتىنى بەلگىلى بولدى.
