وقۋشىلار كوكتەمگى كانيكۋلدا نەشە كۇن دەمالادى؟
استانا. KAZINFORM - ءۇشىنشى توقساننىڭ اياقتالۋىنا ساناۋلى كۇندەر قالدى. كوكتەمگى كانيكۋل كەزەڭى 2025 -جىلدىڭ 21-ناۋرىزى مەن 2025 -جىلدىڭ 31-ناۋرىزىن قوسا العاندا ون ءبىر كۇنگە جالعاسادى.
وقۋ-اعارتۋ مينيسترلىگى باسپا ءسوز قىزمەتىنىڭ مالىمەتىنشە، مەكتەپ وقۋشىلارىنىڭ كوكتەمگى دەمالىستاعى بوس ۋاقىتىن ءتيىمدى وتكىزۋ جانە جەكە تۇلعالىق قاسيەتتەرىن دامىتۋ ماقساتىندا «ءبىرتۇتاس تاربيە» باعدارلاماسى اياسىندا ءىس-شارالار جوسپارى جاسالدى. سونداي-اق 1-4، 5-9 جانە 10-11-سىنىپ وقۋشىلارىنا ارنالعان گايدبۋك ازىرلەندى. وندا ءار دەمالىس كۇنى ناۋرىزنامانىڭ ون كۇندىگىمەن بايلانىستى جانە قوعامنىڭ ماڭىزدى اسپەكتىلەرىنە: وتباسىلىق قۇندىلىقتارعا، مادەنيەتكە، ۇلتتىق داستۇرلەرگە، قايىرىمدىلىققا، سپورتقا ءمان بەرىلدى. ول بويىنشا مەكتەپتەردە ءبىرقاتار ءبىلىم بەرۋ، سپورتتىق، مادەني جانە شىعارماشىلىق ءىس-شارالار وتكىزۋ جوسپارلانعان:
• تەاتر فەستيۆالدەرى مەن قويىلىمدارى؛
• شەبەرلىك ساباقتارى؛
• قاۋىپسىزدىك ساباقتارى؛
• مۇراجايلارعا، عىلىمي ورتالىقتارعا جانە تاريحي ەسكەرتكىشتەرگە تانىمدىق ەكسكۋرسيالار؛
• سپورتتىق ويىندار؛
• قايىرىمدىلىق اكسيالارى جانە باسقا دا شارالار.
- ەڭ باستىسى - بالالاردىڭ قاۋىپسىزدىگىن قامتاماسىز ەتۋ. وسى ماقساتتا اتا-انالارمەن بىرگە جول-كولىك جاراقاتتارىنىڭ الدىن الۋعا، مەكتەپتىڭ ىشكى ءتارتىبىن ساقتاۋعا، بالالاردىڭ كوشەدەگى قاۋىپسىزدىگىنە، ۇيدەگى ءورت قاۋىپسىزدىگى جانە كيبەرقاۋىپسىزدىككە ەرەكشە نازار اۋدارىلادى، - دەلىنگەن مينيسترلىك حابارلاماسىندا.
ايتا كەتەيىك، بۇل ءىس-شارالار ءبىلىم بەرۋ ۇيىمدارىنا ادىستەمەلىك ۇسىنىم رەتىندە جولدانادى.
بۇعان دەيىن پەتروپاۆلدىق وقۋشى بالالاردىڭ وي-ءورىسىن دامىتاتىن ماتەماتيكالىق ويىن جاساپ شىققانىن جازعان ەدىك.
