وقۋشىلار 6 ميلليون تەڭگەگە دەيىن ءبىرجولعى تولەم الا الادى

استانا. قازاقپارات - ءماجىلىس دەپۋتاتتارى ءبىلىم جانە مادەنيەت ماسەلەلەرى جونىندەگى زاڭ جوباسىنا تۇزەتۋلەر ازىرلەدى. بۇل تۇزەتۋلەردە حالىقارالىق عىلىمي جوبالار بايقاۋىنىڭ جۇلدەگەرلەرىنە ءبىرجولعى تولەم بەرۋ، جوعارى وقۋ ورىندارىنىڭ كەيبىر تۇلەكتەرىن گرانتتى وتەۋدەن بوساتۋ جانە كەيبىرەۋلەرى ءۇشىن گرانتتى وتەۋدى كەيىنگە قالدىرۋ سەكىلدى ماسەلەلەر قاراستىرىلعان. جاڭا زاڭنامالىق نورمالار تۋرالى قۇجاتتى ازىرلەۋشىلەردىڭ ءبىرى، دەپۋتات اسحات ايماعامبەتوۆ باياندادى.

گرانتتى وتەۋدەن كىمدەر بوساتىلادى؟

قازاقستاندا مەملەكەت ەسەبىنەن جوعارى ءبىلىم العاندار مىندەتتى تۇردە گرانتتى وتەيتىنى تۋرالى نورما بار. وسى زاڭ جوباسىن ازىرلەۋ كەزىندە دەپۋتاتتار قازاقستاندىقتاردىڭ ءوتىنىشىن ەسكەرىپ، اتا-انا اتانعان نەمەسە مۇگەدەكتىگى بار بالالاردى تاربيەلەپ وتىرعان جوعارى وقۋ ورىندارىنىڭ تۇلەكتەرىن وقۋ بىتىرگەننەن كەيىن گرانتتى مىندەتتى تۇردە وتەۋدەن بوساتۋدى ۇسىنعان. اسحات ايماعامبەتوۆتىڭ ايتۋىنشا، عىلىم جانە جوعارى ءبىلىم مينيسترلىگى بۇل نورمانى قولداعان.

«مۇگەدەكتىگى بار بالالاردى تاربيەلەپ وتىرعان تۇلەكتەر از ەمەس. مۇنداي كەزدە ادامنىڭ جاعدايى باسقا ەكەنى تۇسىنىكتى. سوندىقتان مەملەكەت مۇنداي ادامدارعا جاعداي جاساۋى كەرەك سياقتى. ءبىز باستاما كوتەردىك، ۇكىمەت بۇل باستامانى قولدادى. ەندى مەملەكەتتىك گرانت بويىنشا وقىعان تۇلەكتىڭ مۇگەدەكتىگى بار بالاسى بولسا، وعان گرانتتى وتەمەۋگە مۇمكىندىك بەرەمىز، ول گرانتتى وتەۋدەن بوساتىلادى»، - دەدى ايماعامبەتوۆ.

I- توپتاعى مۇگەدەكتىگى بار ادامدارعا كۇتىم جاسايتىن قازاقستاندىقتاردى دا گرانتتى وتەۋدەن بوساتۋ ۇسىنىلىپ وتىر.

سونداي-اق، دەپۋتات شەتەلدىك جوعارى وقۋ ورىندارىنا رەزيدەنتۋراعا، ماگيستراتۋراعا، اسپيرانتۋراعا، دوكتورانتۋراعا وقۋعا تۇسكەندەردىڭ جانە وقۋىن اياقتاعانداردىڭ گرانتتى وتەۋ بويىنشا مەرزىمىن كەيىنگە قالدىرۋدى ۇسىندى.

«باكالاۆرياتتا وقىپ، كەيىن شەتەلگە ماگيستراتۋراعا تۇسكەندەر ساناتىن قوسۋدى دا ۇسىندىق، كەيىنگە قالدىرۋعا مۇمكىندىك بەرەيىك. ەگەر ول ماگيستراتۋرادا ەكى جىل وقىسا، گرانتتى وتەۋ مەرزىمىن وسى 2 جىلعا كەيىنگە قالدىرامىز»، - دەپ ءتۇسىندىردى دەپۋتات.

وقۋشىلارعا ارنالعان ءبىرجولعى تولەم
بىلتىر پرەزيدەنت قاسىم-جومارت توقايەۆ دارىندى بالالاردى قولداۋعا جانە ولاردى دامىتۋعا شاقىردى. ءماجىلىس دەپۋتاتتارى دارىندى بالالاردى قولداۋ ءۇشىن حالىقارالىق عىلىمي جوبا بايقاۋلارىنىڭ جەڭىمپازدارىنا ءبىرجولعى تولەم ەنگىزۋدى ۇسىندى.

مۇنداي بايقاۋلاردىڭ جەڭىمپازدارى ءۇشىن ەڭ جوعارى تولەم مولشەرى - شامامەن 6 ميلليون تەڭگە. سونىمەن قاتار، ولاردى دايىنداعان مۇعالىمدەردى دە ىنتالاندىرۋ ۇسىنىلدى.

«سپورتتا وليمپيادا جەڭىمپازدارىنا شامامەن 250 مىڭ دوللار بەرەدى. سول سەكىلدى حالىقارالىق عىلىمي جوبالار مەن پاندىك وليمپيادالاردىڭ جەڭىمپازدارى دا قازاقستان ءۇشىن ماڭىزدى ەكەنىنە سەنىمدىمىز. بۇل - ءبىز بۇرىن قابىلداعان نورمانىڭ لوگيكالىق جالعاسى. بىلتىر مىناداي زاڭ قابىلدادىق: حالىقارالىق عىلىمي جوبالاردا جوعارى ناتيجەلەرگە قول جەتكىزگەن وقۋشىلار جوعارى وقۋ ورنىنا ۇ ب ت تاپسىرماي-اق گرانتقا تۇسۋگە جانە «بولاشاق» ستيپەندياسىنا ۇمىتكەر بولۋعا مۇمكىندىك الدى. بۇگىن ايتىلىپ وتىرعان نورما - سوڭعى قادام»، - دەدى اسحات ايماعامبەتوۆ.