وقۋ- اعارتۋ ءمينيسترى الماتىدا زورلىق- زومبىلىق كورگەن بالانى قورعاۋعا قاتىستى پىكىر ايتتى

الماتىدا جەكەمەنشىك مەكتەپتىڭ وقۋشىسى زورلانعانى تۋرالى بالانىڭ اناسى ءمالىم ەتكەن بولاتىن. وسى ماسەلەگە قاتىستى وقۋ- اعارتۋ ءمينيسترى عاني بەيسەمبايەۆ پىكىر ءبىلدىردى، دەپ حابارلايدى قازاقپارات ءتىلشىسى.

«بۇل ماسەلە وقۋ- اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ تولىققاندى باقىلاۋىندا تۇر. قازىر قىلمىستىق ءىس ءجۇرىپ جاتىر. سونىڭ ناتيجەسىنە بايلانىستى ناقتى جاۋاپ بولادى دەپ سانايمىز. اتاپ ايتقاندا، بالاعا، اتا- اناعا ءتيىستى قولداۋ كورسەتۋ جاعىنان اتالعان كوميتەت جەرگىلىكتى باسقارمامەن بىرگە جۇمىستاردى ۇيلەستىرىپ جاتىر»، - دەدى ع. بەيسەمبايەۆ سەناتتا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، وسى ماسەلەگە قاتىستى جەرگىلىكتى بالالاردىڭ قۇقىعىن قورعاۋ وكىلدىگى جانە باسقا دا ءتيىستى قوعامدىق ۇيىمدار تارتىلعان.

سونىمەن قاتار تىلشىلەر «بالاعا قاتىستى بۇل وقيعا مەكتەپ دارەتحاناسىندا بولعان با؟» دەپ سۇرادى.

ءوز كەزەگىندە مينيستر بۇل اقپاراتتى ناقتىلاۋ كەرەك ەكەنىن ايتتى.

«تەرگەۋ جۇمىستارى اياقتالعاننان كەيىن ناقتى ءمان- جايدى بىلەتىن بولامىز»، - دەدى ع. بەيسەمبايەۆ.

بۇعان دەيىن الماتى تۇرعىنىنىڭ 1-سىنىپتاعى بالاسىنىڭ زورلانعانىن مالىمدەگەنى تۋرالى حابارلاعان ەدىك.

كەيىن وسى وقيعاعا بويىنشا قىلمىستىق ءىس قوزعالدى.