ونلاين ساۋدا: بازارلار مەن دۇكەندەردىڭ داۋرەنى ءوتىپ بارا ما

استانا. KAZINFORM - ونلاين ساۋدا قىزىپ، بازارلار توقىراۋدىڭ از- اق الدىندا تۇر. سوندىقتان ساتۋشىلار كوشتەن قالماي جاپپاي الەۋمەتتىك جەلى ارقىلى تاپسىرىس قابىلداۋعا كوشە باستادى. ءبىراق، تەلەفونمەن تاپسىرىس بەرەمىز دەپ سان سوعىپ قالىپ جاتقاندار دا بار.

элеткронды сауда
Коллаж: Kazinform

بۇرىن بۇل بازار قۇج- قۇج قايناپ جاتاتىن. قازىر ساۋدا جاساۋشىلار سانى ەداۋىر ازايعان. جۇرت سابىلىپ بازار ارالاعىسى كەلمەيدى. ونىڭ ورىنا قوسىمشا ارقىلى تاپسىرىس بەرە سالعان ءتيىمدى دەپ ەسەپتەيدى. سوندىقتان، بازارداعىلار دا الەۋمەتتىك جەلىنىڭ كومەگىمەن كاسىبىن دوڭگەلەتۋگە كوشكەن.

- كوبىنەسە ادامدار ۋاقىت جوعالتىپ دۇكەنگە بارعىسى كەلمەيدى. وزىمىزدە ءدال سولايمىز. سوندىقتان، ونلاين ساۋدانى مەن دە قولعا الىپ جاتىرمىن. بىزگە كليەنتتەر ۆاتساپتان جازادى. ءبىز ولارعا جاۋاپ بەرەمىز ءارى جەتكىزۋ قىزمەتىن دە ۇسىنامىز، - دەيدى ساتۋشى نازگۇل قادىربەكوۆا.

Назгүл Қадырбекова
Фото: видеодан алынған скрин

ەلەكتروندى ساۋدانىڭ وڭتايلى تۇستارىن تۇرعىندار دا راستايدى.

- ءجيى تاپسىرىس بەرىپ تۇرامىن. ءتىپتى ازىق- تۇلىكتى دە ۇيگە دەيىن الدىرامىن. سەبەبى، جۇمىستان كەش كەلىپ، استانانىڭ «كەپتەلىسىمەن» دۇكەنگە بارىپ ۇلگەرمەيمىز. جەتكىزۋ قىزمەتى كوڭىلدەن شىعادى. الاتىن زاتتارىمنىڭ دا ساپاسى جاقسى. ەڭ ءبىرىنشى باسقا دا تۇتىنۋشىلار قالدىرعان پىكىرلەردى وقيمىن. سودان كەيىن عانا شەشىم قابىلدايمىن، - دەيدى قالا تۇرعىنى ارۋجان دۇيسەن قىزى.

- ونلاين ساۋدا - ۋاقىت ۇنەمدەۋگە جاقسى. العان تاۋارىڭىزدى ءتىپتى ۇيگە دەيىن اكەلىپ بەرەدى. باعاسى دا قالتاعا سالماق سالمايدى، - دەيدى استانانىڭ تاعى ءبىر تۇرعىنى.

سان سوعىپ قالاتىندار بار

ءبىراق، بۇل جەردە الاياقتاردىڭ ارباۋىنا ءتۇسىپ، قاراجاتتى قاپىدا قولدى قىلىپ الۋىڭىز دا مۇمكىن. ونلاين ساۋدادان وپىق جەگەن جانداردىڭ ءبىرى گۇلنار جولجاقسەنوۆا ساتىپ العان كويلەگىنىڭ جىرتىق ەكەنىن دالەلدەي الماي ءبىراز جۇرگەن.

- ەكىنشى توپتاعى مۇگەدەكپىن. بازارعا بارعاننان گورى، ونلاين تاپسىرىس بەرە سالعان ىڭعايلى ماعان. ەندى جاڭاعى كويلەكتى قايتادان اپارساق، ساتۋشى «كويلەكتىڭ جىرتىعى بولعان جوق» دەپ مويىنداماي قويدى. سوسىن نە ىستەرىمدى بىلمەي قالدىم. كويلەكتىڭ باعاسى شامامەن 30 مىڭنان جوعارى. بىرگە تۇراتىن كورشىم تۇتىنۋشىلار قۇقىعىن قورعاۋ ۇيىمىنا حابارلاسۋ تۋرالى كەڭەس بەردى. بىردەن قوڭىراۋ شالىپ، ءمان- جايدى ءتۇسىندىردىم. قازىر تۇيتكىلدى ءتۇيىن شەشىلدى، - دەيدى ول.

Гүлнар Жолжақсенова
Фото: видеодан алынған кадр

ءدال وسى گۇلنار جولجاقسەنوۆا سياقتى الداناتىندار كوپ. ماسەلەن، تۇتىنۋشىلار قۇقىعىن قورعاۋ ۇيىمىنا جىلىنا 40 مىڭنان استام ادام ارىزدانادى. باسىم بولىگى ينتەرنەتتەگى دۇكەندەردىڭ جۇمىسىنا، تاۋاردىڭ ساپاسىنا قاتىستى بولادى. مەديتسينا سالاسىنا قاتىستى شاعىمدار دا كەزدەسەدى. مىسالى، ەسىمىن جاريالاماۋدى وتىنگەن استانا تۇرعىنى بالاسىن ەمدەۋ ءۇشىن الەۋمەتتىك جەلى ارقىلى جەكەمەنشىك مەديتسينالىق ورتالىقتى تابادى. ونلاين كەڭەس العان سوڭ، مەكەمە قىزمەتكەرلەرى الدىن الا تولەم جاساۋ كەرەكتىگى تۋرالى ايتقان. ول ەشقانداي كۇدىككە بوي الدىرماي تولەم جاساپتى. ال، شىن مانىندە ءدال سول ورتالىقتا دەفەكتولوگ مامان جوق بولىپ شىعادى. تاناۋى تاسقا تيگەن بۇل تۇرعىن دا زاڭگەرلەردىڭ كومەگىنە جۇگىنىپتى.

الاياقتارعا الدانباۋ ءۇشىن نە ىستەۋ كەرەك؟

ءيا، مۇنداي جاعدايدا ءبىرىنشى كەزەكتە تۇتىنۋشىلاردىڭ قۇقىعىن قورعاۋ ۇيىمىنا جۇگىنۋ كەرەك. حابارلاسىپ، بولعان جاعدايدى باياندايسىز. ەكىنشىدەن ساتۋشىمەن اراداعى حابار الماسۋدى وشىرمەۋ كەرەك. ونلاين ساۋدا جاساعانىڭىزدى دالەلدەيتىن ايعاقتار رەتىندە كەرەك بولادى.

سونداي-اق ونلاين ساۋدا جاسار الدىندا مىناداي دەرەكتەرگە كوز جەتكىزىپ الۋ كەرەك:

- ماركەتپلەيس دەگەن - ۇلكەن ەلەكتروندى ساۋدا ورتالىعى. تەك ينتەرنەتتە ورنالاسادى. وندا مىندەتتى تۇردە تاۋار ساتىپ جاتقان كاسىپكەردىڭ مەكەنجايى كورسەتىلۋى كەرەك. ناقتى دۇكەنى بولۋى كەرەك. سوندا قورىقپاي الا بەرەسىز. نەگە؟ سەبەبى، العان تاۋارىڭىزدى قايتىپ بەرۋگە، قاجەتتىلىك تۋىنداسا سوتقا بەرۋ ءۇشىن مەكەنجايىن بىلەسىز. سودان كەيىن مىندەتتى تۇردە ونلاين ساۋدا جاسايتىن دۇكەننىڭ الەۋمەتتىك جەلىدەگى پاراقشالارىن ىزدەپ كورىڭىز. ەگەر وقىرمانى مەن جازىلعان پىكىرلەر سانى نەعۇرلىم كوپ بولسا، وندا ول دۇكەن ادال جۇمىس ىستەيتىندىگىنە سەنۋگە بولادى، - دەيدى ق ر تۇتىنۋشىلار قۇقىعىن قورعاۋ ۇيىمى ءتوراعاسىنىڭ ورىنباسارى تۇرسىن جاعىپاروۆا.ازاماتتاردىڭ زاڭدى جەتىك بىلمەيتىندىگىن «پىسىقتار» پايدالانىپ كەتىپ جاتادى. بۇل رەتتە زاڭگەرلەر ءبىرقاتار كەڭەس ايتادى.

- بارلىق تۇتىنۋشىعا ايتارىم، «ونلاين دۇكەندەرگە 10-20 مىڭ ۇتىلدىم، ەشتەڭە ەتپەيدى» دەپ نەمقۇرايلى قاراۋعا بولمايدى. كەز كەلگەن دۇنيەنى الاردا سول تاۋار تۋرالى تولىق اقپاراتتى ىزدەۋ كەرەك. ساتۋشى كىم؟ مەكەنجايى قانداي؟ باسقا ساتىپ الۋشىلار ول تۋرالى نە ايتىپتى؟ جاعىمسىز پىكىرلەر جوق پا؟ ساپالى تاۋار ارزان بولۋى مۇمكىن ەمەس. ال، جالعان سايتتاردا سۇرانىسقا يە تاۋارلاردىڭ كوشىرمەسى كوپ كەزدەسەدى، - دەيدى تۇرسىن جاعىپاروۆا.

ساۋدا جانە ينتەگراتسيا مينيسترلىگىنىڭ مالىمەتىنە سايكەس، 2020 -جىلى ەلەكتروندى ساۋدا اينالىمىنداعى ءتۇسىم 476,7 ميلليارد تەڭگەدەن اسقان. بىلتىر 3 تريلليون تەڭگەگە جەتكەن، ياعني نارىق 4 جىلدا 5 ەسەدەي ۇلعايعان. بۇل - بارلىق بولشەك ساۋدانىڭ 15 پايىزى. ال ونىڭ % 72,4 ى ماركەتپلەيستەرگە تيەسىلى.

بۇعان دەيىن ساۋدا جانە ينتەگراتسيا ءمينيسترى ارمان شاققاليەۆ الداعى جىلدارى ەلەكتروندى كوممەرتسيانىڭ كولەمى 8,3 تريلليونعا دەيىن وسەتىنى تۋرالى بولجام ايتقان بولاتىن.

 

سوڭعى جاڭالىقتار