گونكونگتا نەيروحيرۋرگتەرگە كومەكتەسەتىن جاساندى ينتەللەكت مودەلى جاسالدى

استانا. KAZINFORM - قىتاي عىلىم اكادەمياسى جانىنداعى گونكونگتاعى جاساندى ينتەللەكت جانە روبوتوتەحنيكا ورتالىعى نەيروحيرۋرگتەرگە كومەكتەسەتىن جاساندى ينتەللەكت (ج ي) قۇرالىن تانىستىردى. بۇل تۋرالى ت ا س س اقپارات اگەنتتىگى جازدى.

South China Morning Post باسىلىمىنىڭ حابارلاۋىنشا، CARES Copilot 1.0 جاساندى ينتەللەكت ۇلگىسى دارىگەرلەرگە كۇردەلى مي وپەراتسيالارى كەزىندە كومەكتەسۋگە ارنالعان. ورتالىق باسشىسى ليۋ ءحۋنبيننىڭ ايتۋىنشا، قۇرال نەيروحيرۋرگتەرگە «ءتيىمدى كلينيكالىق دياگنوستيكا جۇرگىزۋگە جانە انىقتامالىق ماتەريالداردىڭ جەتكىلىكتى سانىنا نەگىزدەلگەن مەديتسينالىق قورىتىندىلار جاساۋعا» كومەكتەسەدى.

CARES Copilot 1.0 Meta Platforms ازىرلەگەن ۇلكەن Llama 2 ءتىل ۇلگىسىنە نەگىزدەلگەن جانە ماتىندىك اقپاراتتى، كەسكىندەردى، سونداي-اق ماگنيتتىك-رەزونانستى توموگرافيا (م ر ت)، كومپيۋتەرلىك توموگرافيا (ك ت) جانە ۋلترا دىبىستىق بەينەلەۋ ناتيجەلەرىن قوسا، ءارتۇرلى دەرەكقورلاردا وقىتىلعان.

ليۋ حۋنبين اتاپ وتكەندەي، زەرتتەۋشىلەر قۇرالدى مىڭداعان مەديتسينالىق وقۋلىقتارمەن، عىلىمي ماقالالارمەن جانە نەيروحيرۋرگيا بويىنشا حالىقارالىق نۇسقاۋلارمەن قامتاماسىز ەتتى. كلينيكالىق شەشىم قابىلداۋ پروتسەسى كومپيۋتەرلىك توموگرافيا، م ر ت، پاتسيەنتتىڭ فيزيولوگيالىق تەستىلەۋ قورىتىندىلارى جانە ت. ب. سياقتى ءارتۇرلى اقپاراتقا نەگىزدەلگەن.

«ءبىز دارىگەرلەردىڭ ج ي ارقىلى وپەراتسيا كەزىندە جاقسى جۇمىس ىستەگەنىن، دۇرىس شەشىم قابىلداعانىن قالايمىز»، - دەپ قوستى عالىم.

ماتەريالدا كورسەتىلگەندەي، CARES Copilot 1.0 گونكونگ پەن قۇرلىقتىق قىتايداعى كەيبىر مەديتسينالىق مەكەمەلەردە ىشكى سىناقتان ءوتتى. ليۋ حۋنبيننىڭ ايتۋىنشا، مودەل دارىگەرلەردىڭ جۇمىس پروتسەسىنە حيرۋرگيالىق جوسپارلاردى جانە وتالاردان كەيىنگى باسقارۋدى دايىنداۋعا كومەكتەسۋ ءۇشىن ەنگىزىلگەن.