وندىرىستەگى ادامداردىڭ ءولىمى ءالى دە ازايماي وتىر - سەنات ءتوراعاسى
استانا. KAZINFORM - توتەنشە وقيعالاردىڭ 44 پايىزى قاراعاندى، ۇلىتاۋ جانە شىعىس قازاقستان وبلىستارىنا تيەسىلى. بۇل تۋرالى سەنات ءتوراعاسى ماۋلەن اشىمبايەۆ ءمالىم ەتتى.
- ەڭبەك نارىعىن دامىتۋدىڭ 2029 -جىلعا دەيىنگى تۇجىرىمداماسىندا ساپالى جۇمىس ورىندارىن قۇرۋعا باسىمدىق بەرىلگەن. بۇل تۇراقتى جۇمىسپەن قامتۋدى، لايىقتى جالاقىنى، الەۋمەتتىك قولداۋدى جانە قاۋىپسىز ەڭبەك جاعدايلارىن قامتيدى. وسى باعىتتاردا الداعى ۋاقىتتا كوپتەگەن جۇمىس اتقارىلۋى قاجەت. سونىمەن قاتار، ءاربىر جۇمىس ورنى ءونىمدى بولۋى كەرەك ەكەنىن دە ۇمىتپاعانىمىز ابزال. الايدا، 2023 -جىلى قازاقستاندا ەڭبەك ونىمدىلىگى شامامەن 25 مىڭ دوللاردى نەمەسە ساعاتىنا شامامەن 13 دوللاردى قۇرادى. سالىستىرۋ ءۇشىن ەكونوميكالىق ىنتىماقتاستىق جانە دامۋ ۇيىمىنا مۇشە ەلدەردە بۇل كورسەتكىش ساعاتىنا شامامەن 67 دوللار ەكەنىن اتاپ وتكەن ءجون. دەمەك، وسى ەلدەردەگى جۇمىسكەرلەردىڭ ونىمدىلىگى بىزدەن بەس ەسە ارتىق دەگەندى وسى تسيفرلار كورسەتەدى، - دەدى م. اشىمبايەۆ سەناتتاعى «ەڭبەك ادامى - ۇلتتىق ەكونوميكانىڭ ءوسۋى مەن ەل وركەندەۋىنىڭ نەگىزى» تاقىرىبىنا ارنالعان پارلامەنتتىك تىڭداۋدا.
ونىڭ ايتۋىنشا، ءوندىرىس تيىمدىلىگى ارتپاي، جالاقىنىڭ جاي ءوسۋى ۇزاقمەرزىمدى ەكونوميكالىق تيىمدىلىكتى قامتاماسىز ەتپەيدى. جۇمىسشىلار تابىسىنىڭ تۇراقتى وسۋىنە جاعداي جاسايتىن وندىرىستىك كورسەتكىشتەردى جاقسارتۋعا دا باسا ءمان بەرگەن ءجون. سونىڭ ىشىندە زاماناۋي تەحنولوگيالاردى ەنگىزۋ جانە تسيفرلاندىرۋدىڭ ماڭىزى زور.
- وسى سالاداعى ماڭىزدى مىندەتتەردىڭ تاعى ءبىرى - وندىرىستەگى قاۋىپسىزدىكتى قامتاماسىز ەتۋ. وكىنىشكە قاراي، ەلىمىزدە وندىرىستەگى ادامداردىڭ جاراقاتتانۋى مەن ءولىمى ءالى دە ازايماي وتىر. جاقىندا ۇلىتاۋ وبلىسىنداعى «جومارت» كەنىشىندە بولعان قايعىلى جاعداي سوعان دالەل. 2021-2023 -جىلدارى جازاتايىم وقيعالاردىڭ سانى ايتارلىقتاي ارتقان. ولاردىڭ 80 پايىزدان استامى ءىرى جانە ورتا ونەركاسىپ ورىندارىندا بولعان. توتەنشە وقيعالاردىڭ 44 پايىزى قاراعاندى، ۇلىتاۋ جانە شىعىس قازاقستان وبلىستارىنا تيەسىلى. دەسەك تە، قازىرگى تاڭدا بارلىق قاجەتتى زاڭنامالىق بازا بار. ءتيىستى زاڭداردى دەپۋتاتتار ۋاقتىلى قابىلداپ كەلەدى. بىلتىر مەملەكەتتىك ەڭبەك ينسپەكتسياسى ەڭبەك جانە حالىقتى الەۋمەتتىك قورعاۋ مينيسترلىگىنىڭ قۇرىلىمىنا اۋىستىرىلدى. وسى رەتتە، زاڭنامالاردىڭ ورىندالۋىن باقىلاۋدى كۇشەيتۋ، الدىن الۋ شارالارىن كەڭەيتۋ جانە جۇمىس بەرۋشىلەردىڭ جاۋاپكەرشىلىگىن ارتتىرۋ اسا ماڭىزدى ەكەنىن اتاپ وتكەن ءجون. بۇل باعىتتا بيزنەس، ەڭبەك ينسپەكتسياسى جانە ونەركاسىپتىك قاۋىپسىزدىك باسقارمالارى تاراپىنان بەلسەندى جۇمىس جۇرگىزىلۋگە ءتيىس دەپ ەسەپتەيمىز، - دەدى سەنات ءتوراعاسى.
بۇدان بۇرىن حابارلانعانداي، م. اشىمبايەۆ قازاقستانعا تەحنيكالىق جانە كاسىپتىك ءبىلىمى بار 900 مىڭعا جۋىق مامان قاجەت ەكەنىن ايتتى.
اۆتور
رۋسلان عابباسوۆ
