گوندۋراستىڭ ەكس-پرەزيدەنتى ءومىر بويىنا سوتتالۋى مۇمكىن

استانا. KAZINFORM - گوندۋراستىڭ بۇرىنعى پرەزيدەنتى حۋان ورلاندو ەرناندەس نيۋ-يوركتە ەسىرتكى ساتۋشىلارمەن ءسوز بايلاسقانى ءۇشىن كىنالى دەپ تانىلدى، دەپ جازادى Euronews.

ول ءومىر بويىنا باس بوستاندىعىنان ايىرىلۋى مۇمكىن.

گوندۋراستىڭ بۇرىنعى پرەزيدەنتى حۋان ورلاندو ەرناندەس ەسىرتكى ساتۋشىلارمەن كەلىسىپ، توننالاعان كوكايندى ا ق ش-قا كەدەرگىسىز كىرگىزۋ ءۇشىن ءوزىنىڭ اسكەري جانە ۇلتتىق پوليتسياسىن پايدالانعان.

مۇنداي ۇكىمدى نيۋ-يورك فەدەرالدى سوتىندا القابيلەر سوتى شىعاردى.

بۇل ايىپ بويىنشا ەڭ تومەنگى جازا - 40 جىلعا باس بوستاندىعىنان ايىرۋ، ال ەڭ قاتا جازا - ءومىر بويىنا سوتتاۋ.

ۇكىم 26-ماۋسىمدا شىعادى، ءبىراق ەرناندەستىڭ ادۆوكاتى سابرينا شروفف اپەللياتسيالىق شاعىم بەرەتىنىن مالىمدەدى.

ءوز كەزەگىندە پروكۋرور دەميان ۋيليامس ءوز مالىمدەمەسىندە ايىپتاۋ ۇكىمى «وسىعان ۇقساس جولمەن جۇرگىسى كەلەتىن بۇكىل جەمقور ساياساتكەرلەرگە ەسكەرتۋ بولادى» دەپ ۇمىتتەندى.

ول ەرناندەستىڭ «ءوزى تۋىپ-وسكەن گوندۋراستىڭ ءومىرىن جارقىن جاققا وزگەرتۋگە بۇكىل مۇمكىندىگى بولعانىن» ايتتى.

«ونىڭ ورنىنا ءوز ۇستانىمى مەن ەلىن جەكە باسىنىڭ پايداسىنا پايدالانىپ، الەمدەگى ەڭ ءىرى جانە قاتىگەز ەسىرتكى ساتاتىن ۇيىمدارمەن سىبايلاستى».

55 جاستاعى ەرناندەس ەكى مەرزىم بويى گوندۋراس پرەزيدەنتى بولدى - 2014 -جىلدان 2022 -جىلعا دەيىن.

ول ەل استاناسى تەگۋسيگالپاداعى ۇيىندە قىزمەتىنەن كەتكەننەن كەيىن ءۇش ايدان كەيىن قاماۋعا الىنىپ، سول جىلى ساۋىردە ا ق ش-قا ەكستراديتسيالاندى.

امەريكالىق پروكۋرورلار ەرناندەستى 2004 -جىلدان بەرى ەسىرتكى ساتۋشىلارمەن ىنتىماقتاستى دەپ ايىپتاعان. ءسويتىپ ميلليونداعان پارا الىپ، اۋىل كونگرەسسمەنىنەن ۇلتتىق كونگرەسس پرەزيدەنتىنە، سودان كەيىن ەلدەگى ەڭ جوعارى لاۋازىمعا دەيىن كوتەرىلدى دەپ مالىمدەدى.

سوتتا ايتقان وزىندە ەرناندەس ەسىرتكى باروندارىنان اقشانى گوندۋراستىڭ بارلىق دەرلىك ساياسي پارتيالارى العانىن مالىمدەدى، ءبىراق ءوزى المادىم دەدى.

ايتۋىنشا، ونىڭ ايىپتاۋشىلارى ءوز قىلمىسىن جاسىرۋعا تىرىسىپ، بار ايىپتى وسىعان جاپقان.

«ولاردىڭ بارىندە وتىرىك ايتۋعا موتيۆاتسيا بار، ولار - كاسىبي وتىرىكشىلەر»، - دەدى ەرناندەس.

سوت وتىرىسىندا كۋاگەرلەردىڭ قاتارىندا ەسىرتكى ساتۋشىلار دا بولدى.

ولار ونداعان كىسى ولىمىنە وزدەرى جاۋاپتى ەكەنىن مويىندادى جانە ەرناندەس الەمدەگى ەڭ ىقپالدى كوكاين ديلەرلەرىن ەرەكشە ىنتامەن قورعادى دەپ مالىمدەدى. ونىڭ ىشىندە ا ق ش-تا ءومىر بويىنا سوتتالعان اتاقتى مەكسيكالىق ەسىرتكى يەسى حواكين «ەل چاپو» گۋزمان دا بار.