ون كۇندە وتباسىنىڭ شىرقىن بۇزعان 337 ازامات قاماۋعا الىندى
استانا. KAZINFORM - ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ وتباسىنىڭ شىرقىن بۇزعان اگرەسسورلار قايتالاپ زاڭ بۇزىپ جاتقانىن ايتتى.
«قۇقىقتىق ءتارتىپ» اتتى 10 كۇندىك جەدەل- پروفيلاكتيكالىق ءىس-شارانىڭ قورىتىندىلارىن ءمالىم ەتكەن رەسمي وكىل وتباسىلىق زورلىق-زومبىلىق فاكتىلەرىنە توقتالدى.
«سونىمەن قاتار، كوشى-قون زاڭناماسىنىڭ ساقتالۋىنا باقىلاۋ كۇشەيتىلدى. 29 مىڭ جالدامالى پاتەر مەن پوليتسيا ەسەبىندە تۇرعان، شارتتى تۇردە سوتتالعان 74 مىڭ ادام تەكسەرىلدى. اكىمشىلىك قاداعالاۋ ءتارتىبىن بۇزۋدىڭ 90 فاكتىسى انىقتالدى. قۇقىق بۇزۋشىلىققا قايتا جول بەرگەندەر قاماۋعا الىندى. قورعاۋ نۇسقاماسىنا قاراماستان، وتباسىندا زورلىق-زومبىلىق جاساعان 337 اگرەسسور قاماۋعا الىندى»، - دەدى ول.
شىڭعىس الەكەشەۆ ءىس-شارا كەزىندە 61 مىڭنان استام قۇقىق بۇزۋ فاكتىسى تىركەلگەنىن اتاپ ءوتتى. ونىڭ ىشىندە قوعامدىق ءتارتىپتى بۇزۋدىڭ 18 مىڭ فاكتىسى انىقتالعان.
«ۋاقىتشا بەيىمدەۋ ورتالىقتارى مەن مەديتسينالىق ايىقتىرعىشتارعا 5 مىڭ ادام جەتكىزىلدى. كوشەدە جانە ويىن-ساۋىق ورىندارىندا زاڭدى وكىلدەرىنسىز تۇنگى ۋاقىتتا بولعان 7 مىڭعا جۋىق كامەلەتكە تولماعان بالا انىقتالدى. ولاردىڭ اتا- انالارىنا قاتاڭ ەسكەرتۋ جاسالدى»، - دەدى ءىىم رەسمي وكىلى.
اۆتور
ەسىمجان ناقتىباي
