ون جىلعا سوتتالۋى مۇمكىن: شىمكەنتتە جالعان پوليتسەيلەر ۇستالدى

شىمكەنت. KAZINFORM - شىمكەنتتە ۇيىمداسقان قىلمىسقا قارسى كۇرەس ءبولىنىسىنىڭ قىزمەتكەرلەرى قالا تۇرعىندارىنا كۇش قولدانۋ ارقىلى ۇلكەن كولەمدەگى قاراجاتتى اشىق تۇردە يەمدەنگەن ءۇش ەر ادامدى ۇستادى، دەپ حابارلايدى Polisia.kz.

«قاسكۇنەمدەر پوليتسيا قىزمەتكەرلەرىنىڭ اتىن جامىلىپ، تۇراقتى تۇردە اقشا بوپسالاۋمەن اينالىسىپ، «قورعاۋعا» الامىز دەپ، اي سايىن تولەم تالاپ ەتكەن. كۇدىكتىلەردىڭ بىرىنەن پوليتسيا قىزمەتكەرىنىڭ جالعان قىزمەتتىك كۋالىگى تاركىلەندى. ال ەكىنشى كۇدىكتى الاياقتىق ءۇشىن بۇرىن سوتتالعان بولىپ شىقتى. مۇنداي ارەكەتتەر ءوز مىندەتتەرىن ادال اتقاراتىن ىشكى ىستەر ورگاندارى قىزمەتكەرلەرىنىڭ بەدەلىنە نۇقسان كەلتىرەدى. سوندىقتان ولارعا قاتاڭ تۇردە توسقاۋىل قويىلاتىن بولادى»، - دەدى دەپارتامەنت باستىعى - ءى ءى م رەسمي وكىلى شىڭعىس الەكەشەۆ.
ونىڭ ايتۋىنشا، كۇدىكتىلەردىڭ بارلىعى ۇستالىپ، ۋاقىتشا ۇستاۋ يزولياتورىنا قامالدى. بوپسالاۋ، توناۋ جانە بيلىك وكىلى اتاعىن ءوز بەتىنشە يەمدەنىپ الۋ فاكتىلەرى بويىنشا قىلمىستىق ءىس قوزعالدى.

قازىر ولاردىڭ وسىعان ۇقساس باسقا قىلمىستارعا قاتىسى بار-جوعى تەكسەرىلىپ جاتىر. قاسكويلەر 10 جىلعا دەيىن باس بوستاندىعىنان ايىرىلۋى مۇمكىن.
بۇعان دەيىن شىمكەنت پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جەدەل ءىس-شارالار بارىسىندا ەسىرتكى زاتتارىن وتكىزۋمەن اينالىسىپ جۇرگەن الماتى تۇرعىنىن قۇرىقتاعانىن جازعان ەدىك.