ون ايدا ماشينا جاساۋ سالاسىنداعى ءوندىرىس كولەمى 27 پايىز ءوستى
ق ر پرەمەر-ءمينيسترى ءاليحان سمايىلوۆ قازاقستان ماشينا جاساۋشىلار وداعىنىڭ باسقارما ءتوراعاسى مەيرام پىشەمبايەۆپەن كەزدەستى، دەپ حابارلايدى Kazinform ق ر ۇكىمەتىنىڭ باسپا ءسوز قىزمەتىنە سىلتەمە جاساپ.
كەزدەسۋدە ماشينا جاساۋدى دامىتۋدىڭ 2024-2028 -جىلدارعا ارنالعان كەشەندى جوسپارىن جۇزەگە اسىرۋدىڭ نەگىزگى باعىتتارى تالقىلاندى. ءاليحان سمايىلوۆ ماشينا جاساۋ سالاسىنداعى ءوندىرىستىڭ ءوسۋ قارقىنىنا وڭ باعا بەرە وتىرىپ، قابىلدانعان قۇجاتتىڭ ماڭىزدىلىعىن اتاپ ءوتتى.
ونىڭ ايتۋىنشا، كەشەندى جوسپاردى جۇزەگە اسىرۋ ماشينا جاساۋ سالاسىن عانا ەمەس، تۇتاستاي العاندا ەلىمىزدىڭ وڭدەۋشى ونەركاسىبىن دامىتۋعا ىقپال ەتەدى.
كەشەندى جوسپار 7 باعىت بويىنشا 79 ءىس-شارادان تۇرادى. جوسپاردىڭ ورىندالۋى 2028 -جىلعا قاراي ج ق ق-نىڭ (جالپى قوسىلعان قۇن) 4,5 ەسە، ن ك ي-دىڭ (ناقتى كولەم يندەكسى) 2,2 ەسە، ەكسپورت كولەمىنىڭ 3 ەسە، ينۆەستيتسيا كولەمىنىڭ 1,5 ەسەگە ءوسىمىن قامتاماسىز ەتەدى.
مەيرام پىشەمبايەۆتىڭ ايتۋىنشا، كەشەندى جوسپاردى جۇزەگە اسىرۋ وتاندىق ماشينا جاساۋدى دامىتۋعا ايتارلىقتاي سەرپىن بەرەدى، ءوندىرىس كولەمىن ارتتىرۋعا، ەكسپورتتىق مۇمكىندىكتەردى دامىتۋعا، سونداي-اق ينۆەستيتسيا تارتۋعا جانە بىلىكتى كادرلاردى دايارلاۋ جۇيەسىن جەتىلدىرۋگە ىقپال ەتەدى.
«كەشەندى جوسپاردى جۇزەگە اسىرۋ بۇگىنگى تاڭداعى باسىمدىعىمىز جانە مىندەتىمىز. بەلگىلەنگەن نىسانالى ينديكاتورلاردىڭ ساپالى ورىندالۋىن قامتاماسىز ەتۋ جانە وتاندىق ماشينا جاساۋ سالاسىن ودان ءارى جاڭعىرتۋ ءۇشىن بار كۇش-جىگەرىمىزدى سالامىز»، - دەدى قازاقستان ماشينا جاساۋشىلار وداعىنىڭ باسشىسى.
ماشينا جاساۋ 37 تارماقتى قامتيتىن جانە ەكونوميكانىڭ بارلىق دەرلىك سالالارىن جابدىقتارمەن قامتاماسىز ەتەتىن ەڭ جوعارى تەحنولوگيالى سالا ەكەنىن ايتا كەتكەن ءجون. سالاداعى ءبىر جۇمىس ورنى شەكتەس سالالاردا 8-10 جۇمىس ورنىن پايدا بولۋىنا الىپ كەلەدى.
2022 -جىلدىڭ قورىتىندىسى بويىنشا ەلىمىزدىڭ ماشينا جاساۋ سالاسىنداعى ءوندىرىستىڭ فيزيكالىق كولەمى 11 پايىزعا وسسە، 2023 -جىلدىڭ 10 ايىندا 27 پايىزعا ءوسىم كورسەتتى. 2023 -جىلدىڭ قاڭتار- قازان ايلارى ارالىعىندا 3,3 تريلليون تەڭگەگە ءونىم ءوندىرىلدى.
ەسكە سالايىق، مەملەكەت باسشىسى 2023 -جىلعى 1-قىركۇيەكتەگى جولداۋىندا ماشينا جاساۋ يندۋستريالىق ءوسۋدىڭ درايۆەرى بولىپ تابىلاتىن وڭدەۋشى ونەركاسىپتى ۇدەمەلى دامىتۋدى باستى مىندەتتەردىڭ ءبىرى رەتىندە بەلگىلەگەن بولاتىن. ماشينا جاساۋ سالاسىن ودان ءارى جاڭعىرتۋ ەل ەكونوميكاسىن ءارتاراپتاندىرۋ مەن يندۋستريالاندىرۋعا جاڭا سەرپىن بەرەدى.
اۆتور
ەربول جانات
