پوليتسەيلەر وزەننىڭ مۇزى ويىلعاندا سۋعا ءتۇسىپ كەتكەن ەكى ادامدى قۇتقارىپ قالدى
اتىراۋ وبلىسىندا شارون وزەنىنىڭ مۇزى ويىلىپ، 64 جاستاعى ايەل سۋعا ءتۇسىپ كەتكەن. ونى قۇتقارۋعا ۇمتىلعان ەر ادام دا مۇز ويىعىنا قۇلاعان. ولاردى پوليتسيا قىزمەتكەرلەرى قۇتقارىپ قالدى، دەپ حابارلايدى Kazinform.
اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ اقپاراتىنا سۇيەنسەك، وقيعا 25-جەلتوقساندا قۇرمانعازى اۋدانىندا بولعان.
«جەرگىلىكتى ۋاقىتپەن كەشكى ساعات 19:20 شاماسىندا قۇرمانعازى اۋدانىندا 64 جاستاعى ايەل شارون وزەنىنىڭ كەلەسى جاعالاۋىنا وتپەك بولعان. الايدا مۇز ويىلىپ، زەينەتكەر سۋعا ءتۇسىپ كەتكەن. اۋداندىق پوليتسيا بولىمىنە تۇسكەن حاباردى ەستىگەن تاربيە جانە كادر بولىمشەسىنىڭ ينسپەكتورى رومان ناسيحان جەكە اۆتوكولىگىمەن وقيعا ورنىنا جەتكەن. ول اۆتوكولىكتەن ارقان الىپ، مۇز ۇستىنە شىققان. سول ساتتە كومەككە كەلگەن وزگە ەر ادام مۇز ويىعىنا ءتۇسىپ كەتكەن»، - دەپ حابارلادى دەپارتامەنتتىڭ باسپا ءسوز قىزمەتى.
وقيعا ورنىنا جەتكەن پاترۋلدىك پوليتسيا ءبولىمىنىڭ قىزمەتكەرلەرى ارتۋر كاريموۆ، نۇرحات زۇلقاروۆ، ادىلبەك تەمىربولات، جاندوس يباتۋللايەۆ، اماندىق ايدىناليەۆ پەن ۋچاسكەلىك پوليتسيا ينسپەكتورى دارحان امانعاليەۆ وزەنگە قۇلاعان ايەل مەن ەر ادامدى قۇتقارىپ قالعان. ولارعا 28 جاستاعى جىگىت كومەكتەسكەن. جۇقا مۇز ۇستىنە ءبىر ۋاقىتتا 10 عا جۋىق ادام شىققان ساتتە مۇز ويىعى ۇلكەيگەن.
پوليتسيا اعا لەيتەنانتى رومان ناسيحان شارون وزەنىنەن قۇتقارىلعان ايەل مەن ەر ادامدى جەدەل-جاردەم بريگاداسىن كۇتپەي، جەكە كولىگىمەن اۋداندىق اۋرۋحاناعا جەتكىزدى. قازىر 64 جاستاعى ايەل ادام دارىگەردىڭ باقىلاۋىنا الىندى.
