پوليتسيادا وتباسىنداعى زورلىق-زومبىلىقپەن كۇرەس جونىندەگى ارناۋلى بولىمشە قۇرىلادى
ەلوردادا وتباسىنداعى زورلىق-زومبىلىقتىڭ الدىن الۋ ماسەلەسىنە ارنالعان بريفينگ ءوتتى، دەپ حابارلايدى Kazinform.
استانالىق پوليتسيا دەپارتامەنتىنىڭ ايەلدەردى زورلىق-زومبىلىقتان قورعاۋ توبىنىڭ اعا ينسپەكتورى ايگەرىم داركەمبايەۆانىڭ ايتۋىنشا، تۇرمىستاعى زورلىق-زومبىلىقتىڭ قايتالانۋىن بولدىرماۋ ماقساتىندا 2023 -جىلدىڭ 12 ايىندا سوتتا 6595 اكىمشىلىك ءىس قارالعان. وتباسىندا جانجال شىعاراتىندارعا قاتىستى 9090 نۇسقاما شىعارىلىپ، سوتتىڭ شەشىمىمەن قۇقىق بۇزۋشىنىڭ مىنەز-قۇلقىنا 582 ەرەكشە تالاپ قويىلعان.
«ايەلدەردى زورلىق-زومبىلىقتان قورعاۋ توبىنىڭ قىزمەتكەرلەرى «قورعاۋ نۇسقاماسى» شىعارىلعان تۇلعالاردى قاداعالاۋ تاجىريبەسىن ەنگىزدى. «قيىن ومىرلىك جاعدايداعى جەكە تۇلعالار مەن وتباسىلاردى قولداۋدىڭ ىقپالداستىق ورتالىعى» ماماندارى مەن ۋچاسكەلىك ينسپەكتورلار بىرلەسىپ 5 وتباسىنا الەۋمەتتىك-قۇقىقتىق جانە پسيحولوگيالىق كومەك كورسەتتى. سونىمەن قاتار، پيلوتتىق رەجيمدە ODARA جۇيەسىن پايدالانا وتىرىپ، تۇرمىستاعى زورلىق-زومبىلىق قاۋپىن باعالاۋدىڭ حالىقارالىق تەتىگى ەنگىزىلدى. ونىڭ كومەگىمەن ۇ ە ۇ پسيحولوگتارىن تارتا وتىرىپ، اگرەسسورلارمەن جۇمىس جۇرگىزىلىپ، تۇرمىستىق سالادا قىلمىس جاساۋعا بەيىم تۇلعالار انىقتالدى»، - دەدى ءا. داركەمبايەۆا.
ءوز كەزەگىندە استانا اكىمدىگىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ مۇشەسى بايان تويكەبايەۆا بىلتىر ەلىمىزدە وتباسىنداعى زورلىق-زومبىلىق ءۇشىن جازا كۇشەيتىلگەنىن ايتتى.
«ەندى پوليتسيا قىزمەتكەرلەرى جابىرلەنۋشىنىڭ شاعىمىنسىز ءىس قوزعاي الادى، ال ەرلى-زايىپتىلار تاتۋلاسۋ ءۇشىن سوتقا ءبىر رەت قانا بارا الادى. پرەزيدەنت قاسىم-جومارت توقايەۆ رەسپۋبليكالىق گازەتكە بەرگەن سۇحباتىندا قۇقىق بۇزۋشىلار ءۇشىن جازانى قاتاڭداتۋ تۋرالى تاعى دا ايتتى. ىشكى ىستەر مينيسترلىگىندە بيىل قۇقىق قورعاۋ ورگاندارىنىڭ ايەل-قىزمەتكەرلەرىن بارىنشا تارتا وتىرىپ، تۇرمىستاعى زورلىق-زومبىلىققا قارسى كۇرەس جونىندەگى مامانداندىرىلعان بولىمشە قۇرىلادى. داعدارىس ورتالىقتارىنىڭ سانى ۇلعايادى، وتباسىنداعى زورلىق-زومبىلىققا بايلانىستى قىلمىستاردىڭ الدىن الۋ باعىتىندا الەۋمەتتىك-پسيحولوگيالىق تۇزەتۋ پراكتيكاسى ەنگىزىلەدى»، - دەيدى ب. تويكەبايەۆا.
اۆتور
رۋسلان عابباسوۆ
