پوليتسيا قىزمەتكەرى ماس كۇيدە كولىك جۇرگىزگەن

كوكشەتاۋ. KAZINFORM - ماس كۇيىندە رۋلگە وتىرىپ، كولىك باسقارعان اقمولالىق پوليتسيا قىزمەتكەرىنە قاتىستى تارتىپتىك سيپاتتاعى قاتاڭ شارا قولدانىلادى. بۇل تۋرالى اقمولا وبلىسى پوليتسيا دەپارتامەنتىنىڭ باسپا ءسوز قىزمەتى تۇسىنىك بەردى.

ۆەدومستۆونىڭ مالىمەتىنشە، ماس كۇيىندە رۋلگە وتىرعان پوليتسيا قىزمەتكەرى جاۋاپقا تارتىلعان.

«قازىرگى ۋاقىتتا قىزمەتتىك تەرگەۋ ءجۇرىپ جاتىر. سونىڭ قورىتىندىسى بويىنشا تارتىپتىك سيپاتتاعى قاتاڭ شارالار قابىلداناتىن بولادى، ءتىپتى ىشكى ىستەر ورگاندارىنداعى جۇمىسىنان دا قۋىلۋى مۇمكىن»، - دەپ ءتۇسىندىردى ۆەدومستۆودان.

ايتا كەتسەك، بۇدان بۇرىن الەۋمەتتىك جەلىدە استانا قالاسىندا اقمولا وبلىسى پ د ۇيىمداسقان قىلمىسپەن كۇرەس باسقارماسىنىڭ ءبولىم باستىعى، پوليتسيا پودپولكوۆنيگى قايرات جانايەۆتىڭ ماس كۇيىندە اۆتوكولىك باسقارعان جەرىندە ۇستالعانى جاريالانعان ەدى.

اۆتور
اسلان وسپانوۆ