پوليتسيا باستىعىنىڭ قىزىمىن: جەلىدە دورەكى مىنەز كورسەتكەن قىزدىڭ ۆيدەوسى تارادى

الماتى. KAZINFORM - الەۋمەتتىك جەلىدە كوشەدە دورەكى مىنەز كورسەتكەن قىزدىڭ ۆيدەوسى تارادى. بەينەجازبادان قىز بەن جىگىتتىڭ كوشەدە جۇرگەنىن كورۋگە بولادى.

ءبىر كەزدە بويجەتكەن اكەسى قاراساي اۋدانىنىڭ باسشىسى ەكەنىن ايتىپ، ايعايلاي باستايدى.

«سەن مەنىڭ اكەمنىڭ كىم ەكەنىن بىلەسىڭ بە؟ قاراساي اۋدانىنىڭ باستىعى. اۋداندىق ىشكى ىستەر باسقارماسى»، - دەپ باقىردى ول ۆيدەونى ءتۇسىرىپ تۇرعان ادامعا.

الماتى وبلىستىق پوليتسيا دەپارتامەنتى ۆيدەوداعى جايتقا تۇسىنىك بەردى.

«بۇل جاعداي الماتى وبلىسى اۋماعىندا بولعان جوق. سونىمەن قاتار، بەينەجازباداعى قىزدىڭ سوزدەرى شىندىققا جاناسپايدى. ول اۋداندىق پوليتسيا باسقارماسى باستىعىنىڭ قىزى ەمەس، ونىڭ بالالارىنىڭ ەڭ ۇلكەنى نەبارى 7 جاستا»، - دەدى الماتى وبلىسى پ د ءبولىم باسشىسى ەرنار سايديلدين.

بەلگىلى بولعانداي، ۆيدەو الماتى كوشەلەرىنىڭ بىرىندە تۇسىرىلگەن.

«المالى اۋداندىق پوليتسيا باسقارماسىنىڭ قىزمەتكەرلەرى قۇقىق بۇزۋشىلارعا ق ر زاڭناماسىنا سايكەس شارا قابىلدادى. ولارعا قاتىستى قوعامدىق ورىندا ماس كۇيىندە ءجۇرۋ جانە تىنىشتىقتى بۇزۋ دەرەكتەرى بويىنشا اكىمشىلىك ماتەريالدار جينالدى. ماس ەر ادام مەديتسينالىق ايىقتىرعىشقا جەتكىزىلدى»، - دەپ حابارلادى الماتى پوليتسيا دەپارتامەنتىنىڭ باسپا ءسوز قىزمەتىنەن.

اۆتور
الما مۇقانوۆا