پوليسيا الاياقتىقتىڭ جاڭا تۇرلەرى تۋرالى ەسكەرتتى

استانا. KAZINFORM -بيىل 10 ايدا 17 مىڭنان استام ينتەرنەت-الاياقتىق تىركەلگەن. بۇل تۋرالى Polisia.kz جازدى.

مينيسترلىكتىڭ مالىمىەتىنشە، ەڭ كوپ تاراعان ءتاسىل - سايتتاردا، الەۋمەتتىك جەلىلەر مەن مەسسەندجەرلەردە حابارلاندىرۋ ورنالاستىرۋ ارقىلى جاسالاتىن ينتەرنەت- ساۋدا. الاياقتار تاۋار نەمەسە قىزمەت ءۇشىن تومەن باعا كورسەتىپ، الدىن الا تولەم نەمەسە تولىق تولەم سۇرايدى. جىل باسىنان بەرى وسىنداي 6216 قىلمىس تىركەلگەن.

الاياقتاردىڭ قۇربانى بولماۋ ءۇشىن:

- تەكسەرىلگەن جارناما سايتتارىن پايدالانىڭىز؛

- تاۋاردى العاننان كەيىن عانا تولەم جاساۋ تۋرالى كەلىسىڭىز؛

- تاۋاردىڭ بار ەكەنىنە كوز جەتكىزىڭىز.

ازاماتتار كۇماندى بروكەرلىك كومپانيالار مەن ينۆەستيتسيالىق جوبالارعا ينۆەستيتسيا سالۋ ارقىلى اقشانى تەز كوبەيتۋدىڭ ءتۇرلى سحەمالارىنا تاپ بولىپ وتىر. 1957 قازاقستاندىق تۇرعىن وسىنداي جۇيەنىڭ قۇربانى بولدى. ولار ءوز اقشالارىن «جوق» ينۆەستيتسيالىق جوبالارعا سالعان. ءتىپتى، بۇل ءۇشىن نەسيە العاندار دا بار.

الاياقتار ءىرى كومپانيالاردىڭ، سونىڭ ىشىندە ۇلتتىق كومپانيالاردىڭ، بانكتەردىڭ، كريپتوبيرجالاردىڭ اتىنان جالعان سايتتار قۇرۋ ارقىلى ازاماتتاردى قىزىقتىرادى. بۇل رەتتە «مەنەدجەرلەرمەن» جانە «بروكەرلەرمەن» بارلىق قارىم-قاتىناس ونلاين رەجيمدە وتەدى. قاسكويلەر ۇلكەن قارجىنى تارتۋ ءۇشىن ديۆيدەندتەردى ءبىر رەت تولەۋدى دە جۇزەگە اسىرادى.

«ءجيى كەزدەسەتىن تاعى ءبىر ءادىس - بانكتەر، قۇقىق قورعاۋ جانە باسقا دا مەملەكەتتىك ورگانداردىڭ قىزمەتكەرلەرىنىڭ اتىنان جاسالاتىن تەلەفون قوڭىراۋلارى. قازىر شەتەلدەن جاسالعان الاياقتىق قوڭىراۋلاردى بايلانىس وپەراتورلارى تانىپ، بۇعاتتايدى»، - دەلىنگەن حابارلامادا.

اتالعان جۇيە ىسكە قوسىلعان ساتتەن باستاپ 63 مىڭنان استام قوڭىراۋ توقتاتىلدى. قازىر نەگىزىنەن sim-box قۇرىلعىسىنىڭ كومەگىمەن شەتەلدىك نومىرلەردەن جانە WhatsApp-تا قوڭىراۋ شالۋ ارقىلى جاسالعان الاياقتىقتار تىركەلۋدە. اعىمداعى جىلى مۇنداي 4391 قىلمىس جاسالدى.

ءى ءى م كيبەرقىلمىستاردىڭ الدىن الۋعا جانە ولاردى اشۋعا باعىتتالعان شارالار قابىلداپ كەلەدى. بانكتەرمەن بىرلەسىپ ازاماتتاردىڭ شوتتارىنىڭ ساقتالۋىن قامتاماسىز ەتۋ جانە زاڭسىز كرەديتتەردى رەسىمدەۋدىڭ جولىن كەسۋ بويىنشا جۇمىستار جۇرگىزىلۋدە.

بايلانىس وپەراتورلارىمەن فرود- قوڭىراۋلارعا قارسى ءىس- قيمىل تۋرالى مەموراندۋمدار جاسالدى. وسىنداي كەلىسىمدەرگە حابارلاندىرۋ سايتتارىمەن جانە ساركا IT كومپانياسىمەن (كيبەرشابۋىلداردى تالداۋ جانە تەرگەۋ ورتالىعى) قول قويىلدى. بارلىق وڭىرلەردە ينتەرنەت- الاياقتىقتاردى تەرگەۋ بويىنشا «كيبەرپول» مامانداندىرىلعان توپتارى قۇرىلىپ، جۇمىس اتقارۋدا. ۆەدومستۆو شەتەلدىك ارىپتەستەرمەن دە ءوزارا ءىس- قيمىلدى كۇشەيتىپ وتىر.

- سونداي-اق ءبىز ساقتىق شارالارى تۋرالى حالىقتى اقپاراتتاندىرۋ بويىنشا اۋقىمدى جۇمىس جۇرگىزىپ جاتىرمىز. تەك اعىمداعى جىلى ب ا ق- تا پروفيلاكتيكالىق سيپاتتاعى 10,5 مىڭنان استام ماتەريال جاريالاندى، - دەپ حابارلاندى مينيسترلىكتە.

الاياقتاردىڭ ايلا- امالدارىنا ءتۇسىپ قالماس ءۇشىن:

- بانكتەر، بروكەرلىك، ينۆەستيتسيالىق كومپانيالار نەمەسە قۇقىق قورعاۋ ورگاندارى قىزمەتكەرلەرىنىڭ كرەديتتەردى رەسىمدەۋ، مۇلىكتى ساتۋ جانە اقشانى قاۋىپسىز شوتتارعا اۋدارۋ تۋرالى «تەلەفون» نۇسقاۋلارىن ەشبىر جاعدايدا ورىنداماڭىز؛

- ەشكىمگە ءوزىڭىزدىڭ دەربەس دەرەكتەرىڭىزدى، بانك كارتالارىنىڭ CVV- كودتارىن، قۇپياسوزدەردى بەرمەڭىز؛

- بوگدە ادامداردىڭ ءوتىنىشى بويىنشا تەلەفونعا قانداي دا ءبىر موبيلدى قوسىمشالاردى ورناتپاڭىز. ولار الاياقتارعا ءسىزدىڭ قۇرىلعىڭىزعا كىرۋگە مۇمكىندىك بەرە الادى؛

- تاۋارلار مەن قىزمەتتەردى ساتىپ الۋ كەزىندە بەلگىسىز جانە تەكسەرىلمەگەن سايتتارعا سەنبەڭىز؛ - كۇماندى ينۆەستيتسيالىق جوبالارعا اقشا سالماڭىز؛

- قوسىمشالاردى ورناتۋ ءۇشىن تەك App Store جانە Play Market سياقتى رەسمي كوزدەردى پايدالانىڭىز؛

- شوتتارىڭىزداعى اقشانىڭ قوزعالىسىن ءجيى تەكسەرىڭىز.