وليمپيادانىڭ اشىلۋ سالتاناتى: استانالىقتار ورتالىق ساياباققا جينالدى
استانا. KAZINFORM - ساناۋلى ساتتەن سوڭ پاريج وليمپياداسى 2024 سالتاناتتى تۇردە اشىلادى. Jibek Joly تەلەارناسى ەلوردا تۇرعىندارى مەن قوناقتارى ءۇشىن اۋقىمدى شارانى تىكەلەي ترانسلياتسيادا ۇسىنادى. كورەرمەننىڭ ءبىر پاراسى بىرلەسە تاماشالاۋ ءۇشىن ورتالىق ساياباققا جينالدى.
ەلوردانىڭ ورتالىق ساياباعىندا ناعىز مەرەكەلىك قاربالاس. استانا اكىمدىگىنىڭ قولداۋىمەن ۇلكەن ەكران ورناتىلعان. قازىر استانالىقتار Jibek Joly تەلەارناسىنىڭ ۇيىمداستىرۋىمەن وليمپيادانىڭ اشىلۋ سالتاناتىنا وراي اشىق اسپان استىندا كونسەرت تاماشالاپ جاتىر.
«وليمپيادانى وتباسىمىزبەن كورەمىز، ارينە، ءوزىمىزدىڭ سپورتشىلارعا جانكۇيەر بولامىز. پاريج وليمپياداسىنا جەرلەسىم اسلانبەك شىمبەرگەنوۆ اتتاندى. جەرلەسىمىز 71 كەلىدە باعىن سىنايدى، ساتتىلىك تىلەيمىن. بۇگىن وليمپيادانىڭ اشىلۋ ءراسىمىن تاماشالاۋعا وتباسىممەن كەلىپ وتىرمىن. كونسەرت وتەتىنى تۋرالى الەۋمەتتىك جەلىدەن ءبىلدىم»، - دەيدى ەلوردا تۇرعىنى سەرىكباي ناۋرىزحان.
قازاقستان ەستراداسىنىڭ جۇلدىزدارى دا وسىندا. سونداي-اق، كورەرمەندەر اراسىندا ۇتىس ويناتىلىپ جاتىر.
«مەن سپورتشى ەمەسپىن، ءبىراق سپورتتى ۇناتامىن. اسىرەسە بوكس جانىما جاقىن، سپورتشىلارىمىز قورجىندى التىنعا تولتىرسىن دەگەن تىلەك بىلدىرەمىن. بۇگىنگى كەشكە وتباسىممەن قازاقستاندىق سپورتشىلارعا قولداۋ كورسەتىپ كەلىپ تۇرمىز. وليمپيادانىڭ اشىلۋ سالتاناتىن تاماشالاۋعا ارنايى كەلدىك»، - دەدى استانالىق قانىبەك احمەتوۆ.
ايتا كەتەيىك، Jibek Joly تەلەارناسى پاريج وليمپياداسىنىڭ اشىلۋ سالتاناتىن جانە ويىنداردىڭ ءبىرقاتارىن تىكەلەي ەفيردە كورسەتەتىنى حابارلانعان بولاتىن. تەلەارنا ءەفيرىنىڭ شامامەن 70 پايىزى پاريج وليمپياداسى ويىندارىنا ارنالادى.
وليمپيادا كەستەسىنە سايكەس، تەلەارنا كورەرمەنى ەرتەڭ، 27-شىلدە ساعات 15:00-دە ۇلكەن تەننيستى تاماشالاي الادى. سونداي-اق بۇل ويىندى Abu Dhabi Plaza ويىن- ساۋىق جانە ساۋدا ورتالىعى اۋماعىندا LED ەكران ارقىلى كورۋگە دە مۇمكىندىك بولادى. ال ساعات 23:30-دا جۇزۋدەن جارتىلاي فينال جانە فينال وتەدى.
جەكسەنبى (28-شىلدە) كۇنى ساعات 12:30-دا سەمسەرلەسۋ، ساعات 17:10-دا سپورتتىق گيمناستيكادان ەرلەر اراسىندا فينال وتەدى جانە ساعات 22:00-دە سەمسەرلەسۋدەن فينال كورسەتىلەدى.
