وليمپيادادا «ەركەك» بوكسشىمەن جۇدىرىقتاسقان وزبەكستاندىق قىزعا پاتەر سىيعا تارتىلدى

تاشكەنت. KAZINFORM - وليمپيادانىڭ 1/8 فينالىندا گەندەرلىك داۋ تۋىنداعان تايۆان بوكسشىسى لين يۋي-تينگە قارسى جەكپە-جەك وتكىزىپ، جەڭىلىپ قالعان وزبەك قىزى سيتورا تۇردىبەكوۆاعا ءوز ەلىندە ءبىر بولمەلى پاتەر بەرىلدى.

سامارقاند وبلىسى بۇلىڭعىر اۋدانىنىڭ اكىمدىگىنىڭ ناقتىلاۋىنشا، پاتەر جەرگىلىكتى كاسىپكەردىڭ قاراجاتىنا ساتىپ الىنعان.

- جارىس وتە جاقسى ءوتتى. بارىنشا دايىندالدىق، ءبىراق ناتيجە بولمادى. قۇداي قولداپ، الداعى جارىستاردا دا جەڭىسكە جەتەمىز دەپ ۇمىتتەنەمىز، - دەيدى سيتورا تۇردىبەكوۆا.

سپورتشى پاريجدە وتكەن 2024-جىلعى وليمپيادا ويىندارىندا 57 كەلىگە دەيىنگى سالماقتا ءبىرىنشى جەكپە-جەگىن كونگولىق بوكسشىعا قارسى وتكىزىپ، 3:2 ەسەبىمەن جەڭىسكە جەتكەن ەدى. ودان كەيىن 1/8 فينالدا ەكى دۇركىن الەم چەمپيونى، قىتاي تايبەيىنىڭ وكىلى لين يۋي-تينمەن جۇدىرىقتاستى. ودان 5:0 ەسەبىمەن جەڭىلىپ، وليمپياداعا قاتىسۋىن اياقتادى.

وزبەكستان پرەمەر-ءمينيسترى ابدۋللا اريپوۆ تامىزدىڭ 13 ءى كۇنى وليمپيادا قۇراماسىن رەسمي قارسى الۋ كەزىندە سيتورا تۇردىبەكوۆا مەن لين يۋي-تين اراسىنداعى بوكس كەشى تۋرالى دا ايتىپ ءوتتى.

- كەيبىر سپورتشىلارىمىز ءتۇرلى سەبەپتەرمەن جۇلدەگەر اتانا المادى. بۇعان تورەشىلىكتەگى ادىلەتسىزدىكتەر جانە باسقا دا سەبەپتەر تۇرتكى بولدى. بۇل جولعى ويىنداردىڭ ەڭ سوراقىسى، مەنىڭ ويىمشا، بارلىق ادامدارعا ۇناماعان تۇسى - بۇل ەرلەردىڭ رينگكە «ايەل» بولىپ شىعۋى، - دەدى وزبەكستان ۇكىمەتىنىڭ باسشىسى.

ايتا كەتەيىك، لين يۋي-تين فينالدا پولشالىق يۋليا سەرەمەتانى جەڭىپ، التىن مەدالعا قول جەتكىزدى.