وليمپياداعا بارار الدىندا الماتىدا جاتتىعۋ وتكىزەمىز - بالۋان مەيرامبەك قارتباي

балуан Мейрамбек Қартбай
Фото: Алтынай Сағындықова

 اقتوبە. KAZINFORM - اقتوبەلىك بالۋان مەيرامبەك قارتباي بىرەر كۇن بۇرىن عانا پاريج وليمپياداسىنا جولداما الدى. ول قازىر داعىستانداعى وقۋ-جاتتىعۋ جيىنىندا ءجۇر. بالۋان Kazinform تىلشىسىنە شاعىن سۇحبات بەردى.

- اقتوبە ءۇشىن وسى ايماقتا تۋىپ- وسكەن سپورتشىنىڭ وليمپياداعا جولداما الۋى ۇلكەن جاڭالىق. ءسىز وسى جولداماعا قول جەتكىزۋ جولىندا قانداي بەلەستەردى باعىندىردىڭىز؟

- وليمپياداعا جولداما العانىما وتە قۋانىشتىمىن. 2023 -جىلى سەربيا ەلىندە الەم چەمپيوناتى بولدى. سول الەم چەمپيوناتىندا 6 بەلدەسۋ وتكىزىپ، سوڭعى بەلدەسۋىندە رەسەيلىك بالۋانعا ەسە جىبەردىم. ول بالۋان سول كەزدە ليتسەنزيا الدى. بيىل ول وليمپياداعا بارماعان سوڭ جولداما ماعان بۇيىردى. قازىر ءبىز داعىستاندا وقۋ- جاتتىعۋ جيىنىندا ءجۇرمىز. دايىندىق وتە جاقسى. سوڭعى جاتتىعۋ ءوز ەلىمىزدە، الماتى قالاسىندا وتەدى.

- 2016 -جىلدان بەرى ءبىر سالماقتا، 57 كەلى سالماعىندا كۇرەسىپ ءجۇرسىز. ءبىر سالماقتى ۇستاپ تۇرۋ قيىن با؟ الدە ءبىر سالماقتاعى تۇراقتىلىق قارسىلاستى ءجىتى بىلۋگە كومەكتەسە مە؟

- شىنىمەن دە، 2016 -جىلدان باستاپ ءبىر سالماقتى وزگەرتپەدىم. سول سالماقتا كۇرەسىپ ءجۇرمىن. بۇل وڭاي ەمەس. سالماق تاستاۋ، سالماق قۋىپ كۇرەسۋ شىدامدىلىقتى تالاپ ەتەدى. ارمان-ماقساتىمىز ءۇشىن بارلىعىنا توزۋگە تۋرا كەلەدى.

- بۇعان دەيىن وزىڭىزگە جەڭىس اكەلەتىن ەكى ءادىس تۋرالى ايتىپ ەدىڭىز. ءالى دە سولاي ما الدە جاڭا تاسىلدەر بار ما؟

- ءوزىم ۇيرەنگەن، ءساتتى ىسكە اسىرا الاتىن ەكى ءادىسىم بار. بۇل راس. ەشتەڭە دە وزگەرگەن جوق. سونى دامىتىپ، شىڭداپ جاتىرمىز.

- وليمپيادا جولداماسى قولىڭىزدا. قاي ەلدىڭ بالۋاندارى ءسىز ءۇشىن باستى قارسىلاس بولىپ سانالادى؟

- كەز كەلگەن قارسىلاس - مىقتى. ءارقايسىسىنا دايىن بولۋىمىز كەرەك. ەشكىمدى بولە المايمىز. سەبەبى ءار ەلدىڭ ەڭ مىقتىسى عانا وليمپياداعا كەلەدى.

- جەڭىس تىلەيمىز!

ايتا كەتەيىك، مەيرامبەك قارتباي - اقتوبە وبلىسى تەمىر اۋدانىنىڭ تۋماسى. ول كۇرەس ۇيىرمەسىنە 2009 -جىلدان باستاپ قاتىسىپ، كەيىن ەسەت باتىر اتىنداعى مەكتەپ- ينتەرناتتا وقىدى. كەيىن الماتى وبلىسىنداعى رەسپۋبليكالىق سپورت كوللەدجىندە تاجىريبەسىن جەتىلدىردى. 2021 -جىلى قازاقپاراتقا بەرگەن سۇحباتىندا «سپورتشى ءۇشىن ەل تۋىن كوتەرىپ، ءانۇرانىن قوسىلا شىرقاۋ ەڭ ۇلكەن باقىت. الەم چەمپيوناتىندا، وليمپيادادا توپ جارىپ، كوك بايراعىمىزدى بيىككە كوتەرىپ، جەڭىس تۇرعىنىنان كورىنسەم دەپ ارماندايمىن» دەگەن بولاتىن.

اۆتور

التىناي ساعىندىقوۆا

سوڭعى جاڭالىقتار