وليمپيادا چەمپيونى ەلدوس سمەتوۆ ورالدا جاس سپورتشىلارمەن كەزدەستى
ورال. KAZINFORM - ورال قالاسىنا كەلگەن دزيۋدودان پاريج وليمپياداسىنىڭ چەمپيونى ەلدوس سمەتوۆ وليمپيادا رەزەرۆىنىڭ وبلىستىق مامانداندىرىلعان مەكتەپ-ينتەرنات كوللەدجىنىڭ جاس سپورتشىلارىمەن كەزدەستى.
وقۋ ورنىنىڭ ديرەكتورى اسحات شاكىروۆ اتالمىش سپورتتىق ءبىلىم ورداسىنىڭ 20 جىلدىق بەلەسىمەن تۇسپا-تۇس كەلگەن جۇزدەسۋدىڭ ماڭىزى ەرەكشە ەكەندىگىن ايتىپ، ەلدوس سمەتوۆكە العىسىن ءبىلدىردى.
وليمپيادانىڭ التىن، كۇمىس، قولاسىن تۇگەل العان ەلدوس سمەتوۆ ءوزىنىڭ جەڭىسكە جەتۋ جولىنداعى باي تاجىريبەسىمەن ءبولىسىپ، كەزدەسكەن قيىندىق پەن سىناقتاردى قالاي ەڭسەرگەنى تۋرالى اسەرلى اڭگىمەلەپ بەردى.
بەس جاسىندا اعالارىنە ەرىپ، سپورت زالىنا كەلگەن ەلدوس سمەتوۆ تەمىردەي ءتارتىپ پەن تىنىمسىز ەڭبەك جانە جەڭىسكە دەگەن ۇمتىلىستىڭ ارقاسىندا وليمپتىڭ بيىك شىڭىن باعىندىرا ءبىلدى.
- قاي كەزدە دە ماعان وتباسىم، اتا-انام، باۋىرلارىم مىقتى موتيۆاتسيا بەردى. ەڭ الدىمەن وتباسىن سۇيگەن ءار ادام وتانىن دا سۇيەدى. سپورتقا دەگەن ۇمتىلىس، ۇزبەي جاتتىعىپ، شىڭدالۋ، نىق سەنىم جارقىن جەڭىستەرگە جول اشادى. وزدەرىڭنىڭ ارالارىڭنان دا وليمپيادا چەمپيونى شىعادى دەپ ۇمىتتەنەمىن، - دەدى ەلدوس سمەتوۆ.
جۇزدەسۋ بارىسىندا جاس سپورتشىلار سۇراق قويىپ، داڭقتى دزيۋدوشىنىڭ جاۋابىن ەستىدى. سوڭىنان وليمپيادا چەمپيونىنان قولتاڭبا الىپ، ەستەلىك سۋرەتكە ءتۇستى.
- مەن مەكتەپ-ينتەرنات كوللەدجىنىڭ 9-سىنىبىندا وقيمىن، دزيۋدو ءبولىمىنىڭ تاربيەلەنۋشىسىمىن. دزيۋدودان وليمپيادا چەمپيونى ەلدوس سمەتوۆپەن بولعان كەزدەسۋ بىزگە ۇلكەن موتيۆاتسيا بەرىپ، ۇمىتىلماس اسەر قالدىردى. جەڭىمپازدىڭ ءومىر جولى مەن تاباندىلىعى ءبىز ءۇشىن ۇلگى. ەندى مەن دە ءوز الدىما ماقسات قويىپ، سوعان جەتۋ ءۇشىن بار كۇش-جىگەرىمدى جۇمسايمىن. ەلدوس اعامىزدىڭ جولى بىزگە دە بۇيىرسىن، - دەدى نۇرتۋعان مارات.
ساپار بارىسىندا ەلدوس سمەتوۆتى باتىس قازاقستان وبلىسىنىڭ اكىمى ناريمان تورەعاليەۆ قابىلداپ، قۇرمەت كورسەتتى.
كەزدەسۋ بارىسىندا وليمپيادا چەمپيونى ءوڭىردىڭ سپورت سالاسىنداعى جەتىستىكتەرمەن تانىس بولدى. وبلىس اكىمى ەلدوس سمەتوۆكە ساتتىلىك تىلەدى.
- وليمپيادا ويىندارىندا وزىڭە بارشا قازاق ەلى جانكۇيەر بولدى. اسىرەسە، جاستارىمىزدىڭ ۇلگى تۇتار سپورتشىسىنا اينالدىڭ. ءاردايىم ساتتىلىك سەرىك بولسىن! - دەدى ءوڭىر باسشىسى.
ب ق و دزيۋدو فەدەراتسياسىنىڭ پرەزيدەنتى رۋستام شايحيەۆ وليمپيادا چەمپيونىنىڭ بالالار ۇيىنە دە بارىپ، ءوز تارتۋ-تارالعىسىن بەرگەنىن جەتكىزدى.
ەسكە سالا كەتەيىك، بۇدان بۇرىن ەلدوس سمەتوۆتىڭ مەملەكەتتىك قىزمەتكە بارمايتىنى، تاعى ءبىر وليمپياداعا قاتىساتىنى تۋرالى ايتقانىن جازعان بولاتىنبىز.
