وليمپيادا، پاراليمپيادا جانە ۇلتتىق سپورت تۇرلەرى قايتا قاراستىرىلادى
استانا. KAZINFORM - ەلىمىزدە وليمپيادا، پاراليمپيادا، ازيا جانە ۇلتتىق سپورت تۇرلەرى جوعارى جەتىستىكتەر سپورت قاتارىنا كىرەدى. بۇل تۋرالى ق ر پرەمەر- ءمينيستردىڭ ورىنباسارى تامارا دۇيسەنوۆا ءمالىم ەتتى.
«دەنە شىنىقتىرۋ جانە سپورت سالاسىندا مەملەكەت باسشىسى قويعان ماقساتتاردى ورىنداۋ ءۇشىن كەلەسى شارالار قابىلدانادى. الدىمەن سالانى دامىتۋدىڭ ءۇش ساتىلى جۇيەسى قۇرىلادى. ونىڭ ءبىرىنشىسى بۇقارالىق سپورت، كەيىنگى ساتىلارى جوعارى جەتىستىكتەر سپورتىنا قاتىستى. جوعارى جەتىستىكتەر سپورت تۇرلەرى قايتا قاراستىرىلادى. ول تىزىمگە وليمپيادا، ازيا، پاراليمپيادا ويىندارى، سونداي- اق، ۇلتتىق سپورت تۇرلەرى كىرەدى»، - دەدى تامارا دۇيسەنوۆا ۇكىمەت وتىرىسىندا.
ۆيتسە-پرەمەردىڭ ايتۋىنشا، سپورتقا بولىنەتىن قارجىنى ناتيجەلى ءارى ءتيىمدى پايدالانۋ ءۇشىن قارجىلاندىرۋدىڭ جان باسىنا شاققانداعى نورماتيۆى ەنگىزىلەدى.
«سپورت تۇرلەرى بويىنشا جاتتىقتىرۋشىلار مەن سپورتتىق مەديتسينا، فارماكولوگيا، ديەتولوگيا، پسيحولوگيا سالاسىنىڭ ماماندارىن دايىنداۋ جۇيەسى قايتا قاراستىرىلادى. اكىمدىكتەرمەن بىرلەسە وتىرىپ ايماقتارداعى سپورتتىق ينفراقۇرىلىم كەڭەيتىلەدى. بۇل وزگەرىستەر ماجىلىستە قاراستىرىلىپ جاتقان زاڭ جوباسى اياسىندا ەنگىزىلەدى»، - دەيدى ت. دۇيسەنوۆا.
ايتا كەتسەك، كەشە مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا سپورت سالاسىنداعى زاڭنامانى جاڭارتۋدى تاپسىرعان ەدى.
