وليمپيادا-2024. نەلىكتەن ءبارى موڭعوليانىڭ فورماسىنا قىزىعىپ جاتىر؟
استانا. KAZINFORM - جەلىدە موڭعوليا قاتىسۋشىلارىنىڭ وليمپياداعا كيەتىن سپورتتىق كيىمى تاراپ كەتتى.
بۇل جىلى جازعى وليمپيادا پاريجدە وتەدى. وليمپيادا 26-شىلدە باستالىپ، 11-تامىزعا دەيىن سوزىلادى. ازىرگە كورەرمەندەر ءار ەلدىڭ قاتىسۋشىلارىنىڭ فورماسىن مۇقيات قاراپ جاتىر. سەبەبى فورما - قاتىسۋشىلاردىڭ ۆيزيت كارتاسى. سوندىقتان كوستيۋمدەر سپورتشىنىڭ قاي ەلدەن كەلگەنىن جانە سول ەلدىڭ مادەنيەتىن كورسەتە الۋى ءتيىس.
كوپشىلىكتىڭ كوزى موڭعوليانىڭ فورماسىنا ءتۇستى. موڭعوليا سپورتشىلارىنىڭ وليمپياداعا كيەتىن كيىمىنىڭ ديزاينىن Michel & Amazonka برەندى جاساعان. الاۋ، پاريجدەگى قازىرگى ويىنداردىڭ ەمبلەماسى، كۇن مەن اي التىن جىپتەرمەن كەستەلەنگەن.
Michel & Amazonka برەندىنىڭ نەگىزىن قالاۋشى اپكەلى-ءسىڭلى - ميشەل چويگاالاا جانە امازونكا چويگاالاا. برەند موڭعول داستۇرلەرى مەن مادەنيەتىن زاماناۋي ستيلگە كەلتىرىپ شىعارادى. ولار 2022-جىلى بەيجىڭدە وتكەن قىسقى وليمپيادا ويىندارى مەن 2020-جىلى توكيودا وتكەن جازعى وليمپيادا ويىندارىنا دا موڭعوليا قۇراماسىنىڭ فورماسىن تىككەن. ول كەزدە موڭعوليا سپورتشىلارى ءبىر كۇمىس، ءۇش قولا مەدال اكەلدى.
موڭعوليا فورماسىنىڭ بۇل سۋرەتتەرى جەلىدە تاراپ كەتتى جانە ميلليونداعان قارالىم جينادى. وقىرماندار ديزاينەرلەردىڭ شىعارماشىلىق جۇمىسىن جوعارى باعالادى.
