گولوۆكين ۋكراينانىڭ «بىتىمگەر» بازاسىنا ەنگىزىلدى: بۇعان نە سەبەپ بولدى

ءمان-جاي
بۇعان World Boxing ۇيىمىنىڭ رەسەيلىك بوكسشىلارعا قويىلعان شەكتەۋلەردى الىپ تاستاپ، ولاردىڭ حالىقارالىق تۋرنيرلەرگە قايتادان ۇلتتىق تۋى مەن انۇرانىمەن قاتىسۋىنا رۇقسات بەرۋ تۋرالى شەشىمى سەبەپ بولعان.
سايتتا گولوۆكين رەسەيدى قولدادى دەپ ايىپتالعان. سونىمەن قاتار ادامنىڭ «بىتىمگەر» بازاسىنا ەنگىزىلۋى سوت شەشىمى نەمەسە ۋكراينا بيلىگىنىڭ رەسمي ايىپتاۋى بولىپ ەسەپتەلمەيدى.
رەسەيلىك بوكسشىلارعا تۋى مەن ءانۇرانى قايتارىلدى
شەكتەۋلەردىڭ الىنعانىن بۇعان دەيىن رەسەي سپورت ءمينيسترى ءارى رەسەي وليمپيادا كوميتەتىنىڭ باسشىسى ميحايل دەگتياريەۆ حابارلاعان.
ونىڭ ايتۋىنشا، رەسەي بوكس فەدەراتسياسى 2026-جىلدىڭ باسىندا World Boxing ۇيىمىنىڭ تولىققاندى مۇشەسى اتانعان. دەگتياريەۆ سونداي-اق قاڭتاردا تاشكەنتتە وتكەن كەزدەسۋدە رەسەيلىك سپورتشىلاردىڭ حالىقارالىق ارەناعا ورالۋ ماسەلەسىن گولوۆكينمەن تالقىلاعانىن مالىمدەدى.
وسىدان كەيىن رەسەيلىك بوكسشىلار World Boxing تۋرنيرلەرىنە ۇلتتىق رامىزدەرىمەن قاتىسۋ مۇمكىندىگىنە يە بولدى.
بۇل شەشىمنىڭ ماڭىزى زور. سەبەبى ءدال وسى World Boxing ۇيىمىنا وليمپيادا ويىندارىنداعى بوكس جارىستارىن وتكىزۋ وكىلەتى بەرىلگەن.
گولوۆكين World Boxing ۇيىمىن 2025-جىلى باسقاردى
گەننادي گولوۆكين 2025-جىلعى 23-قاراشادا بوريس ۆان دەر ۆورستتىڭ ورنىنا World Boxing پرەزيدەنتى بولىپ سايلاندى. ول بۇل قىزمەتكە ءۇش جىل مەرزىمگە سايلانعان.
2024 -جىلعى اقپاننان بەرى گولوۆكين قازاقستان ۇلتتىق وليمپيادا كوميتەتىن دە باسقارىپ كەلەدى.
World Boxing 2023 -جىلى اۋەسقوي بوكستىڭ جاڭا حالىقارالىق فەدەراتسياسى رەتىندە قۇرىلدى. ۇيىمنىڭ نەگىزگى مىندەتتەرىنىڭ ءبىرى - بوكستى وليمپيادا ويىندارىنىڭ باعدارلاماسىندا ساقتاپ قالۋ.
گولوۆكين نەسىمەن تانىمال؟
گەننادي گولوۆكين - قازاقستاننىڭ ەڭ تانىمال بوكسشىلارىنىڭ ءبىرى. كاسىپقوي سپورتتاعى مانسابىن اياقتاعاننان كەيىن ول سپورتتىق باسقارۋ سالاسىنا اۋىسىپ، حالىقارالىق بوكستاعى نەگىزگى تۇلعالاردىڭ بىرىنە اينالدى.
گولوۆكين سونداي-اق حالىقارالىق بوكس داڭقى زالىنا ەنگەن العاشقى قازاقستاندىق بولدى.
«بىتىمگەر» دەگەن نە؟
«بىتىمگەر» - ۋكرايناداعى ينتەرنەت-رەسۋرس. وندا جوبا اۆتورلارى ۋكراينانىڭ مۇددەلەرىنە قارسى ارەكەتتەرگە قاتىسى بار دەپ ەسەپتەيتىن ادامدار تۋرالى مالىمەتتەر جاريالانادى.
سايت جۇمىس ىستەگەن جىلدار ىشىندە ونىڭ بازاسىنا ساياساتكەرلەر، جۋرناليستەر، قوعام بەلسەندىلەرى جانە باسقا دا تۇلعالار ەنگىزىلگەن.
رەسۋرس جەكە دەرەكتەردى، ونىڭ ىشىندە كامەلەتكە تولماعانداردىڭ مالىمەتتەرىن جاريالاعانى ءۇشىن بىرنەشە رەت سىنعا ۇشىراعان.
بۇعان دەيىن قازاقستان پارلامەنتى ءماجىلىسىنىڭ ەكس-دەپۋتاتى ايدوس سارىم دا «بىتىمگەر» بازاسىنا ەنگىزىلگەن. سايتتا ونى رەسەيدىڭ ۋكرايناعا قارسى سوعىسىن قولدادى جانە قازاقستاندا ۋكراينانى قولداۋعا باعىتتالعان ارەكەتتەرگە قارسى بولدى دەپ ايىپتاعان.
ۇلىس مەديا