ولجاس بەكتەنوۆ كوكونىس باعاسىنىڭ نەگىزسىز وسۋىنە جول بەرمەۋدى تاپسىردى

- قازىرگى تاڭدا باستى مىندەت - ەگىن وراعىن ۋاقتىلى اياقتاپ، جينالعان ءونىمدى ساقتاپ قالۋ. ەليەۆاتورلار مەن استىق قويمالارىنىڭ، سونداي-اق بيدايدى كەپتىرۋگە ارنالعان قۋاتتاردىڭ تولىق دايىندىعىن قامتاماسىز ەتۋ قاجەت. سونداي-اق استىقتى ىسىراپ قىلماي، ساپاسىن جوعالتىپ الماۋ ءۇشىن بارلىق ءتيىستى شارالاردى قابىلداۋ كەرەك. كۇن رايى جۇمىس قارقىنىنا، ءونىمنىڭ ساپاسى مەن كولەمىنە اسەر ەتپەۋگە ءتيىس. ەكولوگيا مينيسترلىگى ديقاندارعا اۋا رايى بولجامى تۋرالى مالىمەتتى ەگىن وراعى اياقتالعانشا كۇندەلىكتى بەرىپ تۇرسىن. جەڭىلدىكتى ديزەل وتىنىنىڭ قولجەتىمدىلىگىنە باسا نازار اۋدارۋ قاجەت،-دەدى پرەمەر- مينيستر.

وسى ورايدا ۇكىمەت باسشىسى ەنەرگەتيكا مينيسترلىگىننە ءوڭىر اكىمدىكتەرىمەن بىرلەسىپ، ەگىن جيناۋ ناۋقانى مەن استىقتى كەپتىرۋ جۇمىستارى تولىق اياقتالعانشا جانارمايدىڭ ۇزدىكسىز جەتكىزىلۋىن، سونداي-اق وتىن قورىن باقىلاۋدا ۇستاۋدى تاپسىردى.

- تاعى ءبىر ماڭىزدى ماسەلە - اۋىل شارۋاشىلىعى ونىمدەرىنىڭ ەكسپورتىن - قالىپتاسقان قارقىنمەن جالعاستىرۋ. جوسپارلانىپ وتىرعان ءونىم كولەمى ىشكى قاجەتتىلىكتى قامتاماسىز ەتۋگە دە، ءداستۇرلى كولەمدەگى ءونىمدى ەكسپورتقا جونەلتۋگە دە جەتكىلىكتى. قىسقى جانە كوكتەمگى كەزەڭدەرگە كوكونىس، اسىرەسە كارتوپ قورىن دايىنداپ الۋ باسىم باعىت بولىپ قالا بەرەدى. ەگىن وراعى كەزىندە قاجەتتى كولەمدەردى الدىن الا كەلىسىمشارت ارقىلى ۋاقتىلى ساتىپ الىپ، ساقتاۋعا قويۋ كەرەك. ءوڭىر اكىمدىكتەرى بۇل ماسەلەنى باقىلاۋدا ۇستاپ، ماۋسىمارالىق كەزەڭدە الەۋمەتتىك ماڭىزى بار كوكونىس ونىمدەرىنىڭ تاپشىلىعىنا جانە باعانىڭ نەگىزسىز وسۋىنە جول بەرمەۋگە ءتيىس. بۇل رەتتە ءونىمنىڭ ارتىلعان كولەمىن ەكسپورتقا باعىتتاۋ قاجەت. ساۋدا جانە كولىك مينيسترلىكتەرى شارۋالارعا ءونىمدى وتكىزۋ نارىقتارىن ىزدەستىرۋگە جانە ساتۋعا جاردەمدەسۋگە ءتيىس،-دەدى ولجاسس بەكتەنوۆ.

پرەمەر-مينيستر ەل ىشىندە اۋىل شارۋاشىلىعى شيكىزاتىن قايتا وڭدەۋ ۇلەسىن كەزەڭ- كەزەڭىمەن ارتتىرۋ ماڭىزدى ەكەنىن ايتتى.

- ءبىز تەرەڭ وڭدەۋ ءوندىرىسىن دامىتىپ، كەيىننەن قوسىلعان قۇنى جوعارى دايىن ءونىمدى سىرتقى نارىقتارعا شىعارۋعا ءتيىسپىز. جامبىل وبلىسىندا جۇگەرىنى تەرەڭ وڭدەيتىن زاماناۋي زاۋىتتىڭ اشىلۋى اتالعان باعىتتاعى ماڭىزدى قادامداردىڭ بىرىنە اينالدى. مۇنداي ءوندىرىستىڭ ىسكە قوسىلۋى شارۋالاردى ىنتالاندىرا ءتۇسىپ، وتاندىق شيكىزاتقا كەپىلدى سۇرانىس قالىپتاستىرادى. بۇعان قوسا، بيىل جۇگەرى القاپتارىنىڭ كولەمى %60 عا ۇلعايتىلدى. ءتيىمدى ينۆەستيتسيالىق جوبالاردى ىسكە قوسۋ ارقىلى سالانى ودان ءارى دامىتىپ، ونىڭ باسەكەگە قابىلەتتىلىگىن ارتتىرۋعا جانە وڭدەۋ سالاسىن ساپالىق تۇرعىدان جاڭا دەڭگەيگە كوتەرۋگە بولادى، - دەدى ول.

سونىمەن قاتار ۇكىمەت باسشىسى ەگىنشىلەردى زاماناۋي سۋ ۇنەمدەۋ تەحنولوگيالارىنا كوشۋگە ىنتالاندىرۋ تاجىريبەسىن جالعاستىرۋ قاجەتتىگىن ايتتى.