ولجاس بەكتەنوۆ: ورتالىق ازيادا جۇك ترانزيتىنىڭ باسەكەسى ارتىپ كەلەدى

استانا. KAZINFORM - پرەمەر-مينيستر ولجاس بەكتەنوۆ ۇكىمەت وتىرىسىندا قىتاي مەن ەۋروپانىڭ اراسىنداعى جۇك ترانزيتىنە قىزمەت كورسەتۋ ءۇشىن ورتالىق ازيانىڭ ءوز ىشىندە باسەكە ءورشي باستاعانىن ايتتى.

«قىركۇيەك ايىنداعى مەملەكەت باسشىسىنىڭ تۇركمەنستان ەلىنە ساپارى بارىسىندا قول قويىلعان كەلىسىم وسى ەل ارقىلى ترانزيتتىك تاسىمالدى ارنايى رۇقساتسىز جۇزەگە اسىرۋعا مۇمكىندىك بەرەدى. مەملەكەت باسشىسى قازاقستاندى تولىققاندى كولىك-لوگيستيكالىق حابقا اينالدىرۋ باعىتىندا ناقتى مىندەتتەر قويدى. العا قويىلعان ماقساتتارعا جەتۋ ءۇشىن ءبىز قولدانىستاعى تەمىرجول مەن لوگيستيكالىق ورتالىقتاردى جاڭعىرتىپ، جاڭالارىن سالىپ جاتىرمىز. سونداي-اق ۆاگون پاركىن جاڭارتۋ جۇمىستارى دا تۇراقتى جۇرۋدە. قابىلدانعان شارالاردىڭ ناتيجەسىندە 2029-جىلعا قاراي ترانزيتتىك تاسىمال كولەمى 28 ميلليون توننادان 45 ميلليون تونناعا دەيىن، ال ترانزيت جيىرما فۋتتىق بالاماداعى 2 ميلليون كونتەينەرگە دەيىن وسەدى»، - دەگەن ۇكىمەت باسشىسى سالاداعى پروبلەمالارعا دا توقتالدى.

پرەمەر-مينيستر بۇل سالادا ورتالىق ازيا ەلدەرىنىڭ ءوز اراسىندا باسەكە ءوسىپ كەلە جاتقانىنا ەرەكشە توقتالدى.

«ورتالىق ازيا ەلدەرىنىڭ كوپشىلىگى ءوز ينفراقۇرىلىمىن دامىتىپ، حالىقارالىق كولىك باعىتتارىنداعى ويىنشىلاردىڭ قاتارىنان ورىن الۋعا تالپىنىپ وتىر. سوندىقتان ەل اۋماعىنداعى ينفراقۇرىلىم مۇمكىندىكتەرىن ارتتىرا ءتۇسۋىمىز كەرەك. كەدەرگىلەر مەن شەكتەۋلەردى الىپ تاستاپ، «شىعىس-باتىس» باعىتىنداعى ترانزيتتىك تاسىمال كولەمىن ۇلعايتۋ قاجەت»، - دەدى ولجاس بەكتەنوۆ.