ولجاس بەكتەنوۆ توتەنشە جاعداي ورىن العان وڭىرلەر تۇرعىندارىن الەۋمەتتىك قولداۋ جونىندە تاپسىرما بەردى

قازاقستان پرەمەر- ءمينيسترى ولجاس بەكتەنوۆ سۋ تاسقىنى سالدارىن جويۋ شارالارى جونىندە كەڭەس وتكىزدى. پرەمەر- ءمينيستردىڭ ورىنباسارى تامارا دۇيسەنوۆا مەن ءتيىستى مينيسترلەر تىڭدالدى. بۇگىندە 8 مىڭعا جۋىق ادام ءوز ۇيلەرىنە ورالدى.

ۇكىمەت باسشىسى ۆيتسە-پرەمەر باستاعان الەۋمەتتىك بلوك مينيسترلىكتەرىنە توتەنشە جاعدايعا تاپ بولعان تۇرعىندارعا جان- جاقتى قولداۋ كورسەتۋدى تاپسىردى.

ۋاقىتشا باسپانامەن قامتاماسىز ەتۋ

«سۋ تاسقىنى باستالعاننان بەرى 86 مىڭ تۇرعىن قاۋىپسىز جەرگە كوشىرىلدى. قازىرگى تاڭدا ۋاقىتشا ورنالاستىرۋ پۋنكتتەرىندە 8472 ادام تۇرىپ جاتىر. ەۆاكۋاتسيالاۋ - ۋاقىتشا شارا. ۇيلەرى تۇرۋعا جارامسىز دەپ تانىلعان وتباسىلاردىڭ بارلىعىن ۋاقىتشا باسپانامەن قامتۋ قاجەت»، - دەپ اتاپ ءوتتى ولجاس بەكتەنوۆ.

سونىمەن بىرگە قونىس اۋدارعانعا دەيىن ەۆاكۋاتسيالاۋ پۋنكتتەرىنىڭ جۇمىسىن قولداۋعا ەرەكشە كوڭىل ءبولۋ تاپسىرىلدى. اكىمدىكتەر تۇرعىنداردى ساپالى ازىق-تۇلىكپەن، ءتيىستى سانيتاريالىق-گيگيەنالىق قۇرالدارمەن، قولجەتىمدى مەديتسينالىق قىزمەتتەرمەن قامتاماسىز ەتۋى كەرەك.

ءوز كەزەگىندە، ەۆاكۋاتسيالاۋ پۋنكتتەرىنەن ۋاقىتشا تۇرۋعا قونىستاندىرۋ پروتسەسى يكەمدى بولۋى كەرەك. ەگەر سۋ تاسقىنى بولىپ وتكەن وڭىرلەردە تۇرعىندار ۇيلەرىندە قالۋدى قالاسا، اكىمدىكتەر ءتيىستى كومەك كورسەتۋى قاجەت. سونىمەن بىرگە، ۇرلىق- قارلىققا جول بەرمەۋ ءۇشىن قاراۋسىز قالعان ۇيلەر ىشكى ىستەر مينيسترلىگىنىڭ باقىلاۋىندا بولادى.

ءبىلىم بەرۋ

«قازىرگى ۋاقىتتا ەلىمىزدىڭ ون وڭىرىندە ت ج رەجيمى جاريالانعان. 130 دان استام مەكتەپ قاشىقتان وقىتۋ فورماتىنا كوشىرىلدى، ءبىراق ەۆاكۋاتسيا ايماقتارىنداعى بالالاردىڭ وقۋ پروتسەسى ءۇزىلىپ قالدى. ءبىلىم مينيسترلىگىنە مەكتەپ وقۋشىلارىن اعىمداعى ەمتيحاندار مەن سىناقتاردان بوساتۋدى تاپسىرامىن. سونىمەن قاتار ولارعا جوعالتقان ۋاقىتتارىنىڭ ورنىن تولتىرۋعا ءارى قاراي دا كومەكتەسۋ قاجەت» - دەپ اتاپ ءوتتى پرەمەر- مينيستر.

سونىمەن قاتار سۋ تاسقىنىنىڭ بەلسەندى كەزەڭى اياقتالعاننان كەيىن اپاتتى ايماقتارداعى مۇعالىمدەر مەن وقۋشىلاردى تەحنيكالىق قۇرالدارمەن قامتاماسىز ەتۋ ماسەلەسىن پىسىقتاۋ تاپسىرىلدى.

دەنساۋلىق ساقتاۋ

«ءبىز ت ج رەجيمىندەگى وڭىرلەردىڭ كەيبىر تۇرعىندارى ەپيدەميولوگيالىق جاعدايعا الاڭدايتىنىن، زارداپ شەككەن حالىق اراسىندا جۇقپالى اۋرۋلاردىڭ ورشۋىنەن قاۋىپتەنەتىنىن كورىپ وتىرمىز. دەنساۋلىق ساقتاۋ مينيسترلىگىنە ماسەلەنى ەرەكشە باقىلاۋدا ۇستاپ، تۇرعىنداردى اقپاراتتاندىرۋدى تاپسىرامىن. وڭىرلەردە سۋ تاسقىنى جاعدايى تۇراقتالعاننان كەيىن اۋماقتاردى تازارتۋ جانە دەزينفەكتسيالىق ءىس-شارالار جۇرگىزۋ، سۋ قۇبىرى جۇيەلەرى مەن قۇرىلىستارىن، ورتالىقتاندىرىلماعان سۋمەن جابدىقتاۋ جۇيەلەرىن تازارتۋ جانە دەزينفەكتسيالاۋ بويىنشا كەشەندى شارالار جۇرگىزۋ قاجەت. اكىمدىكتەرگە سۋ جەتكىزۋ جۇمىستارىن ۇيىمداستىرۋ بويىنشا تاپسىرمالار بەرىلدى»، - دەدى ۇكىمەت باسشىسى.

ەپيزووتيالىق جاعداي

سۋ باسقان ايماقتارداعى ەپيزووتيالىق جاعدايدىڭ ناشارلاۋىنا جول بەرمەۋ ماقساتىندا اۋىل شارۋاشىلىعى مينيسترلىگى مەن رەسپۋبليكالىق ەپيزووتياعا قارسى جاساققا وبلىس اكىمدىكتەرىمەن بىرلەسىپ، جانۋارلاردىڭ ولەكسەسىن جيناۋ مەن جويۋدى جەدەل اياقتاۋ تاپسىرىلدى. جويۋ شارالارىن جۇرگىزۋ ءۇشىن ءتيىستى جابدىقتار، قىزمەتكەرلەر جانە قاجەتتى دەزينفەكتسيالىق قۇرالدار قاراستىرىلعان.

ينفراقۇرىلىمدى قالپىنا كەلتىرۋ

«ۇيلەردىڭ قۇرىلىسى بويىنشا جەكە تۇرعىن ءۇيدىڭ ۇلگىلىك جوباسى ازىرلەنۋدە. سونىمەن قاتار الەۋمەتتىك ينفراقۇرىلىم نىساندارىن، اتاپ ايتقاندا مەكتەپتەر مەن بالاباقشالار، اۋرۋحانالار مەن ەمحانالاردى جوندەۋگە باسىمدىق بەرۋ ماڭىزدى. قۇرىلىس جۇمىستارىنىڭ ساپاسىن قاتاڭ باقىلاۋدا ۇستاۋ كەرەك»، - دەدى ولجاس بەكتەنوۆ.

«پارمەندى تەتىكتى پىسىقتاپ، ونى بارلىق وڭىرلەرگە جەتكىزۋدى تاپسىرامىن. ەكىۇشتى تۇسىندىرۋلەر بولماۋى كەرەك. قوعام وكىلدەرىن پروتسەسكە تارتۋدىڭ ارقاسىندا اقشاعا باقىلاۋ كۇشەيتىلەتىن بولادى»، - دەپ تۇيىندەدى پرەمەر- مينيستر.