ولجاس بەكتەنوۆ: «تازا قازاقستان» باستاماسى تيىمدىلىگىن كورسەتتى
استانا. KAZINFORM - پرەمەر-مينيستر ولجاس بەكتەنوۆ ۇكىمەت وتىرىسىندا «تازا قازاقستان» ەكولوگيالىق باستاماسى تيىمدىلىگىن كورسەتكەنىن ايتتى.

- «تازا قازاقستان» ەكولوگيالىق باستاماسى ءوزىنىڭ جوعارى تيىمدىلىگىن كورسەتتى. سونداي-اق 2029-جىلعا دەيىنگى ۇزاق مەرزىمدى تۇجىرىمداما مارتەبەسىنە يە بولدى. قۇجاتتا ەكولوگيالىق احۋالدى جاقسارتۋ، قورشاعان ورتانى ساقتاۋ جانە ەكولوگيالىق مادەنيەتتى قالىپتاستىرۋ باعىتىندا كەشەندى ءىس-شارالار ايقىندالدى. قابىلدانىپ جاتقان شارالاردىڭ بارلىعى قوعامنىڭ ەكولوگيالىق ساۋاتى مەن جاۋاپكەرشىلىگىن ارتتىرۋعا باعىتتالىپ وتىر، - دەدى ۇكىمەت باسشىسى.
ولجاس بەكتەنوۆ بۇل باستاماعا كەز كەلگەن ادام ۇلەسىن قوسا الاتىنىن ەسكە سالدى.
- ول ءۇشىن ەكولوگيالىق مادەنيەت كۇندەلىكتى ءومىرىمىزدىڭ اجىراماس بولىگىنە اينالۋعا ءتيىس. بارلىق مەملەكەتتىك ورگاندار، بيزنەس پەن بۇكىل قوعام بولىپ وسى جۇمىستارعا بەلسەندى اتسالىسۋىمىز قاجەت، - دەدى پرەمەر-مينيستر.
ايتا كەتەيىك، بۇگىنگى ۇكىمەت وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ «تازا قازاقستان» باستاماسىنىڭ ءبىر جىلداعى ناتيجەسىن بايانداعان بولاتىن.