سۋ تاسقىنىنان زارداپ شەككەن ازاماتتارعا وتەماقى تولەۋدى تەزدەتۋ كەرەك - ولجاس بەكتەنوۆ

  استانا. KAZINFORM - پرەمەر- مينيستر ولجاس بەكتەنوۆ سۋ تاسقىنىنان زارداپ شەككەن ازاماتتارعا كەلتىرىلگەن زالالدى وتەۋ ماسەلەسى بويىنشا كەڭەس وتكىزدى.

جيىندا قارجى ءمينيسترى ءمادي تاكيەۆ پەن ونەركاسىپ جانە قۇرىلىس ءمينيسترى قانات شارلاپايەۆتىڭ باياندامالارى تىڭدالدى. بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.

بۇگىنگى تاڭدا زارداپ شەككەن 3561 وتباسىنا جوعالعان مۇلكى ءۇشىن 100 ا ە ك مولشەرىندە ءبىرجولعى وتەماقى تۇرىندە شامامەن 1 ميلليارد تەڭگە تولەندى. زارداپ شەككەندەرگە وتەماقى تولەۋ پروتسەسى وسى اپتا سوڭىنا دەيىن اياقتالادى.

باسپاناسىنان ايىرىلعان تۇرعىندار ءۇشىن زارداپ شەگۋشىنىڭ ءوز تاڭداۋى بويىنشا جاڭا ۇيلەر سالىنادى نەمەسە نارىقتان دايىن باسپانا ساتىپ الىنادى. ساياجاي بويىنشا، ەگەر ولار زارداپ شەككەن ادامنىڭ جالعىز ءۇيى بولسا، وسىنداي تەتىك قولدانىلاتىن بولادى.

كەڭەستە سۋ تاسقىنى سالدارىنان زارداپ شەككەن وڭىرلەردىڭ اكىمدەرى كەلتىرىلگەن زالالدى وتەۋ بويىنشا جۇرگىزىلىپ جاتقان جۇمىستاردىڭ اعىمداعى ناتيجەلەرى تۋرالى باياندادى. ماسەلەن، پاۆلودار وبلىسىندا دەمەيشىلەرمەن بىرگە 119 ءۇي بويىنشا زالال وتەلىپ، تۇرۋعا جارامسىز 5 ءۇيدىڭ قۇرىلىسى باستالدى. قوستاناي وبلىسىندا زارداپ شەككەندەر ءۇشىن 27 پاتەر ساتىپ الىندى، 1600 وتباسىنا الەۋمەتتىك كومەك تولەندى. ارقالىق قالاسىندا وتباسىلار ەرتەڭ 18-ءساۋىر كۇنى جاڭا ۇيگە قونىستانادى. اقتوبە وبلىسىندا 44 وتباسىنا 94,3 ميلليون تەڭگە كولەمىندە ماتەريالدىق شىعىن وتەلدى؛ 57 جاڭا ءۇيدىڭ قۇرىلىسى باستالدى.

اكىمدىكتەردىڭ جەدەل دەرەكتەرى بويىنشا بۇگىندە زارداپ شەككەن ۇيلەر سانى – 9627، ونىڭ ىشىندە 9610 جەكە، 17 كوپپاتەرلى تۇرعىن ءۇي. 2123 ۇيگە جۇرگىزىلگەن تەحنيكالىق تەكسەرۋ ناتيجەلەرىنە سايكەس 1067 ءۇي قالپىنا كەلتىرۋگە جاتپايتىنى انىقتالدى، ال 1056 ۇيگە جوندەۋ جۇمىستارىن جۇرگىزۋگە رۇقسات ەتىلگەن.

زارداپ شەككەن تۇرعىن ۇيلەرگە كەلتىرىلگەن زالالدى باعالاۋ جۇمىستارى جالعاسۋدا. ۇكىمەت باسشىسى بۇل الدىن الا جاسالعان دەرەكتەر ەكەنىن جانە ءبىرقاتار وڭىرلەردەگى كۇردەلى سۋ تاسقىنى جاعدايىن ەسكەرە وتىرىپ، شىعىن اۋقىمى ارتا ءتۇسۋى مۇمكىن ەكەنىن اتاپ ءوتتى.

«پرەزيدەنت سۋ تاسقىنىنان زارداپ شەككەن ازاماتتاردىڭ بارلىعىنا بارىنشا كومەك كورسەتۋدى باستى مىندەت ەتىپ قويدى. سۋ تارتىلعان وڭىرلەردە اكىمدىكتەر زارداپ شەككەن ازاماتتاردىڭ، جوعالعان نەمەسە بۇلىنگەن مۇلىكتەردىڭ ءتىزىمىن جاساۋ جانە باعالاۋ جۇمىستارىن اياقتاپ، شىعىنداردى وتەۋگە كىرىسۋى كەرەك. بۇل رەتتە، تىزىمگە ۇيلەرى ساۋ، ەشقانداي زارداپ شەكپەگەن ادامدار كىرىپ كەتپەۋگە ءتيىس. كوميسسيالاردىڭ جۇمىسىن ەشقانداي بيۋروكراتياعا سالماي، جەدەل ۇيىمداستىرۋ قاجەت. بارلىق ءتيىستى قىزمەتتەر جۇمىلىپ، كۇشەيتىلگەن رەجيمدە جۇمىس ىستەسىن»، - دەپ اتاپ ءوتتى ولجاس بەكتەنوۆ.

زارداپ شەككەن وڭىرلەر اكىمدىكتەرىنە جاۋاپتى تۇلعالاردى جەكەلەگەن ۋچاسكەلەرگە بەكىتە وتىرىپ، سۋ باسقان عيماراتتاردى تەحنيكالىق تەكسەرۋ جۇمىستارىن جەدەل اياقتاۋ، جوبالاردى جەرگىلىكتى جەرگە بايلانىستىرۋ ءۇشىن تەز ارادا جاڭا جەر تەلىمدەرىن انىقتاۋ تاپسىرىلدى. پرەمەر-مينيستر ىقتيمال سۋ تاسقىنىنان بارىنشا ءقاۋىپسىز، دامۋ پەرسپەكتيۆاسى جوعارى جانە ينفراقۇرىلىممەن قامتاماسىز ەتىلگەن دايىن ۋچاسكەلەردى پايدالانۋدى باسىمدىق رەتىندە بەلگىلەدى.