ولجاس بەكتەنوۆ قۇلسارى تۇرعىندارىمەن جۇزدەستى
استانا. KAZINFORM - ۇكىمەت باسشىسى ولجاس بەكتەنوۆ قۇلسارىعا بارىپ، سۋ تاسقىنى جاعدايىن تەكسەرىپ، تۇرعىنداردىڭ سۇراقتارىنا جاۋاپ بەردى.
مەملەكەت باسشىسىنىڭ تاپسىرماسى بويىنشا پرەمەر-مينيستر، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ جەتەكشىسى ولجاس بەكتەنوۆ اتىراۋ وبلىسىنداعى اعىمداعى جاعدايدى تەكسەردى. ول اۋماقتى تىكۇشاقپەن ارالاپ، وزەن جاعالاۋلارىن نىعايتۋ جۇمىستارىنىڭ بارىسىن قارادى.
«ولجاس بەكتەنوۆ قۇلسارى قالاسىنىڭ تۇرعىندارىمەن سويلەسىپ، ولاردىڭ قابىلدانىپ جاتقان شارالاردى كۇشەيتۋ بويىنشا سۇراقتارىنا جاۋاپ بەردى. سونداي-اق جايىق جانە جەم وزەندەرىندەگى جاعدايمەن تانىستى» - دەلىنگەن حابارلامادا.
جىلىوي جانە قىزىلقوعا اۋداندارىندا جەرگىلىكتى اۋقىمداعى تابيعي سيپاتتاعى ت ج رەجيمى ساقتالىپ وتىر.
بۇگىندە قىزىلقوعا اۋدانىنداعى ميالى، اققورا، جانگەلدين، جاسقايرات جانە كوزدىقارا اۋىلدارىندا قاۋىپ-قاتەر سەيىلدى.
اقتوبە وبلىسى ويىل اۋدانى جاعىنان جەم وزەنى دەڭگەيىنىڭ كوتەرىلۋىنە بايلانىستى جىلىوي اۋدانى قۇلسارى قالاسىن سۋ باسقان.
28551 ادام ەۆاكۋاتسيالاندى.
وڭىردە كەلەتىن سۋ ازايتۋ كولەمىن ازايتۋ ءۇشىن جەم وزەنىنىڭ ساعاسى ءۇش جاعىنان قازىلدى، سونداي-اق جەم وزەنىنىڭ بويىندا ورنالاسقان جاساندى بوگەتتەر بۇزىلدى.
بۇل وزەن ارناسىنىڭ باعىتىن وزگەرتۋگە جانە سۋدىڭ كەدەرگىسىز اعۋىن قامتاماسىز ەتۋگە، ونىڭ كاسپي تەڭىزىنە قاراي وتكىزۋ قابىلەتىن ۇلعايتۋعا جانە سۋ تاسقىنى قاۋپىن ازايتۋعا مۇمكىندىك بەرەدى.
ءوز كەزەگىندە تۇرعىندار مەن ۆولونتەرلەر تۇرعىن ءۇي سەكتورىن سۋ باسۋىنا جول بەرمەۋ بويىنشا جۇمىستار جۇرگىزىپ جاتىر.
