ولجاس بەكتەنوۆ: بيزنەستى قولداۋدىڭ بيۋدجەتتەن دە باسقا تەتىكتەرىن قاراۋ قاجەت
استانا. KAZINFORM -ۇكىمەت باسشىسى ىشكى بيزنەستى قولداۋدا بيۋدجەت قاراجاتىنان بولەك تەتىكتەردى قاراستىرۋ كەرەكتىگىن ايتتى.
«قۋاتتى ءارى باسەكەگە قابىلەتتى بيزنەس تابىستى ەكونوميكانىڭ نەگىزگى فاكتورى. بۇل - اكسيوما. كاسىپكەرلىكتى دامىتۋ جانە قولداۋ - ۇكىمەتتىڭ باستى مىندەتى. جالپى، مەملەكەتتىك قولداۋ سارالانۋعا ءتيىس. جوعارى دەڭگەيدە وڭدەلگەن ءونىم شىعارۋعا، سونداي- اق شىعارىلاتىن ءونىمنىڭ ەكسپورتتىق الەۋەتىنە باسىمدىق بەرگەن ءجون. قارجىلاي قولداۋ ءوندىرىستىڭ تەحنولوگيالىق كۇردەلىلىك دەڭگەيىنە بايلانىستى كورسەتىلۋى كەرەك»، - دەدى ولجاس بەكتەنوۆ ۇكىمەت وتىرىسىندا.
و. بەكتەنوۆتىڭ ايتۋىنشا، كۇردەلى وندىرىسپەن جانە تەحنولوگيالاردى كەڭىنەن قولداناتىن كاسىپكەرلەرگە كرەديتتى تومەن ستاۆكامەن جانە ۇزاق مەرزىمگە بەرگەن ابزال.
«وتاندىق بيزنەسكە قارجىلاندىرۋ قولجەتىمدى بولۋى ءتيىس، ونىڭ ىشىندە بيۋدجەتتەن باسقا كوزدەردى پايدالانىپ، كەپىلدىك بەرۋ تەتىكتەرىن كەڭەيتۋ قاجەت. بۇل - ۇلتتىق ەكونوميكا مينيسترلىگى مەن دامۋ ينستيتۋتتارى ءۇشىن ماڭىزدى مىندەت. سونداي- اق بۇل جەرگىلىكتى كاسىپورىندارعا شەتەلدىك جەتكىزۋشىلەرمەن باسەكەلەسۋگە مۇمكىندىك بەرەدى»، - دەيدى ول.
