ولجاس بەكتەنوۆ ب ۇ ۇ سيفرلىق شەشىمدەر ورتالىعىن قازاقستاندا اشۋدى ۇسىندى
استانا. KAZINFORM – ق ر پرەمەر-ءمينيسترى ولجاس بەكتەنوۆ استانادا سيفرلىق ينكليۋزيا جانە ترانسفورماتسيا بويىنشا ورتالىق ازياداعى العاشقى ازيا-تىنىق مۇحيتى كونفەرەنسياسىندا ب ۇ ۇ سيفرلىق شەشىمدەر ورتالىعىنىڭ قازاقستاندا اشىلۋىنا قولداۋ كورسەتۋگە شاقىردى.
«بىرىككەن ۇلتتار ۇيىمىنىڭ ءبىزدىڭ وڭىردەگى ورنىقتى دامۋ ماقساتتارىنا قول جەتكىزۋ ءۇشىن «ەشكىم نازاردان تىس قالماۋعا ءتيىس» قاعيداتىن اتاپ ءوتۋ ماڭىزدى. سوندىقتان، سيفرلىق ينكليۋزيا - العا قويىلعان ماقساتتارعا جەتۋدىڭ بىردەن ءبىر ماڭىزدى ەلەمەنتى. ىنتىماقتاستىق، ءبىلىم الماسۋ جانە ەڭ جاقسى تاجىريبەلەر ارقىلى عانا ءبىز بارىنە بىردەي تۇراقتى جانە جارقىن بولاشاقتى قامتاماسىز ەتە الامىز»، - دەدى ولجاس بەكتەنوۆ كونفەرەنسيانىڭ اشىلۋ سالتاناتىندا.
ۇكىمەت باسشىسى قازاقستاننىڭ ءوز تاجىريبەسىمەن جانە بىلىمىمەن بولىسۋگە دايىن ەكەنىن باسا ايتتى.
«سوندىقتان ارىپتەستەرىمدى ازيا- تىنىق مۇحيتى وڭىرىندە تۇراقتى دامۋى ءۇشىن سيفرلىق شەشىمدەر ورتالىعىنىڭ قازاقستاندا اشىلۋىنا قولداۋ كورسەتۋگە شاقىرامىن. ورتالىقتى قۇرۋ ءتيىمدى وڭىرلىك ىنتىماقتاستىقتى دامىتۋ ءۇشىن ماڭىزدى كاتاليزاتور بولادى جانە ەلدەر اراسىنداعى سيفرلىق الشاقتىقتى ايتارلىقتاي قىسقارتۋعا اكەلەدى»، - دەدى ولجاس بەكتەنوۆ.
ايتا كەتەيىك، قازاقستاندا العاش رەت ازيا جانە تىنىق مۇحيتى ءوڭىرىنىڭ كونفەرەنسياسى ءوتىپ جاتىر. وندا ازيا جانە تىنىق مۇحيتى ءوڭىرىنىڭ 30 دان استام ءمينيسترى باس قوستى.
اۋقىمدى جيىندى ب ۇ ۇ ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسياسى ۇيىمداستىرعان. قازاقستاندا اتمەاك كونفەرەنسياسىن وتكىزۋ ۇسىنىسى 79-شى سەسسيادا بارلىق مۇشە مەملەكەتتەردىڭ ءبىراۋىزدان قولداۋىنا يە بولدى، بۇل ەلدىڭ وڭىردەگى سيفرلىق تەحنولوگيالار مەن تۇراقتى دامۋدى ىلگەرىلەتۋدەگى ماڭىزدى ءرولىن كورسەتەدى.
اۆتور
ايجان سەرىكجان قىزى
