ولجاس بەكتەنوۆ: ب ق و- نى جويقىن سۋ تاسقىنىنان ساقتاپ قالدىق، ەندىگى مىندەت - اتىراۋدى قورعاۋ
استانا. KAZINFORM - قازاقستان پرەمەر- ءمينيسترى ولجاس بەكتەنوۆ ەلىمىزدىڭ باتىسىنداعى سۋ تاسقىنى جاعدايى بويىنشا جەدەل كەڭەس وتكىزدى، وندا ءوڭىردى اۋقىمدى تاسقىننان قورعاۋ ماقساتىندا ۇزاق ۋاقىت بويى كۇشەيتىلگەن جۇمىس جۇرگىزىلىپ جاتىر.
ۇكىمەت باسشىسى اتىراۋ وبلىسى باسشىلىعىنىڭ الدىنا قالا مەن ەلدى مەكەندەردى جىلجىپ كەلە جاتقان تاسقىن سۋلاردان بارىنشا قورعاۋ مىندەتىن قويدى.
ۇكىمەتكە باتىس قازاقستان وبلىسىنداعى سەكىلدى جۇمىس ۇيىمداستىرۋ تاپسىرىلدى، وندا سۋ تاسقىنىنا قارسى الدىن الۋ ءىس-شارالارىن، جەتكىزىلگەن ينجەنەرلىك تەحنيكالاردى ەسكەرە وتىرىپ، 14 وڭىردەن جۇمىلدىرىلعان اسكەري قىزمەتشىلەر مەن قۇتقارۋشىلار اۋقىمدى شىعىنعا جول بەرمەي، سۋ تاسقىنىن ەڭسەرۋگە مۇمكىندىك بەردى.
ب ق و- داعى جۇمىسقا 11 مىڭنان استام ادام جانە 2 مىڭعا جۋىق تەحنيكا تارتىلدى. ۇزىندىعى شامامەن 150 ك م بولاتىن قورعانىس بوگەتتەرى سالىندى، 1,3 ميلليون قۇم تولتىرىلعان قاپشىق توسەلدى.
ورال قالاسىندا 18 تۇرعىن ءۇي الابىن بويلاي تۇرعىزىلعان بوگەتتەر قاۋىپسىزدىكتى تولىق قامتاماسىز ەتتى.
قالانىڭ تۇرعىن ۇيلەرى مەن الەۋمەتتىك نىساندارىنا سۋ جەتكەن جوق. سۋ باسقان باۋ- باقشا سەرىكتەستىكتەرى مەن جايىق وزەنىنىڭ القابىندا ورنالاسقان ءبىرقاتار ءۇيدىڭ تۇرعىندارى الدىن الا قاۋىپسىز جەرگە كوشىرىلدى.
باتىس قازاقستان وبلىسى اكىمدىگىنىڭ مالىمەتىنشە، بۇگىندە 909 ءۇيدىڭ تۇرعىندارى ءوز ۇيلەرىنە قايتا ورالدى، 5 مىڭنان استام مال باسى قاۋىپسىز جەرلەرگە جايىلىمعا جىبەرىلدى.
بۇگىنگى تاڭدا وبلىستىق جەدەل شتاب پەن سۋ تاسقىنى سالدارىن جويۋ جونىندەگى كوميسسيا 8 مىڭعا جۋىق ءوتىنىم جيناپ، مىڭنان استام ۇيگە باعالاۋ جۇمىستارىن جۇرگىزدى. 1672 وتباسى 100 اەك مولشەرىندە ءبىرجولعى تولەم الدى. زارداپ شەككەندەرگە كومەك كورسەتۋ جۇمىستارى جالعاسۋدا.
«سۋ تاسقىنى جاعدايى تۇراقتالىپ كەلەدى. باتىس قازاقستان وبلىسىندا سۋ تاسقىنىنىڭ شارىقتاۋ شەگى بولىپ ءوتتى. مۇندا جۇمىسقا تارتىلعان بارلىق بولىمشەلەردىڭ ۇيلەسىمدى جۇمىسىن اتاپ وتكەن ءجون. بىرلەسكەن ءىس-ارەكەتتەردىڭ ارقاسىندا 84 ەلدى مەكەندى سۋ باسۋعا جول بەرىلمەدى، سونداي- اق وڭىردەگى سۋ تاسقىنىنىڭ سالدارى بارىنشا ازايتىلدى. قازىر ۇيلەردى قايتادان سۋ باسۋ قاۋپى سەيىلدى»، - دەدى ولجاس بەكتەنوۆ. - توتەنشە جاعدايلار، قورعانىس، ىشكى ىستەر مينيسترلىكتەرىنىڭ، ۇلتتىق قاۋىپسىزدىك كوميتەتىنىڭ، جەرگىلىكتى اتقارۋشى ورگانداردىڭ، ۇيىمداردىڭ بارلىق قىزمەتكەرلەرى مەن اسكەري قىزمەتشىلەرىنە، ەرىكتىلەرگە جانە سۋ تاسقىنىنا قارسى ءىس- شارالارعا قاتىسقان بارلىق جاناشىر ازاماتتارعا ۇلكەن العىسىمدى بىلدىرەمىن».
بۇگىنگى كۇننىڭ باستى مىندەتى - اتىراۋ وبلىسىن سۋ تاسقىنىنان قورعانۋعا دايىنداۋ. كۇن سايىن جايىق وزەنىنىڭ سۋ دەڭگەيى كوتەرىلىپ كەلەدى. قاۋىپتى بەلگىگە دەيىن شامامەن 100 س م قالدى.
«قازىر ۇلكەن سۋ كولەمى اتىراۋ وبلىسىنا قاراي اعىپ جاتىر، الداعى كۇندەرى شارىقتاۋ شەگى كۇتىلۋدە. بارلىق كۇشتەردى جۇمىلدىرىپ، باسقا وڭىرلەردەن قوسىمشا كۇش تارتقان باتىس قازاقستان وبلىسىنىڭ تاجىريبەسىن پايدالانعان ءجون. سۋ دەڭگەيىنىڭ ساعاتتىق مونيتورينگىن قامتاماسىز ەتىپ، قورعانىس بوگەتتەرىنىڭ ۇزىندىعى مەن بيىكتىگىن ۇلعايتۋ قاجەت. ءبىز ءوڭىردى قورعاپ، سۋ تاسقىنىنا جول بەرمەۋىمىز كەرەك»، - دەپ اتاپ ءوتتى ۇكىمەت باسشىسى.
بۇگىندە اتىراۋ وبلىسىندا اپاتتىق- قۇتقارۋ جۇمىستارىن جۇرگىزۋ ءۇشىن 13 مىڭنان استام ادام جانە 1200 دەن استام تەحنيكا جۇمىلدىرىلعان.
وڭىردە 500 ك م- دەن استام بوگەت سالىندى، ونىڭ ىشىندە اتىراۋ قالاسىنداعى تۇرعىن الاپتاردىڭ بويىندا — 242 ك م، 4,8 ميلليوننان استام قاپشىقتار پايدالانىلدى.
وزەن ساعاسىندا، كاسپي تەڭىزىندە تەرەڭدەتۋ جۇمىستارى جالعاسۋدا: 1408 م قازىلىپ، 11 538 ³m توپىراق الىپ تاستالدى.
قورىتىندىلاي كەلە، ۇكىمەت باسشىسى نەگىزىنەن ەل بويىنشا سۋ تاسقىنى قاۋپى سەيىلگەنىن اتاپ ءوتتى.
«پرەزيدەنت تابيعي اپاتتان قيراعان ۇيلەردى قالپىنا كەلتىرۋ، زارداپ شەككەن ازاماتتاردى قالىپتى ومىرگە قايتارۋ بويىنشا باسىم مىندەت قويدى. ءبىز بارلىق كۇش- جىگەرىمىزدى الەۋمەتتىك نىسانداردى، تۇرعىن ۇيلەر مەن ينفراقۇرىلىمدى سالۋعا جانە جوندەۋگە، ادامدارعا وتەماقى تولەۋگە باعىتتاۋىمىز كەرەك. بارلىق اتقارىلاتىن شارالار ناقتى ءارى ۇيلەسىمدى تۇردە جاسالۋى كەرەك. اكىمدىكتەر تۇراقتى ءتۇسىندىرۋ جۇمىستارىن جۇرگىزىپ، زارداپ شەككەن تۇرعىندارمەن كەزدەسۋى كەرەك»، - دەپ قورىتىندىلادى ولجاس بەكتەنوۆ.
