ولجاس بەكتەنوۆ استاناداعى ازەربايجان ەلشىلىگىنىڭ كوڭىل ايتۋ كىتابىنا جازبا قالدىردى
استانا. KAZINFORM - قازاقستان پرەمەر-ءمينيسترى ولجاس بەكتەنوۆ ازەربايجاننىڭ استاناداعى ەلشىلىگىنە بارىپ، اقتاۋ قالاسىنىڭ اۋەجايى ماڭىندا بولعان Az Airlines اۋە كومپانياسىنا تيەسىلى Embraer 190 ۇشاعىنىڭ اپاتىنا بايلانىستى اشىلعان كوڭىل ايتۋ كىتابىنا جازبا قالدىردى. بۇل تۋرالى ۇكىمەتتىڭ باسپا ءسوز قىزمەتى حابارلادى.
26-جەلتوقساندا ازەربايجاندا قارالى كۇن جاريالاندى. قازا تاپقانداردى ءبىر مينۋت ۇنسىزدىكپەن ەسكە الدى.
- بۇل قيىن ساتتە قازاقستان ۇكىمەتىنىڭ جانە ءوز اتىمنان قازا تاپقانداردىڭ وتباسىلارىنا، تۋىستارى مەن جاقىندارىنا قايعىرىپ كوڭىل ايتامىن. ورنى تولماس اۋىر قايعىعا ورتاقتاسىپ، اپات سالدارىنان زارداپ شەككەندەردىڭ تەزىرەك ساۋىعىپ كەتۋىن، ازەربايجان حالقىنا سابىر مەن توزىمدىلىك تىلەيمىن. ءبىز باۋىرلاس ازەربايجانعا ءتيىستى كومەك قولىن سوزىپ، جان-جاقتى قولداۋ كورسەتەمىز، - دەپ جازدى ولجاس بەكتەنوۆ.
بۇعان دەيىن پرەمەر-مينيستر قازا تاپقان قازاقستاندىقتاردىڭ تۋعان-تۋىستارىنا كوڭىل ايتىپ، زارداپ شەككەن ازەربايجان، رەسەي جانە قىرعىزستان ازاماتتارىنا جان-جاقتى قولداۋ كورسەتۋدى تاپسىرعان بولاتىن.
اقتاۋ قالاسىنا كەلگەن قازا تاپقان جولاۋشىلاردىڭ وتباسى مۇشەلەرىنە قاجەتتى كومەك كورسەتىلىپ جاتىر.
پرەمەر-مينيستر اۆياتسيالىق قاۋىپسىزدىكتى كۇشەيتۋ جونىندە ءبىرقاتار تاپسىرما بەرگەنىن جازعان بولاتىنبىز.
اۆتور
ەلميرا ورالبايەۆا
