ولجاس بەكتەنوۆ پاۆلودار وبلىسىنداعى ءىرى كاسىپورىنداردى ارالادى
استانا. KAZINFORM - پرەمەر-مينيستر ولجاس بەكتەنوۆ مەملەكەت باسشىسى قاسىم-جومارت توقايەۆتىڭ ەكسپورتقا باعدارلانعان ونەركاسىپتى دامىتۋ جانە پاۆلودار وبلىسىنىڭ كاسىپورىندارىن تەحنولوگيالىق جاڭعىرتۋ جونىندەگى تاپسىرمالارىنىڭ ورىندالۋ بارىسىمەن تانىستى.
ۇكىمەت باسشىسى KSP Steel، «قازاقستان اليۋمينيى»، «قازاقستاندىق ەلەكتروليز زاۋىتى»، اقسۋ فەرروقورىتپا زاۋىتى جانە اقسۋ ەلەكتر ستانساسىندا بولدى. ولجاس بەكتەنوۆ وڭىرگە جۇمىس ساپارى اياسىندا مۇناي-گاز سالاسىنا ارنالعان جىكسىز بولات قۇبىرلار، ارماتۋرا جانە باسقا دا ونىمدەر شىعاراتىن KSP Steel زاۋىتىنىڭ وندىرىستىك سەحتارىنا باردى.
بۇگىنگى تاڭدا KSP Steel - 4,5 مىڭنان استام ادام جۇمىس ىستەيتىن بولات بالقىتۋ سەكتورىنداعى ەكىنشى ماڭىزدى كاسىپورىن. نەگىزگى پروبلەمالىق ماسەلەلەردىڭ ءبىرى - زاۋىتتىڭ تولىق وندىرىستىك قۋاتقا شىعۋى.
پرەمەر- مينيستر قازىرگى ۋاقىتتا ۇكىمەت وتاندىق وندىرۋشىلەردى تولىق وندىرىستىك قۋاتقا شىعارۋ ءۇشىن ءتيىستى جاعداي جاساۋعا كۇش سالىپ جاتقانىن اتاپ ءوتتى. ءوز كەزەگىندە، كومپانيا قاجەتتى ينۆەستيتسيالاردى سالا وتىرىپ، ءوندىرىستى جاڭعىرتۋى جانە تۇتىنۋشىلارمەن تىكەلەي وففتەيك-كەلىسىمشارتتار جاساسۋى ءتيىس.
ۇكىمەت باسشىسى سونداي-اق الەمدەگى جەتەكشى اليۋميني وندىرۋشىلەرىنىڭ ءبىرى «قازاقستان اليۋمينيى» ا ق قىزمەتىمەن تانىستى. زاۋىتتا 30 دان استام مەتاللۋرگتەر ديناستياسى ەڭبەك ەتىپ جاتىر. كاسىپورىن قۇرامىندا پاۆلودار تۇرعىندارىنىڭ %40 ىن جىلۋمەن قامتاماسىز ەتىپ وتىرعان جىلۋ ەلەكتر ستانساسى جۇمىس ىستەيدى.
ولجاس بەكتەنوۆتىڭ ايتۋىنشا، قولدانىستاعى اليۋميني كلاستەرى تەك ءوڭىر ءۇشىن عانا ەمەس، بۇكىل رەسپۋبليكا ءۇشىن ۇلكەن ماڭىزعا يە.
«وندىرىستىك وڭدەۋ دەڭگەيىن ارتتىرۋ جانە ەكولوگيالىق تالاپتاردى ەسكەرە وتىرىپ، كاسىپورىندى تەحنيكالىق جاڭعىرتۋ بويىنشا جۇمىستى جالعاستىرۋ قاجەت»، - دەدى پرەمەر- مينيستر.
ونەركاسىپتىك نىسانداردى ارالاعان ولجاس بەكتەنوۆ شيكىزاتتى ودان ءارى وڭدەۋ بويىنشا جۇمىستى كۇشەيتۋدىڭ ماڭىزىن اتاپ ءوتتى. سونداي-اق ەكونوميكانى يندۋستريالاندىرۋ قارقىنىن قامتاماسىز ەتۋ ءۇشىن وتاندىق كاسىپورىندارعا جان-جاقتى قولداۋ كورسەتۋدى تاپسىردى.
