ولجاس بەكتەنوۆ پاۆلودار مۇناي-حيميا زاۋىتىنا باردى
استانا. KAZINFORM – ق ر پرەمەر-ءمينيسترى ولجاس بەكتەنوۆ پاۆلودار وبلىسىندا مۇناي وڭدەۋدى ۇلعايتۋ جانە مۇناي-حيميا سەكتورى كاسىپورىندارىن تولىق قۋاتىنا شىعارۋ جونىندەگى شارالارمەن تانىستى. بۇل تۋرالى ۇكىمەتتىڭ باسپا ءسوز قىزمەتى مالىمدەدى.
ۇكىمەت باسشىسى پاۆلودار مۇناي-حيميا زاۋىتىنا بارىپ، ونىڭ قازىرگى جۇمىسىمەن جانە ءوندىرىستى ودان ءارى جاڭعىرتۋ جوسپارلارىن نازارعا الدى.
باسىم جوبالاردىڭ ءبىرى - تەحنولوگيالىق قوندىرعىلار جۇمىسىنىڭ توقتاۋسىز جوندەۋارالىق كەزەڭىنە كوشۋ.
بۇگىنگى تاڭدا پ م ح ز جىلىنا شامامەن 6 ميلليون توننا مۇناي وڭدەيدى.
شىعارىلاتىن ونىمدەردىڭ ىشىندە اۆتوموبيل بەنزينىنىڭ ءارتۇرلى ماركالارى، ديزەل وتىنى، مازۋت، بيتۋم، كوممۋنالدىق-تۇرمىستىق گازدار جانە ت. ب. بار.
ولجاس بەكتەنوۆتىڭ ايتۋىنشا، مەملەكەت باسشىسى قاسىم-جومارت توقايەۆ ىشكى نارىقتى وتىنمەن قامتاماسىز ەتۋ بويىنشا ۇكىمەت الدىنا ناقتى مىندەتتەر قويدى.
وسىعان بايلانىستى مۇناي وڭدەۋ زاۋىتتارى مۇناي ونىمدەرىنىڭ بۇكىل جەلىسى بويىنشا ءوندىرىس كولەمىن ۇلعايتۋ ءۇشىن بارلىق شارالار كەشەنىن ىسكە اسىرۋى قاجەت.
وتاندىق ەكونوميكانى دامىتۋ ءۇشىن جول قۇرىلىسىنىڭ ماڭىزىن ەسكەرە وتىرىپ، پ م ح ز- دا بيتۋم وندىرەتىن پەشتىڭ قۇرىلىسى اياقتالدى، بۇل ونىڭ ءوندىرىسىن %15 عا ارتتىرۋعا مۇمكىندىك بەردى.
پرەمەر-مينيستر زاۋىت باسشىلىعىنا جۇمىس قارقىنىن ارتتىرۋ قاجەت ەكەنىن، بۇل رەتتە مەملەكەت تاراپىنان قولداۋ كورسەتىلەتىنىن اتاپ ءوتتى. سونىمەن قاتار ۇكىمەت باسشىسى ۇساقتالعان پوليپروپيلەن جانە باسقا دا پوليمەر بۇيىمدارىن شىعاراتىن «نەفتەحيم LTD» كاسىپورنىنىڭ جۇمىسىمەن تانىستى.
مۇندا پ م ح ز- دان جەتكىزىلەتىن سۇيىتىلعان مۇناي گازىن وڭدەۋدەن باستاپ دايىن ونىمگە دەيىن ءوندىرىستىڭ تولىق سيكلى جۇزەگە اسىرىلدى.
ول ىشكى نارىقتا، سونداي-اق قىرعىزستاندا، رەسەيدە، تاجىكستاندا جانە وزبەكستاندا جوعارى سۇرانىسقا يە.
ولجاس بەكتەنوۆ پاۆلودار وبلىسىندا مۇناي-حيميا كلاستەرىن دامىتۋ ءۇشىن بارلىق جاعداي جاسالعانىن اتاپ ءوتتى.
