ولجاس بەكتەنوۆ: الماتى مەكتەپتەرىنىڭ شامادان تىس تولۋى - اسا وتكىر ماسەلە
استانا. KAZINFORM - پرەمەر-مينيستر ولجاس بەكتەنوۆ الماتىعا جۇمىس ساپارى بارىسىندا وقۋشىلار مەن ستۋدەنتتەردىڭ ءبىلىم الۋىنا جاعداي جاساۋ جۇمىستارىنىڭ بارىسىمەن تانىستى.
بۇل تۋرالى ۇكىمەتتىڭ باسپا ءسوز قىزمەتى حابارلادى.
مەملەكەت باسشىسى قاسىم-جومارت توقايەۆتىڭ قازاقستانداعى وقۋشى ورنىنىڭ تاپشىلىعى ماسەلەسىن شەشۋ بويىنشا العا قويعان مىندەتتەرىن ورىنداۋ اياسىندا «جايلى مەكتەپ» ۇلتتىق جوباسى ىسكە اسىرىلىپ جاتىر. بىلىكتى كادرلار دايارلاۋ ءۇشىن جوعارى وقۋ ورىندارى جاڭارتىلىپ جاتىر. ولجاس بەكتەنوۆ «جايلى مەكتەپ» ۇلتتىق جوباسى اياسىندا سالىنعان 97-مەكتەپ-گيمنازياسىندا بولدى. عيمارات بۇرىنعى اپاتتى جاعدايداعى مەكتەپتىڭ ورنىنا تۇرعىزىلعان.
ۇلتتىق جوبا اياسىندا سالىنعان العاشقى مەكتەپ جاڭا وقۋ جىلىنىڭ باسىندا پايدالانۋعا بەرىلمەك. بۇگىندە نىسان %95 عا دايىن، وندا ارلەۋ جانە اۋماقتى اباتتاندىرۋ جۇمىستارى جۇرگىزىلىپ جاتىر. مەكتەپتە 945 وقۋشى ءبىلىم الاتىن بولادى. ەرەكشە ءبىلىم بەرۋ قاجەتتىلىكتەرى بار بالالار ءۇشىن ينكليۋزيۆتى ورتا قۇرىلدى. بارلىق وقۋشىنىڭ وزىندىك قاجەتتىلىكتەرىن ەسكەرە وتىرىپ، زاماناۋي تەحنولوگيالار ەنگىزۋ ارقىلى ءبىلىم ساپاسى ارتادى، شىعارماشىلىق الەۋەتتى دامىتۋ ماقساتىندا ماتەريالدىق-تەحنيكالىق بازا جاقسارتىلادى. ەلىمىزدە «جايلى مەكتەپ» ۇلتتىق جوباسى اياسىندا قوسىمشا 700 مىڭنان استام وقۋشى ورنى قولجەتىمدى بولادى.
ۇكىمەت باسشىسىنا مەكتەپ عيماراتىنىڭ قۇرىلىسى مەرزىمىنەن بۇرىن جۇزەگە اسىرىلعانى تۋرالى باياندالدى. ول ءۇشىن قۇرىلىس-مونتاجداۋ جۇمىستارىنىڭ ەكى اۋىسىمدىق كەستەسى ۇيىمداستىرىلدى. بارلىق كەزەڭدە ورتا ەسەپپەن 250 ادام تۇراقتى تۇردە جۇمىس ىستەدى. بۇگىندە نەگىزگى جۇمىستار اياقتالىپ، تەحنولوگيالىق جابدىقتارمەن جاراقتاندىرۋ ءجۇرىپ جاتىر. ولجاس بەكتەنوۆ قۇرىلىس جۇمىستارىنىڭ ساپاسىن باقىلاۋدىڭ ماڭىزدى ەكەنىن باسا ايتتى.
«الماتى مەكتەپتەرىنىڭ شامادان تىس تولۋى - اسا وتكىر ماسەلە، سوندىقتان قۇرىلىستى مەرزىمىنەن بۇرىن اياقتاۋ قاجەت. بۇل رەتتە الدىمەن ساپاعا باسىمدىق بەرىلۋى كەرەك. بالالارعا ارنالعان ينفراقۇرىلىم قاۋىپسىزدىكتىڭ بارلىق تالاپقا ساي بولۋى كەرەك، تەحنولوگيالىق جاراقتاندىرىلىپ، بالالارىمىزدىڭ قولايلى جاعدايدا ءبىلىم الۋىنا مۇمكىندىك بەرۋى ءتيىس»، - دەپ اتاپ ءوتتى پرەمەر-مينيستر.
ۇكىمەت باسشىسى حالىقارالىق ءبىلىم بەرۋ كورپوراتسياسىن ارالاۋ بارىسىندا ناقتى كاسىپورىندارمەن ىنتىماقتاستىق ورناتۋ ماسەلەسىنە باسا نازار اۋداردى. جاس عىلىمي توپتارمەن ءوزارا ءىس-قيمىل شارالارى جانە ولاردىڭ ەڭبەكتەرىنىڭ ناتيجەلەرىن قالا مەن ەل ءۇشىن ماڭىزدى سالالاردا قولدانۋ مۇمكىندىكتەرى تالقىلاندى.
ءبىرىڭعاي وقۋ-عىلىمي-وندىرىستىك كەشەن - حالىقارالىق ءبىلىم بەرۋ كورپوراتسياسىنىڭ (ح ب ك) باعدارلامالارى بويىنشا بۇگىندە 14 مىڭنان استام ازامات ءبىلىم الۋدا. كورپوراتسيا قۇرامىنا قاز ب س ق ا جانە ق ا ۋ جوعارى وقۋ ورىندارى، قاز ب س ق ا كوللەدجى مەن Almaty Digital College، سونداي-اق قاز ب س ق ا جانە ق ا ۋ مەكتەپتەرى كىرەدى. كورپوراتسيا وقۋ ورتالىقتارىن اشۋ، وقۋ اۋديتوريالارىن جابدىقتاۋ جانە برەندتەۋ جونىندەگى جوبالارعا بەلسەندى قاتىساتىن 250 دەن استام وتاندىق جانە حالىقارالىق جۇمىس بەرۋشى كومپانيالارمەن ىنتىماقتاستىق جۇرگىزەدى. بۇل تۇلەكتەرگە جۇمىسقا ورنالاسۋ كەزىندە كاسىپورىن تالاپ ەتەتىن داعدىلارعا يە بولۋىنا مۇمكىندىك بەرەدى.
مۇندا باس وقۋ كورپۋسىن تولىق رەكونسترۋكتسيالاۋ ناتيجەلەرى دە قارالدى. پرەمەر-مينيسترگە 480 ورىنعا ارنالعان جاڭا زاماناۋي قازبسقا مەكتەبىنىڭ ىسكە قوسىلۋى، سونداي-اق 2025-جىلى پايدالانۋعا بەرىلەتىن، 345 توسەك-ورىنعا ارنالعان جاتاقحانا قۇرىلىسىنىڭ جوسپارى (2025-جىلدىڭ سوڭىنا دەيىن بارلىعى 12 مىڭ توسەك-ورىن، ال 2030-جىلدىڭ سوڭىنا دەيىن تاعى 20 مىڭ توسەك-ورىن پايدالانۋعا بەرۋ جوسپارلانعان) تۋرالى باياندالدى.
سونىمەن قاتار سەيسميكالىق جاعدايلار، قالا زەرتتەۋلەرى مەن ديزاين زەرتحانالارى تەكسەرىلدى. ۇكىمەت باسشىسى بيزنەستىڭ ناقتى مىندەتتەرىن شەشۋگە باعىتتالعان جانە كوممەرتسيالاندىرۋ الەۋەتى بار قولدانبالى جوبالاردى قولداۋعا جانە قارجىلاندىرۋعا باسا كوڭىل بولە وتىرىپ، جوعارى عىلىمي-تەحنيكالىق كوميسسيانىڭ جۇمىسىن قايتا فورماتتاۋ قاجەتتىگىنە نازار اۋداردى.
زەرتتەۋلەر جانە ازىرلەمەلەردى باعدارلامالىق-نىسانالى قارجىلاندىرۋ بويىنشا 2024-2026-جىلدارعا ارنالعان 181 عىلىمي-تەحنيكالىق تاپسىرما ازىرلەندى. الداعى 2 جىلدا جاس عالىمدارعا ارنالعان گرانتتارعا رەسپۋبليكالىق بيۋجەتتەن 18 ميلليارد تەڭگە بولىنەتىن بولادى. سونىمەن قاتار ەڭبەك نارىعىندا تۇلەكتەردىڭ باسەكەگە قابىلەتتىلىگىن ارتتىرۋ ماقساتىندا كادرلار دايارلاۋ باعدارلامالارىن جەتىلدىرۋ بويىنشا تاپسىرمالار بەرىلدى.
