وكىنىش پەن كەشىرىم: شەرزات سوتىنداعى جارىس سوزدە ايىپتالۋشىلار نە ايتىپ جاتىر

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسىندا جارىس ءسوز ءوتىپ جاتىر.

سوتتالۋشى، كامەلەتكە تولماعان دۋمان ىسقاق سوڭعى ءسوزىن ايتتى.

- مەن ادۆوكاتىم ايتقان سوزدەرمەن تولىق كەلىسەمىن. مەن ناقتى قىلمىس جاسالعانىن 4 - قازان ساعات 11-12 لەر شاماسىندا ءبىلدىم. قۇرمەتتى سوت، مەنى اقتاۋىڭىزدى سۇرايمىن. بارلىعى ءادىل بولۋىن سۇرايمىن، - دەدى ول.

ونىڭ ءسوزىن سوتتالۋشى شىڭعىس بەلعوجايەۆ جالعاستىردى. ول شەرزاتتىڭ اكەسى قارجاۋباي نۇرىموۆتى ق ر قىلمىستىق كودەكسىنىڭ 293-بابىمەن جاۋاپكەرشىلىككە تارتۋدى سۇرادى.

- مەن سول جەرگە بارىپ، بولعان جاعدايعا ارالاسىپ، ۇرىپ-سوعىپ، توبەلەستە بولعانىم ءۇشىن جابىرلەنۋشىلەردەن كەشىرىم سۇرايمىن. بولعان وقيعاعا قاتتى وكىنەمىن. قۇرمەتتى سوت، ءبىز ەشقانداي قىلمىستىق توپ ەمەسپىز. قاساقانا توبەلەسەمىز دەگەن ويىمىز دا، نيەتىمىز دە بولعان جوق. مۇنداي وقيعا بولاتىنىن بىلگەندە، ءبىزدى مىلتىقپەن دايىندالىپ كۇتىپ وتىرعانىن بىلگەندە، بارماق تۇگىلى، مۇلدەم جولامايتىن ەدىم. قۇرمەتتى سوت، نۇرىموۆ قارجاۋباي «شىڭعىس مەنى پىشاقپەن قۋالاپ، كيىمىمدى جىرتتى» دەپ وتىرىك ايتىپ، جالعان سويلەگەن بولاتىن. ونداي جاعداي بولعان جوق جانە مەن باكىنىڭ سابىمەن ۇرعان جوقپىن. قالعان ءىس-ارەكەتتەرىمنىڭ بارلىعىن مويىندايمىن. ءبىرىنشى كۇننەن باستاپ مويىنداپ كەلەمىن. «ەر-جىگىت كورمەيمىن دەگەن جەرىن ءۇش كورەدى، جاقسى ات باسپايمىن دەگەن جەرىن ءۇش باسادى» دەيدى. سول سەكىلدى ءبىزدىڭ وقيعا ويلاماعان جەردە بولدى. ءبىز دەپۋتاتتىڭ، اكىمنىڭ، پروكۋروردىڭ، سوتتىڭ بالالارى ەمەسپىز. قاراپايىم وتباسىنان شىققان ادامدارمىز. بىزگە تاعىلعان ايىپ سەكىلدى نۇرىموۆ قارجاۋباي مىرزاعا ق ر قىلمىستىق كودەكسىنىڭ 293-بابىمەن جاۋاپكەرشىلىككە تارتۋىڭىزدى سۇرايمىن، - دەدى ول.

سونىمەن قاتار شىڭعىس بەلعوجايەۆ جابىرلەنۋشى تاراپتىڭ ماتەريالدىق وتەم تۋرالى ازاماتتىق تالابىن قاناعاتتاندىرماۋدى سۇرادى.

- ازاماتتىق تالاپ بويىنشا ەسەپتەپ قاراساق 660 ميلليون شىعىپ تۇر. مۇنداي مولشەردەگى سومانى وسى جەردەگى 9 ادام بولىپ ءومىر بويى قازاقستاندا جۇمىس ىستەسەك تە، تابا المايمىز. سوندىقتان بۇل ءوتىنىشحاتتى قاناعاتتاندىرۋسىز قالدىرۋىڭىزدى سۇرايمىن، - دەدى ول.

ودان كەيىن سوتتالۋشى نۇرقياس ءىلياسوۆ ءسوز الدى. ءول وز ىسىنە وكىنەتىنىن ايتتى.

- وقيعا بولعان جەرگە بارعانىما قاتتى وكىنەمىن. ول وقيعادا شەرزات مارقۇم مەنى ۇردى، ەكىنشىدەن اعاسى بىزگە اتتى. مەن سويلەسۋ ماقساتىندا بارعانمىن. ءۇشىنشى رەت وقتاپ جاتقان كەزدە ناقتى بىزگە اتادى دەگەن ويمەن مىلتىعىن الىپ، ۇردىم. سولاي ىستەگەنىمە وكىنىپ وتىرمىن. بارىنەن كەشىرىم سۇرايمىن. قۇرمەتتى سوت، سىزدەن سۇرايتىنىم - ءادىل جازا، - دەدى ول.

سوتتالۋشى ديدار قالياحمەت تە وزىنىڭ سوڭى سوزىندە سوتتان ءادىل شەشىم شىعارۋدى ءوتىندى.

- مەن شەرزاتتىڭ اكەسىنەن جانە اناسىنان كەشىرىم سۇرايمىن. ونىڭ سەبەبى - پوليسيا قىزمەتكەرلەرىنە قوڭىراۋ شالماعانىم ءۇشىن جانە اراشالاماعانىم ءۇشىن. ەكىنشىدەن، انامنان، اكەمنەن، جۇبايىمنان، بالا-شاعامنان كەشىرىم سۇرايمىن. 8 اي بويى ول كىسىلەرگە حالىقتىڭ جامان سوزدەرىنەن كەشىرىم سۇرايمىن. قۇرمەتتى سوت، ءادىل شەشىم شىعارۋىڭىزدى سۇرايمىن. مەن مۇندا ەشكىممەن توبەلەسكەن جوقپىن. توبەلەسكەن دالەلدەرىڭىز بولسا، دالەلدەڭىزدەر. سىزدەر دالەلدەگەن جوقسىزدار، - دەدى ول.

سونىمەن قاتار شەرزاتتىڭ ولىمىنە باستى كۇدىكتى جارىسسوزدە سوڭعى ءسوزىن ايتتى. وعان بۇزاقىلىق، ادام ءولتىرۋ، قىلمىسقا دايىندالۋ جانە قىلمىسقا وقتالۋ ايىبى تاعىلىپ وتىر.

- الدىڭعى جاۋابىمدا ايتىپ وتكەندەي شەرزات پولاتتى مەن ولتىرگەن جوقپىن. ونى ولتىرگەن بولسام، الدىڭعى جاۋابىمدا-اق مويىندايتىن ەدىم. مەن ىستەگەن ءىس-ارەكەتىمنەن قاشاتىن جىگىت ەمەسپىن. اقيقاتتى ايتتىم، جاۋابىمدى نەگە وزگەرتكەنىمدى ايتتىم. مەن جازادان قورىقپايمىن، ماعان ءتيىستى جازا بەرۋىڭىزدى سۇرايمىن، ءادىل شەشىم شىعارۋىڭىزدى سۇرايمىن. ق ر قىلمىستىق كودەكسىنىڭ 106-بابىمەن جازا تاعايىنداۋىڭىزدى سۇرايمىن. بارشا قازاق ەلىنەن كەشىرىم سۇراعىم كەلەدى. «بايدىڭ بالاسى، اكەسى اكىم» دەپ جەردەن الىپ، جەرگە سالىپ جاتىر. ەشقانداي دا اعا-كوكەم جوق. ەشقانداي اكەم جوق، جالعىز عانا انام بار. اناممەن عانا تۇرام. ەشقانداي قىلمىستىق توپ ەمەس. مەن دە ولاي بولادى دەپ ويلاعان جوقپىن. شەرزاتتى ولتىرگەن مەن ەمەس. ناقتى دالەلىم جوق، سول ءۇشىن كىم ىستەگەنىن ايتا المايمىن، - دەدى ابزال شىناسىل.

ەسكە سالايىق، كەشە پروكۋرور سوتتالۋشىلارعا قانداي جازا سۇراعانى بەلگىلى بولدى.