وكىلدەر پالاتاسى ا ق ش فەدەرالدىق اگەنتتىكتەرىن قارجىلاندىرۋ تۋرالى زاڭ جوباسىن ماقۇلدادى
استانا. KAZINFORM - فەدەرالدىق اگەنتتىكتەردى قىركۇيەككە دەيىن قارجىلاندىرۋعا مۇمكىندىك بەرەتىن جاڭا زاڭ جوباسى ماقۇلدانۋ ءۇشىن سەناتقا جولداندى، دەپ حابارلايدى PBS.
وكىلدەر پالاتاسىنداعى داۋىس بەرۋ كەزىندە قارجىلاندىرۋ تۋرالى زاڭ جوباسىن 217 ادام قولداسا، 213 ءى وعان قارسى بولدى.
سەناتتا رەسپۋبليكاشىلارعا زاڭ جوباسى پرەزيدەنت دونالد ترامپتىڭ ۇستەلىنە جەتۋ ءۇشىن كەمى 8 دەموكراتتىڭ قولداۋى قاجەت بولادى.
زاڭ شىعارۋشىلاردىڭ مالىمدەۋىنشە، زاڭ جوباسى قورعانىسقا بايلانىستى ەمەس شىعىنداردى 2024-جىلعى بيۋجەتپەن سالىستىرعاندا 13 ميلليارد دوللارعا قىسقارتادى جانە قورعانىس شىعىندارىن 6 ميلليارد دوللارعا ارتتىرادى، بۇل ەكى سانات ءۇشىن شىعىنداردىڭ شامامەن 1,7 تريلليون دوللار جالپى كورسەتكىشىمەن سالىستىرعاندا شامالى وزگەرىس بولىپ وتىر.
دەموكراتتاردى كوبىنە زاڭ جوباسىنداعى ترامپ اكىمشىلىگىنە شىعىندار تۋرالى شەشىمدەر شىعارۋدا بيلىك جانە باسىمدىقتاردى قايتا تۇجىرىمداۋ ەركىندىگىن بەرۋى الاڭداتىپ وتىر.
ءوز كەزەگىندە دەموكراتتار 11-ساۋىرگە دەيىن ۇكىمەتتى قارجىلاندىرۋدى قاراستىراتىن بالاما زاڭ جوباسىن ۇسىندى. رەسپۋبليكاشىلاردىڭ قولداۋى ءساتسىز بولعان جاعدايدا زاڭ جوباسى «ب» جوسپارى رەتىندە قىزمەت ەتۋى مۇمكىن.
بۇعان دەيىن ترامپ كونگرەستى ۇكىمەتتى ۋاقىتشا قارجىلاندىرۋ تۋرالى زاڭ جوباسىن قولداۋعا شاقىرعانىن جازعان بولاتىنبىز.
