وجەت ايەل تۋرالى فيلم

وتاندىق كينووندىرىستە ارت حاۋس، ياعني ناعىز ونەر باعىتىندا ءونىمدى ەڭبەك ەتىپ جۇرگەن رەجيسسەردىڭ ءبىرى - ءادىلحان ەرجانوۆ. ول تۇسىرگەن «قوجايىندار»، «قاپ- قارا ادام»، «سارى مىسىق»، «داۋىل»، «ۇلبولسىن» سىندى اۆتورلىق فيلمدەر الەمنىڭ تالعامپاز كورەرمەنى مەن كينو ماماندارىنىڭ جۇرەگىن جاۋلاپ ۇلگەردى.

ەرجانوۆتىڭ جاھاندىق كينو كەڭىستىگىندە جۇلدىزىن جاققان تاعى ءبىر ۇزدىك تۋىندى - «دالا قاسقىرى» دراماسى.

مادەنيەت جانە اقپارات مينيسترلىگىنىڭ تاپسىرىسى بويىنشا «ۇلتتىق كينو ورتالىعىنىڭ» قولداۋىمەن تۇسىرىلگەن تۋىندى جىل ورتاسىندا كاناداداعى «Fantasia Film Festival» فەستيۆالىندە توپ جاردى. ال فيلم اكتەرلەرى بەرىك ايتجانوۆ پەن اننا ستارچەنكو «ۇزدىك اكتەر» اتالىمىندا ءبىراۋىزدان حالىقارالىق سىنشىلاردىڭ قولداۋىنا يە بولسا، كينوكارتينا وپەراتورى ەركىنبەك پىتىراليەۆ «وسكار» اكادەمياسىنىڭ مۇشەسى اتاندى. سونىمەن قاتار ايتۋلى فيلم «Reims Polar 2024» كينوفەستيۆالىندە فرانتسۋز سىنشىلارى قاۋىمداستىعىنىڭ ارنايى سىيلىعىمەن ماراپاتتالدى.

«دالا قاسقىرى» - تريللەر مەن دراما جانرىن ءون بويىنا شەبەر ۇيلەستىرە بىلگەن شىتىرمان وقيعالى فيلم. كوركەم تۋىندىدا جوعالعان ۇلىن ىزدەگەن تامارا ەسىمدى ايەلدىڭ وقيعاسى باياندالادى. ول كومەككە جۇگىنۋ ءۇشىن دەتەكتيۆ جالدايدى جانە بۇل شەشىمى كۇتپەگەن سالدارعا اكەلەدى. سەناريى التى جىل جازىلعان كارتينانىڭ ءتۇسىرىلىم جۇمىسى 2021 -جىلى باستالىپ، الماتى جانە جەتىسۋ وبلىستارىنىڭ اۋماعىندا وتكەن. وعان 100 دەن استام مامان جۇمىلعان. فيلمدەگى ءقاۋىپتى تريۋكتەردى ەلىمىزدىڭ كاسكادەرلەرىمەن قاتار، بەلورۋسسيادان ارنايى شاقىرىلعان ماماندار كاسىبي جوعارى دەڭگەيدە ورىنداپ شىقتى.

فيلم مەن جالپى تۋىندىنىڭ ءتۇسىرىلۋ جۇمىسى تۋرالى ءادىلحان ەرجانوۆ: «دالا قاسقىرى» - اۆتورلىق فيلم. بالاسىن جانۇشىرا ىزدەگەن انانىڭ ەشنارسەدەن تايسالماي، كەدەرگىلەرگە قاراماي، ءتىپتى قاۋىپپەن بەتپە-بەت كەلسە دە، ارتقا شەگىنبەي، كەرىسىنشە، العا ۇمتىلاتىنىن باياندايدى. فيلمنىڭ باسقا سيۋجەتتىك جەلىسى جوق، ول ورىن العان وقيعانىڭ اينالاسىن عانا ايشىقتاپ، كورەرمەنگە تاپ- تۇيناقتاي ەتىپ جەتكىزەدى»، دەيدى رەجيسسەر ءتۇسىرىلىم جۇمىسىنىڭ قىر-سىرىن بايانداپ.

 ال فيلم پروديۋسەرى ءاليا مەڭدىعوجينا اتاپ وتكەندەي، «دالا قاسقىرى» - كۇشتى ايەل تۋرالى فيلم. ونىڭ سوزىنشە، كەيىپكەر ءبىر قاراعاندا ءالسىز كورىنەدى، ءبىراق ءىس جۇزىندە ونىڭ مىنەزى مەن رۋحى مىقتى. «فيلم الەمدىك اۋديتوريانىڭ نازارىن بىردەن اۋداردى. حالىقارالىق فەستيۆالدە جۇلدەلى ورىندارعا يە بولىپ، ءوزىن مويىنداتتى ، دەيدى پروديۋسەر.

بۇل «دالا قاسقىرىنىڭ» ءبىرىنشى جەتىستىگى ەمەس. سونداي- اق ول بەلگيادا وتكەن حالىقارالىق كينوفەستيۆالدە دە باس جۇلدەمەن قانجىعا مايلادى. ۇيىمداستىرۋشىلار قازاق رەجيسسەرىنىڭ قايتالانباس قولتاڭباسى مەن تالانتىنا تاڭ قالىپ، ونىڭ جاڭا تۋىندىسىن 2024 -جىلعى «Big Screen Competition» بايقاۋىنىڭ نەگىزگى باعدارلاماسىنا دا ويلانباستان ەنگىزدى.

نازەركە جۇماباي