«وحوتزووپروم» وزدەرى اتقان كيىكتەردەن قانشا ءمۇيىز الىنعانىن ايتتى
استانا. KAZINFORM - «وحوتزووپروم» ءوندىرىس بىرلەستىگى» رەسپۋبليكالىق مەملەكەتتىك قازىنالىق كاسىپورنىنىڭ باس ديرەكتورى مارلەن اينابەكوۆ اتىلعان كيىكتەردەن قانشا ءمۇيىز الىنعانىن ايتتى.
«بيولوگيالىق نەگىزدەمە بويىنشا ورال پوپۋلياتسياسىنا جاتاتىن كيىكتەردىڭ 20 پايىزىنان اسپايتىن كولەمىن (226 مىڭ باس)، بەتپاقدالا پوپۋلياتسياسىنىڭ 15 پايىزىن (111975 باس) ۇسىنىلعان بولاتىن. كيىك سانىن رەتتەۋ شاراسى 2023 -جىلدىڭ 6 - قازانىندا باستالىپ، 2024 -جىلدىڭ 10-اقپانىندا اياقتالدى. 42 مىڭ باس كيىك اۋلاندى. بۇل بيولوگيالىق نەگىزدەمە ۇسىنعان جوسپاردىڭ 12 پايىزى دەگەن ءسوز»، - دەدى ول.
سونداي- اق، مارلەن اينابەكوۆ كيىك اۋلاۋ تۇندە جارىق كومەگىمەن اتۋ ارقىلى، كۇندىز تور قۇرىپ قاماۋ ارقىلى جۇرگەنىن اتاپ ءوتتى.
«كيىك اۋلاۋ جۇمىستارىنا جول تالعامايتىن 27 «دجيپ» كولىگى، تاعى 21 امبەباپ كۋزوۆتى جۇك كولىگى تارتىلدى. كيىك سانىن رەتتەۋ جۇمىستارىنا اتسالىسۋ ءۇشىن 191 اداممەن قىزمەت كورسەتۋ تۋرالى كەلىسىمشارت جاسالىپ، 43 اڭشى توپ قۇرىلدى. قازىرگى تاڭدا «وحوتوزووپروم» كاسىپورنىندا 42161 كيىك ءمۇيىزى ساقتاۋلى تۇر»، - دەدى «وحوتزووپروم» كاسىپورنىنىڭ ديرەكتورى.
