وففشورلىق يۋان باعامى قۇلدىراپ بارادى

استانا. KAZINFORM - ا ق ش پەن قىتاي اراسىنداعى ساۋدا سوعىسى كۇرت شيەلەنىسكەن تۇستا، رەسمي بەيجىڭنىڭ ۇلتتىق ۆاليۋتاعا باقىلاۋدى بوساڭسىتۋى ناتيجەسىندە وففشورلىق يۋان باعامى تاريحي تومەن دەڭگەيگە قۇلدىرادى.

Lianhe Zaobao باسىلىمىنىڭ حابارلاۋىنشا، 8 -ءساۋىر كۇنى نيۋ-يورك ساۋدا سەسسياسىندا وففشورلىق يۋان دوللارعا شاققاندا ءبىر ساتكە %0,9 عا تومەندەپ، 1 ا ق ش دوللارى 7,4141 يۋانعا باعالانعان. وسىلايشا ناقتى ايىرباس باعامى بويىنشا رەكوردتىق مينيمۋم جاڭاردى.

سول كۇنى قىتاي حالىق بانكى يۋاننىڭ رەسمي ورتاشا باعامىن 1 ا ق ش دوللارىنا 7,2038 يۋان دەڭگەيىندە بەلگىلەدى - بۇل 2023 -جىلدىڭ قىركۇيەگىنەن بەرگى ەڭ ءالسىز كورسەتكىش.

وسىلايشا ترامپ اق ۇيگە قايتا ورالعاننان بەرى يۋاننىڭ رەسمي باعامى العاش رەت 7,20 دەڭگەيىنەن تومەندەپ وتىر. ىشكى نارىقتاعى يۋان باعامى دا 2023 -جىلدىڭ قىركۇيەگىنەن بەرگى ەڭ تومەنگى كورسەتكىشتى كورسەتتى.

- ءبىزدىڭ بولجاۋىمىزشا، الداعى ۋاقىتتا يۋان باعامى جىلدام قۇنسىزدانۋعا ءتيىس. قىتاي بيلىگى ورتاشا باعام ارقىلى ايىرباس باعامىنا كوبىرەك يكەمدىلىك بەرۋگە نيەتتى ەكەنىن تۇسپالداپ وتىر، - دەيدى Wells Fargo بانكى ماكروستراتەگيا جانە دامۋشى نارىقتار ءبولىمىنىڭ ديرەكتورى ارۋپ چاتتەردجي.

ونىڭ ايتۋىنشا، بۇل باقىلاۋدا بولاتىن ۇزدىكسىز قۇنسىزدانۋ ۇدەرىسى بولماق. ءسويتىپ وففشورلىق يۋان باعامى 1:7,50 نەمەسە ودان دا تومەن دەڭگەيگە دەيىن قۇلدىرراۋى مۇمكىن.

JPMorgan بانكىنىڭ ۆاليۋتا نارىعى بويىنشا تالداۋشىسى تيففاني ۆاننىڭ ايتۋىنشا، قىتاي حالىق بانكىنىڭ كەلەسى قورعانىستى قاي دەڭگەيدەن قۇراتىنى ءالى بەلگىسىز. ءبىراق، شەك قالايدا بۇرىنعىسىنان جوعارى بولادى. ونىڭ پىكىرىنشە، يۋان باعامى 7,40 دەڭگەيىنە دەيىن قۇلدىراۋى مۇمكىن.

قىتايدىڭ ورتالىق بانكى ترانسشەكارالىق وپەراتسيالاردا يۋان پايدالانۋدى ىنتالاندىرادى.

ەرلان مازان